តើមានកត្តាអ្វីជំរុញឱ្យតម្លៃមាសនៅសហរដ្ឋអាម៉េរិក ហក់ឡើងខ្ពស់មិនធ្លាប់មានកាលពីសប្តាហ៍មុន?

ស្របពេលស្ថានភាពសេដ្ឋកិច្ចរបស់សហរដ្ឋអាម៉េរិក កំពុងស្ថិតក្នុងអន្តរកាលនៃការអនុវត្តគោលនយោបាយកំណត់ពន្ធថ្មី បុគ្គលិករដ្ឋបាលសហព័ន្ធប្រឈមមុខនឹងការបណ្តេញចេញពីក្របខ័ណ្ឌ តម្លៃទំនិញមានការប្រែប្រួលពិបាកប៉ាន់ស្មាន តម្លៃមាសកាលពីសប្តាហ៍មុនបានស្ទុះឡើងដល់កម្រិតមួយខ្ពស់បំផុតមិនធ្លាប់មានពីមុនមក។ ហាងឆេងមាសដែលគេជួញដូរនៅក្នុងទីផ្សារនៅទីក្រុងញូវយ៉ក កាលពីសប្តាហ៍មុនមានតម្លៃ៣​៦០០ដុល្លារក្នុងមួយតម្លឹង។

អ្នកវិភាគបានអះអាងថា ការចាប់អារម្មណ៍លើការទិញមាសអាចកើនឡើងខ្លាំងប្រសិនស្ថានការណ៍ពិភពលោកកាន់តែមានភាពមិនច្បាស់លាស់ ដោយសារអ្នកវិនិយោគត្រូវស្វែងរកឧបករណ៍ជួញដូរ ដែលមានសុវត្ថិភាពសម្រាប់រក្សាទ្រព្យសម្បតិ្តរបស់ពួកគេ។ បើតាមការអះអាងរបស់អ្នកវិភាគ តម្លៃមាសដែលកំពុងកើនឡើងខ្ពស់នៅពេលនេះ គឺដោយសារគោលនយោបាយពន្ធគយរបស់ប្រធានាធិបតីអាម៉េរិក លោក ដូណាល់ ត្រាំ បានចាប់ផ្តើមធ្វើឱ្យមានសង្គ្រាមពាណិជ្ជកម្មអន្តរជាតិ ដែលធ្វើឱ្យទីផ្សារហិរញ្ញវត្ថុខ្វះស្ថិរភាព និងបង្កើតសម្ពាធលើអតិផរណា និងជីវភាពប្រជាពលរដ្ឋ។

ប្រសិនបើនិន្នាការនេះនៅតែបន្ត អ្នកវិភាគព្យាករថា តម្លៃមាសអាចបន្តកើនឡើងបន្ថែមទៀតនៅប៉ុន្មានខែខាងមុខ ប៉ុន្តែការជួញដូរវត្ថុ​ដ៏មានតម្លៃនេះ ក៏ស្ថិតក្នុងស្ថានភាពពិបាកប៉ាន់ស្មានផងដែរ។ នៅក្នុងស្ថានភាពបែបនេះ តម្លៃដែលគេដាក់ជួញដូរនៅក្នុងទីក្រុងញូវយ៉ក បានកើនឡើងជិត១៤% ស្របពេលដែលសន្ទស្សន៍តម្លៃភាគហ៊ុនបានធ្លាក់ចុះប្រមាណជាង៥%។

អ្នកវិភាគនៅក្រុមហ៊ុនវិនិយោគ RBC Capital Markets បានអះអាងថា ជាទូទៅស្ថានភាពតម្លៃមាស គឺផ្សារភ្ជាប់នឹងបញ្ហាពន្ធ ដូច្នេះហើយភាពមិនប្រាកដប្រជា និងភាពវឹកវរ ក៏ជាកត្តារុញច្រានឲ្យតម្លៃមាសហើមឡើងផងដែរ។

ដោយឡែកលោក ជូ កាវ៉ាតូនី (Joe Cavatoni) ប្រធានផ្នែកយុទ្ធសាស្រ្តទីផ្សារនៅក្រុមប្រឹក្សាមាសពិភពលោកបានអះអាងថា តម្លៃមាសវាប្រែ​ប្រួលបែបនេះ គឺបណ្តាលមកពីបញ្ហាប្រឈម និងហានិភ័យជាសកល។ លោកបានបន្តថា ស្ថានភាពនៃការគ្រប់គ្រងសេដ្ឋកិច្ចនៅពេលនេះ បានបង្កើនការព្រួយបារម្ភ និងបណ្តាលឱ្យសាធារណជនកាន់តែងាកទៅរកទ្រព្យ ដែលជាជម្រកសុវត្ថិភាព នៃទ្រព្យសម្បត្តិរបស់ពួកគេ៕

ដោយៈ សរ សុជាតិ