ក្រុមហ៊ុនបច្ចេកវិទ្យាយក្សរបស់សហរដ្ឋអាម៉េរិក Google បានឈានដល់កិច្ចព្រមព្រៀងទិញក្រុមហ៊ុនសន្តិសុខតាមអ៊ីនធឺណិត Wiz ក្នុងតម្លៃរហូតដល់៣២ពាន់លានដុល្លារ។ ការទិញយកក្រុមហ៊ុននេះ គឺជាផ្នែកមួយនៃកិច្ចខិតខំប្រឹងប្រែងរបស់ក្រុមហ៊ុននេះ ដើម្បីពង្រីកឥទ្ធិពល និងភាពខ្លាំងរបស់ខ្លួនក្នុងនាមជាមជ្ឈមណ្ឌលផ្ទុកទិន្នន័យនៅលើពិភពលោក ចំពេលមានការរីកចម្រើនខ្លាំង នៃបច្ចេកវិទ្យាបញ្ញាសិប្បនិម្មិត AI។
តាមកិច្ចព្រមព្រៀងនេះ ប្រសិនបើប្រតិបត្តិការផ្ទេរសាច់ប្រាក់ទាំងអស់ត្រូវបានអនុម័តដោយនិយ័តករ នោះ ក្រុមហ៊ុន Wiz នឹងចូលរួមជាមួយ Google Cloud ដែលជាផ្នែកដ៏សំខាន់នៃអាជីវកម្មដាច់ដោយឡែក ពីប្រតិបត្តិការស្វែងរក និងការផ្សាយពាណិជ្ជកម្ម ដែលជាប្រភពចម្បងនៃប្រាក់ចំណូលប្រចាំឆ្នាំ ដែលមានទំហំ៣៥០ពាន់លានដុល្លារ នៅក្រុមហ៊ុន Alphabet ដែលជាក្រុមហ៊ុនមេរបស់ Google។
ស្របពេលសន្ទុះតម្រូវការបច្ចេកវិទ្យាបញ្ញាសិប្បនិម្មិតមានការកើនឡើង សេវាកម្មផ្តល់ និងបម្រើសេវារបស់មជ្ឈមណ្ឌលទិន្នន័យ Cloud របស់ក្រុមហ៊ុន Google ក៏មានការកើនឡើងដូចគ្នាដែរ ដែលធ្វើឱ្យប្រាក់ចំណុលប្រចាំឆ្នាំរបស់សេវាកម្មនេះ បានកើនឡើងពីជាង២៦ពាន់លានដុល្លារ ក្នុងឆ្នាំ២០២២ កើនឡើងដល់ជាង៤៣ពាន់លានដុល្លារ កាលពីឆ្នាំ២០២៤។
នាយកប្រតិបត្តិរបស់ក្រុមហ៊ុន Google លោក សាន់ដា ភិឆ័យ (Sundar Pichai) បានព្យាករថា ការបន្ថែមក្រុមហ៊ុន Wiz ជាផ្នែកមួយរបស់ Google Cloud នឹងធ្វើការផ្តល់សេវាកាន់តែមានសុវត្ថិភាពជាងមុន និងតម្លៃទាបជាងមុខផងដែរ៕
ដោយៈ សរ សុជាតិ
