កំណើនសេដ្ឋកិច្ចប្រទេសមហាអំណាចលេខ១បានកើនឡើងយឺតជាងការព្យាករ ក្នុងអត្រាជាង ១ ភាគរយ

កំណើនសេដ្ឋកិច្ចរបស់សហរដ្ឋអាមេរិកមានអត្រាត្រឹម ១,១ ភាគរយ នៅត្រីមាសទី ១ នៃឆ្នាំ ២០២៣ នេះ ស្របពេលដែលក្រុមហ៊ុននានាបានធ្វើរបាយការណ៍តុល្យការរបស់ខ្លួនឡើងវិញ និងបានបន្ថយការចំណាយ នៅចំពោះមុខការដំឡើងអត្រាការប្រាក់ដ៏ខ្ពស់ដោយធនាគារកណ្តាលអាមេរិក។

ការកើនឡើងនៃផលិតផលក្នុងស្រុកសរុប ដែលជារង្វាស់រង្វាល់ដ៏ទូលំទូលាយបំផុតនៃសកម្មភាពសេដ្ឋកិច្ច គឺទាបជាងការរំពឹងទុករបស់អ្នកជំនាញសេដ្ឋកិច្ចដែលថាមានកំណើន ២% ហើយកំណើននេះគឺយឺតជាងមុន បើប្រៀបធៀបនឹង ២ ត្រីមាសមុន។ នេះបើយោងតាមទិន្នន័យដែលបានចេញផ្សាយកាលពីថ្ងៃព្រហស្បតិ៍ដោយក្រសួងពាណិជ្ជកម្មអាមេរិក។

ក្រៅពីនេះបញ្ហាដែលបានកើតមានទាក់ទងនឹងស្ថានភាពនៃវិស័យធនាគារ ដែលបានកើតមានឡើងនៅអាមេរិកពីខែ មករា ដល់ខែ មីនា និង បញ្ហាមិនដាច់ស្រេចនៃបញ្ហាវិបត្តិបំណុលក៏កំពុងតែជះឥទ្ធិពលនិងរង្គោះរង្គើដល់សេដ្ឋកិច្ចអាមេរិកផងដែរ ។

របាយការណ៍ស្ដីពីផលិតផលក្នុងស្រុកសរុបអាមេរិកនេះបានបញ្ជាក់ថា សេដ្ឋកិច្ចអាមេរិកបានបាត់បង់សន្ទុះក្នុងរយៈពេលប៉ុន្មានខែថ្មីៗនេះ ដោយអ្នកសេដ្ឋកិច្ចជាច្រើនរូបថែមទាំងបានព្យាករណ៍អំពីឱនភាពសេដ្ឋកិច្ចនាពេលខាងមុខក្នុងឆ្នាំនេះ។ ធនាគារកណ្តាលសហរដ្ឋអាមេរិកបានខិតខំអស់ជាច្រើនខែ ដើម្បីសម្រាលស្ថានភាពសេដ្ឋកិច្ចដែលនៅតែមានសភាពរឹងមាំ ទោះបីជាមានការដំឡើងអត្រាការប្រាក់ចំនួន ៩ ដងជាប់ៗគ្នាក៏ដោយ៕