ការដំឡើងពិដានបំណុលបន្ថែមកំពុងតែនៅគាំងស្ដូក ដ្បិតថា ប្រធានសភាអាមេរិក លោក ម៉ាកខេធី ដែលមកពីគណបក្សសាធារណរដ្ឋ មិនព្រមធ្វើតាមការស្នើរបស់ប្រធានាធិបតី ចូ បៃឌិនដែលមកពីគណបក្សប្រជាធិបតេយ្យនោះឡើយ ដោយលោក ម៉ាកខេធី នៅតែទាមទារឲ្យរដ្ឋបាលលោកចូបៃឌិន ត្រូវកាត់បន្ថយចំណាយរបស់ខ្លួនឲ្យតិចជាងមុន។ តើនឹងមានអ្វីកើតឡើងចំពោះសេដ្ឋកិច្ចអាមេរិក ប្រសិនជាផែនការដំឡើងពិដានបំណុល ត្រូវបរាជ័យ?
លោក ចូ បៃឌិន និងលោក ម៉ាកខេធី បានជួបគ្នាកាលពីថ្ងៃទី១០ខែឧសភា ក្នុងការចរចា ដើម្បីឲ្យមានការដំឡើងពិដានបំណុល ប៉ុន្ដែ ការពិភាក្សានោះ មិនបានទទួលបានលទ្ធផលនោះទេ។ ខណៈដែលការចរចាមិនមានលទ្ធផល ប្រធានាធិបតីចូបៃឌិន បានដាក់សម្ពាធបន្ថែមទៀតទៅកាន់សមាជិកសភាមកពីគណបក្សសាធារណរដ្ឋ ដើម្បីពន្លឿនការសម្រេចផែនការដំឡើងពិដានបំណុលនេះឲ្យបានឆាប់ បើមិនដូច្នេះទេ ហានិភ័យនឹងកើតមានឡើងចំពោះសេដ្ឋកិច្ចអាមេរិក ដោយនឹងធ្លាក់ចូលក្នុងវិបត្តិ ដែលអាចធ្វើឲ្យបាត់បង់ការងារពលរដ្ឋរាប់ពាន់នាក់។ នេះបើតាមការព្រមានរបស់លោកចូបៃឌិន កាលពីថ្ងៃទី ១០ឧសភា។
យ៉ាងណាមិញ បើតាមការអះអាងរបស់ក្រសួងហិរញ្ញវត្ថុអាមេរិក រដ្ឋាភិបាលនឹងត្រូវអស់លទ្ធភាពក្នុងការទូទាត់ការចំណាយនានា នៅត្រឹមដើមខែមិថុនាខាងមុខនេះ ប្រសិនបើមិនមានការដំឡើងពិដានបំណុល សម្រាប់បើកផ្លូវឲ្យមានការខ្ចីមូលនិធិបន្ថែមទេនោះ។
តើអ្វីជាសេណារីយ៉ូអាក្រក់បំផុត ប្រសិនបើរដ្ឋាភិបាលអាមេរិកមិនអាចដំឡើងពិដានបំណុល?
សហរដ្ឋអាមេរិកនៅពេលនេះ នៅមានពេលវេលាតែប៉ុន្មានសប្ដាហ៍ទៀតប៉ុណ្ណោះ ក្នុងការដោះស្រាយបញ្ហានេះ ខណៈដែលក្រុមអ្នកនយោបាយមកពីគណបក្សសាធារណរដ្ឋ និងគណបក្សប្រជាធិបតេយ្យកំពុងដេញជាន់កែងគ្នាជុំវិញរឿងនេះ រកចំណុចស្រុះស្រួលគ្នាមិនទាន់បាននៅឡើយ។
បើតាមលោក Bernard Yaros ជំនួយការនាយកផ្នែកវិភាគនៅឯស្ថាប័នស្រាវជ្រាវ និងវាយតម្លៃសេដ្ឋកិច្ច Moody’s បានបញ្ជាក់នៅក្នុងបទសម្ភាសន៍មួយជាមួយនឹងទូរទស្សន៍ Al Jazeera ថា ចំពោះស្ថានភាព ក្នុងករណីពិដានបំណុលមិនត្រូវបានដំឡើងទេនោះ វានឹងធ្វើឲ្យមានការកើតមាននូវភាពជ្រួលច្របល់ភ្លាមៗនៅក្នុងសេដ្ឋកិច្ចអាមេរិក ហើយបន្ទាប់មក វានឹងរុញឲ្យធ្លាក់ចូលទៅក្នុងមាត់ជ្រោះនៃវិបត្តិសេដ្ឋកិច្ច ទៅតាមលំដាប់លំដោយដូចទៅនឹងវិបត្តិហិរញ្ញវត្ថុកាលពីឆ្នាំ២០០៨ដែរ។ ក្នុងសេណារីយ៉ូនេះ រដ្ឋាភិបាលអាមេរិក នឹងត្រូវកាត់បន្ថយចំណាយរបស់ខ្លួនភ្លាមៗ។ លោក Yaros បន្ថែមថា នៅពេលមានកាត់បន្ថយចំណាយទាំងនេះ វានឹងធ្វើឲ្យប៉ះពាល់យ៉ាងច្រើនលើសលុបចំពោះកំណើនសេដ្ឋកិច្ច។
អត្ថបទគួរអាន
ជាផ្នែកមួយដែលអាចកើតឡើងក្រោមសេណារីយ៉ូនេះ វានឹងធ្វើឲ្យទីផ្សារហិរញ្ញវត្ថុស្ថិតក្នុងភាពចលាចល អត្រាការប្រាក់នឹងកើនឡើងកាន់តែខ្លាំងថែមទៀត ហើយភាពរឹងមាំនៃប្រាក់ដុល្លារក៏នឹងដាំក្បាលចុះផងដែរ។ នេះបើតាមការអះអាងរបស់លោក Lawrence J White សាស្ត្រាចារ្យសេដ្ឋកិច្ចនៃសាកលវិទ្យាល័យញ៉ូវយក ដែលបានបញ្ជាក់នៅក្នុងសារព័ត៌មាន Al Jazeera ដោយលោកបានបញ្ជាក់បន្ថែមថា បញ្ហាចលាចលទីផ្សារហិញ្ញវត្ថុនេះ វានឹងអាចបន្ដនៅទូទាំងពិភពលោក។
យ៉ាងណាមិញ បើទោះបីជា សហរដ្ឋអាមេរិក អាចនឹងជួបបរាជ័យលើការទូទាត់សងបំណុលរបស់ខ្លួននៅក្នុងរយៈពេលខ្លីក៏ដោយ វាក៏នៅតែបង្កផលវិបាកដល់សេដ្ឋកិច្ចដូចគ្នាដែរ។ បើតាមលោក White ពិភពលោកនឹងលែងជឿជាក់លើ ក្រសួងហិរញ្ញវត្ថុអាមេរិកដូចពីមុនតទៅទៀត ហើយវានឹងធ្វើឲ្យមនុស្សជាច្រើនស្ទាក់ស្ទើរក្នុងការទិញមូលបត្រ ដែលបោះផ្សាយលក់ ឬធានាដោយរដ្ឋាភិបាលអាមេរិក។ ជាមួយគ្នានេះ ប្រាក់ដុល្លារអាមេរិក ក៏អាចបន្ដធ្លាក់ចុះ ដោយសារតែការបាត់បង់ទំនុកចិត្តផងដែរ។
យ៉ាងណាក៏ដោយចុះ ទាំងនេះ វាគ្រាន់តែជាសេណារីយ៉ូ ដែលបានលើកឡើងដោយក្រុមអ្នកជំនាញសេដ្ឋកិច្ច ក្នុងករណីដែលសហរដ្ឋអាមេរិកបរាជ័យលើការដំឡើងពិដានបំណុលតែប៉ុណ្ណោះ។ ប៉ុន្ដែ អ្នកជំនាញនៅតែមានភាពជឿជាក់ថា រដ្ឋាភិបាលអាមេរិកនឹងអាចដោះស្រាយវាបាន ដ្បិតរឿងនេះ គឺស្ថិតក្នុងរូបភាពនយោបាយតែប៉ុណ្ណោះ។ យ៉ាងណាមិញ លោកចូ បៃឌិនប្រធានាធិបតីអាមេរិក និងលោក ម៉ាកខេធី ប្រធានសភាអាមេរិក នឹងជួបគ្នាម្ដងទៀតនៅថ្ងៃទី ១២ ខែឧសភានេះ ដើម្បីបន្ដពិភាក្សាស្វែងរកដំណោះស្រាយជុំវិញរឿងពិដានបំណុលនេះ៕
