កិច្ចប្រជុំកំពូលអាស៊ានដែលឡាវធ្វើជាម្ចាស់ផ្ទះនេះ ត្រូវបានអ្នកតាមដានព្រឹត្តិការណ៍នយោបាយអន្តរជាតិ ក៏ដូចជាអ្នកវិភាគបានលើកឡើងថា បញ្ហាគ្រោះធម្មជាតិ វិបត្តិនៅមីយ៉ាន់ម៉ា បញ្ហាសមុទ្រចិនខាងត្បូង និង ឥណ្ឌូប៉ាស៊ីហ្វិក និង ជម្លោះនៅតំបន់មជ្ឈិមបូព៌ា ជាពិសេសរវាងអ៊ីរ៉ង់ និង អ៊ីស្រាអែល នឹងក្លាយជាប្រធានបទក្តៅសម្រាប់ជំនួបកំពូលអាស៊ានលើកនេះ។
បើតាមការប្រកាសរបស់ប្រទេសម្ចាស់ផ្ទះ កិច្ចប្រជុំកំពូលអាស៊ាននៅឆ្នាំនេះ នឹងប្រពឹត្តទៅក្រោមមូលបទ«អាស៊ាន៖ ការពង្រឹងការតភ្ជាប់ និងភាពធន់» ហើយមេដឹកនាំអាស៊ានទាំងអស់ ក៏នឹងជំរុញនូវវឌ្ឈនភាពនៃការកសាងសហគមន៍អាស៊ាន១ ឆ្ពោះទៅកាន់ការសម្រេចបាននូវចក្ខុវិស័យសហគមន៍អាស៊ានឆ្នាំ២០២៥ និង ការលើកកម្ពស់ទំនាក់ទំនងជាមួយនឹងដៃគូខាងក្រៅរបស់អាស៊ាន តាមរយៈយន្តការនានា ដែលដឹកនាំដោយអាស៊ាន នៅក្នុងការលើកកម្ពស់ការតភ្ជាប់ និងភាពធន់នៅក្នុងតំបន់ និងក្រៅតំបន់ផងដែរ។ នៅក្រោមប្រធានបទនេះ សម្រាប់អាស៊ាន ត្រូវបានគេដឹងថា បញ្ហាដ៏ក្តៅបំផុតនោះ គឺគ្រោះមហន្តរាយធម្មជាតិ ជាពិសេសបណ្តាប្រទេសនៅក្នុងតំបន់ទន្លេមេគង្គក្រោម ខណៈដែលពេលនេះ ថៃ នៅតែប្រឈមមុខនឹងបញ្ហាគ្រោះទឹកជំនន់ធ្ងន់ធ្ងរនៅឡើយ។
បើក្រឡេកទៅមើលកាសែតបាងកកប៉ុស្តិ៍ បានរាយការណ៍ថា នៅមុនពេលចាកចេញមកចូលរួមកិច្ចប្រជុំកំពូលអាស៊ាននៅប្រទេសឡាវនេះ លោកស្រី ផែថងថាន ស៊ីណាវ៉ាត្រា បានបង្ហាញពីក្តីព្រួយបារម្ភរបស់លោកស្រីចំពោះគ្រោះទឹកជំនន់ធ្ងន់ធ្ងរ ដែលបានធ្វើឲ្យប៉ះពាល់ដល់តំបន់ភាគខាងជើង ប្រទេសថៃ ហើយបានបញ្ជាក់ថា បញ្ហានេះ រួមជាមួយនឹងកិច្ចសហប្រតិបត្តិការសេដ្ឋកិច្ច ការវិនិយោគ និងស្ថិរភាពក្នុងតំបន់ នឹងត្រូវដោះស្រាយជាមួយនឹងមេដឹកនាំនានាក្នុងកិច្ចប្រជុំកំពូលអាស៊ាន នៅទីក្រុងវៀងចន្ទន៍ប្រទេសឡាវ។
អត្ថបទគួរអាន
ដោយឡែក ប្រធានបទក្តៅមួយទៀត គឺការបរាជ័យរបស់របបយោធាមីយ៉ាន់ម៉ា ក្នុងការបញ្ចប់អំពើហិង្សានៅក្នុងប្រទេស និងបញ្ហានៃការមិនទាន់សម្រេចបានគោលការណ៍កុងសង់ស៊ី៥ចំណុច ដែលដាក់ចេញតាំងពីឆ្នាំ២០២១ ក៏នឹងក្លាយជាការផ្តោតសំខាន់នៃកិច្ចប្រជុំកំពូលអាស៊ាន នៅសប្តាហ៍នេះផងដែរ។ បញ្ហានេះកំពុងក្លាយជាជំងឺរ៉ាំរ៉ៃមួយ ដែលកំពុងរារាំងដល់ការសម្រេចបាននូវចក្ខុវិស័យសហគមន៍អាស៊ានឆ្នាំ២០២៥។
ទន្ទឹមនឹងនេះ បញ្ហាសមុទ្រចិនខាងត្បូង ក៏ដូចជាតំបន់ឥណ្ឌូប៉ាស៊ីហ្វិក ក៏ប្រហែលជាមិនមែនជារឿងងាយដោះស្រាយសម្រាប់ឡាវ នោះដែរ ថ្វីត្បិតតែ ការចរចាអំពីក្របខ័ណ្ឌប្រតិបត្តិការសមុទ្រចិនខាងត្បូង បានដំណើរការជាបន្តបន្ទាប់ក៏ដោយ ខណៈដែលប្រទេសហ្វីលីពីន បានប្តូរគោលនយោបាយនេះច្រើនគួរសម ហើយចំណែកឯវៀតណាមវិញ ទោះបីជាមិនសូវក្លៀវក្លាដូចពីមុន តែក៏កំពុងដាក់សម្ពាធគួរសមដែរនៅលើឆាកអន្តរជាតិ ស្របពេលដែលយន្តការមហាអំណាច ដែលបានដាក់ចេញ នៅឥណ្ឌូប៉ាស៊ីហ្វិក វារិតតែធ្វើឲ្យបញ្ហាកាន់តែរ៉ាំរ៉ៃបន្តទៀត។
ក្រៅពីបញ្ហាធំៗក្តៅៗទាំងនេះ ក៏មានដែរបញ្ហាជម្លោះថ្មីៗនៅតំបន់មជ្ឈិមបូព៌ា ជាពិសេសគឺក្រោយពេលដែលអ៊ីរ៉ង់ បានប្រើមីស៊ីលបាញ់ស្រោច មកលើអ៊ីស្រាអែល កាលពីដើមខែតុលា ថ្មីៗនេះ ប្រហែលជាមិនចុះត្រជាក់ឡើយ ទោះបីនៅព្រឹកថ្ងៃអង្គារ សប្តាហ៍នេះ អ៊ីស្រាអែលមិនទាន់បានឆ្លើយតបអ៊ីរ៉ង់ជាក់ស្តែងក៏ដោយចុះ។ បញ្ហាដ៏ក្តៅមួយនេះ នឹងមិនធ្វើឲ្យឡាវ ដែលជាប្រធានអាស៊ានឆ្នាំនេះ ងាយស្រួលក្នុងការសម្របសម្រួលនោះឡើយ ខណៈបញ្ហាសង្រ្គាមរវាងរុស្ស៊ី និង អ៊ុយក្រែន វាហាក់បីដូចជាស៊ាំទៅហើយនៅពេលនេះ៕
ដោយៈ សរ សុជាតិ
