វិទ្យាស្ថានស្រាវជ្រាវអចលនទ្រព្យ China Index Academy ដែលជាវិទ្យាស្ថានឈានមុខគេមួយនៅប្រទេសចិន បានចេញរបាយការណ៍របស់ខ្លួនកាលពីថ្ងៃសៅរ៍ សប្តាហ៍មុន ដោយបានបង្ហាញថា ការលក់លំនៅឋានថ្មីៗ និងតម្លៃលំនៅឋានដែលមានស្រាប់បានបន្តធ្លាក់ចុះកាលពីខែមករា កន្លងទៅថ្មីៗនេះ។
របាយការណ៍ប្រចាំខែរបស់វិទ្យាសា្ថននេះ បានបង្ហាញថា តម្លៃជាមធ្យមក្នុងមួយម៉ែត្រការ៉េសម្រាប់ទីផ្សារលំនៅឋានដែលមានស្រាប់បានធ្លាក់ចុះជាង៧% កាលពីខែមករា បើធៀបនឹងរយៈពេលដូចគ្នាកាលពីឆ្នាំ២០២៤ ដោយផ្អែកការស្ទង់មតិទីផ្សារនៅក្នុងទីក្រុងកំពូលៗទាំង១០០របស់ប្រទេសចិន។ ចំណែកទំហំនៃការលក់អចលនទ្រព្យរបស់ក្រុមហ៊ុនអភិវឌ្ឍន៍អចលនទ្រព្យក្នុងទីក្រុងទាំងនេះ ក៏បានធ្លាក់ចុះប្រមាណ១៧% ផងដែរ។
ទីផ្សារលំនៅឋានរបស់ប្រទេសចិន ដែលធ្លាប់បានជួយសេដ្ឋកិច្ចចិន ឱ្យឈានដល់កម្រិតកំពូលកាលពីឆ្នាំ២០២១ នោះ ពេលនេះបានក្លាយជាវិបត្តិដ៏ធំមួយនៅក្នុងការទាញទម្លាក់សេដ្ឋកិច្ចរបស់ចិន និងជាមូលហេតុបង្កក្ដីបារម្ភដ៏ចម្បងមួយសម្រាប់គ្រួសារ អ្នកវិនិយោគ និងអ្នកបង្កើតគោលនយោបាយចិន។
នៅក្នុងឆ្នាំ២០២៤ កន្លងទៅ រដ្ឋាភិបាលកណ្តាល និងមូលដ្ឋានរបស់ចិន បានបង្កើនកិច្ចខិតខំប្រឹងប្រែង ដើម្បីបង្កើនមនោសញ្ចេតនា និងលើកកម្ពស់ការទិញផ្ទះថ្មីតាមរយៈវិធានការជាច្រើនរួមទាំងការឧបត្ថម្ភធនសម្រាប់អ្នកប្រើប្រាស់ និងការផ្តល់ហិរញ្ញប្បទានសម្រាប់សហគ្រាសរដ្ឋទៀតផង។ ជាមួយគ្នានេះ ក្រុមអ្នកវិភាគជឿជាក់ថា ការលក់ និងតម្លៃអចលនទ្រព្យនៅក្នុងប្រទេសចិននឹងធ្លាក់ចុះបន្ថែមទៀតនៅឆ្នាំ២០២៥ នេះ ប៉ុន្តែក្នុងល្បឿនយឺតជាងនៅឆ្នាំ២០២៤៕
អត្ថបទ៖ សុខ មង្គល
