តើ TVET រួមចំណែកសំខាន់យ៉ាងណាក្នុងការកាត់បន្ថយភាពក្រីក្រ និងជំរុញកំណើនសេដ្ឋកិច្ចកម្ពុជា?

ដើម្បីចូលរួមលើកស្ទួយវិស័យនេះ ឲ្យកាន់តែរីកចម្រើន រាជរដ្ឋាភិបាលកម្ពុជា បាននិងកំពុងផ្ដោតការយកចិត្តទុកដាក់យ៉ាងខ្លាំងលើគ្រប់វិស័យ ជាពិសេសការអភិវឌ្ឍ​វិស័យការងារ ជំរុញវិស័យអប់រំបច្ចេកទេស និងវិជ្ជាជីវៈ ឲ្យឆ្លើយតបនឹងតម្រូវការទីផ្សារការងារ។

ថ្លែងក្នុងពិធីបើកការប្រកួតប្រជែងជំ​នាញថ្នាក់ជាតិលើកទី៨ នៅថ្ងៃទី២៤ ខែតុលា ឆ្នាំ២០២២ ឯកឧត្តម ពេជ សោភ័ន រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការប្រចាំការនៃក្រសួងការងារ និងបណ្ដុះបណ្ដាលវិជ្ជាជីវៈ បានគូសបញ្ជាក់ថា ការអប់រំបណ្ដុះបណ្ដាលបច្ចេកទេស និងវិជ្ជាជីវៈ ឬហៅកាត់ថា TVET គឺជាសសរស្ដម្ភដ៏ចាំបាច់ ក្នុងការកសាងនិងអភិវឌ្ឍធនធានមនុស្សដែលជាមូលដ្ឋានក្នុងការអភិវឌ្ឍន៍សេដ្ឋកិច្ចជាតិ។ ឯកឧត្តម ពេជ សោភ័ន បានគូសបញ្ជាក់ទៀតថា រាជរដ្ឋាភិបាល បានចាត់ទុក TVET គឺជាផ្នែកមួយ ដែលបានចូលរួមគាំទ្រក្នុងការកាត់​បន្ថយភាពក្រីក្រ និងជំរុញកំណើនសេដ្ឋកិច្ច បានឆាប់រហ័សជាងវិស័យដទៃ។ ការអះអាងបែបនេះ ដោយសារឯកឧត្តមមើលឃើញថា ចំពោះកម្មករដែលគ្មានជំនាញ និងវិជ្ជាជីវៈ ច្បាស់លាស់ ប្រសិទ្ធិភាពការងារ និងផលិតភាពការងារ ពិតជាមិនអាចប្រៀបនឹង កម្មករដែលមានជំនាញ និងវិជ្ជាជីវៈនោះទេ ជាពិសេសការទទួលបាននូវអត្ថប្រយោជន៍ពីការងារ។

បច្ចុប្បន្ន កម្ពុជា មានគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈ សរុបជាង១០០។ ក្នុងនោះ គ្រឹះស្ថានអប់រំបណ្ដុះបណ្ដាល​បច្ចេកទេស និងវិជ្ជាជីវៈសាធារណៈមានចំនួន ៣៧។ ខណៈ ក្នុងមួយឆ្នាំៗ គ្រឹះស្ថានបានបណ្ដុះបណ្ដាលបច្ចេកទេស និងវិជ្ជាជីវៈដល់សិក្ខាកាម​ប្រមាណ ៧ម៉ឺននាក់ ដោយសិក្ខាកាមប្រមាណ ៧០%ទៅ៩០% ទទួលបានឱកាសការងារធ្វើបន្ទាប់ពីបញ្ចប់វគ្គបណ្ដុះបណ្ដាល។ នេះបើតាមការគូសបញ្ជាក់របស់ឯកឧត្តម ពេជ សោភ័ន។

សូមបញ្ជាក់ថា ការប្រកួតប្រជែងជំនាញថ្នាក់ជាតិលើកទី៨ ឆ្នាំ២០២២ នឹងប្រព្រឹត្តទៅរយៈពេល ៥ថ្ងៃ ចាប់ពីថ្ងៃទី២៤ ដល់ថ្ងៃទី២៨ ខែតុលា ឆ្នាំ២០២២ ក្នុងបរិវេណសួនអប់រំបណ្ដុះបណ្ដាលបច្ចេកទេស និងវិជ្ជាជីវៈ រាជធានីភ្នំពេញ៕