រដ្ឋមន្ត្រីការពាជាតិរុស្ស៊ីនៅប៉ុន្មានថ្ងៃមកនេះ បានទាក់ទងនិយាយគ្នាតាមទូរស័ព្ទជាមួយអាមេរិក និងសម្ព័ន្ធមិត្តអាមេរិក អំពីស្ថានការណ៍សង្គ្រាមនៅអ៊ុយក្រែន។ ប៉ុន្ដែ ទីក្រុងមូស្គូមិនបានផ្តល់ព័ត៌មានលម្អិតអំពីការសន្ទនានោះទេ ប៉ុន្ដែវាជាលើកដំបូងចាប់តាំងពីខែឧសភាមក ដែលវិមានក្រឹមឡាំងបានបញ្ជាក់ឲ្យដឹងថា រដ្ឋមន្រ្តីការពារជាតិរុស្ស៊ី លោក Sergei Shoigu បានប្រាប់ភាគីអាមេរិក អំពីស្ថានការណ៍សង្គ្រាមនៅអ៊ុយក្រែនកំពុងស្ថិតក្នុងភាពពិបាកគ្រប់គ្រង និងកាន់តែអាក្រក់ទៅៗជាលំដាប់។
ដោយឡែក លោក Sergei Shoigu ក៏បានទាក់ទងទៅរដ្ឋមន្ត្រីការជាតិបារាំង លោក សេបាស្ទៀន លេខូនូ (Sebastien Lecornu) ដោយលោកបាននិយាយថា៖ «ស្ថានការក្នុងសមរភូមិនៅពេលនេះកំពុងងាករកការពង្រីកជម្លោះកាន់តែធំដែលមិនអាចគ្រប់គ្រង់បាន»។ រដ្ឋមន្ត្រីការពារជាតិរុស្ស៊ីរូបនេះ ក៏បាននិយាយទៅកាន់លោក Hulusi Akar រដ្ឋមន្ត្រីការពារជាតិតួកគី និងលោក Ben Wallace រដ្ឋមន្ត្រីការពារជាតិរបស់ចក្រភពអង់គ្លេសថែមទៀតផង។
ក្នុងនោះដែរ លោក Shoigu បានប្រាប់សមភាគីបារាំង ទួរគី និងអង់គ្លេសអំពីការព្រួយបារម្ភរបស់ទីក្រុងមូស្គូថា អ៊ុយក្រែនគ្រោងនឹងប្រើប្រាស់ «គ្រាប់បែកមួយប្រភេទ» ដែលមានផ្ទុកមានសារធាតុវិទ្យុសកកម្មមកលើរុស្ស៊ី តែយ៉ាងណា ម៉ូស្គូមិនបានផ្តល់ភស្តុតាង ដើម្បីបញ្ជាក់ការអះអាងរបស់ខ្លួនថាពិត ឬមិនពិតនោះទេ។
គួរជម្រាបថា កាលពីពេលមុន រុស្ស៊ីបានអះអាងស្រដៀងគ្នានេះថា អ៊ុយក្រែនអាចនឹងងាកទៅរកការប្រើបា្រស់អាវុធហាមឃាត់ ដូចជាអាវុធជីវសាស្រ្តជាដើម តែផ្ទុយទៅវិញពួកលោកខាងលិចមើលឃើញថា វិមានក្រឹមឡាំងបានយកការចោទប្រកាន់ទាំងនោះជាលេស ដើម្បីធ្វើការវាយប្រហារមីស៊ីលមកលើទីក្រុងកៀវតែប៉ុណ្ណោះ។
យោងតាមការបញ្ជាក់របស់មន្ទីរបញ្ចកោណអាមេរិកបានឲ្យដឹងថា ក្នុងអំឡុងពេលជំនួបតាមរយៈទូរស័ព្ទរវាងរដ្ឋមន្ត្រីការពារជាតិអាមេរិក លោក Lloyd Austin និងលោក Shoigu ដោយលោកបាន «ច្រានចោលការលើកឡើងរបស់រុស្ស៊ីថា អ៊ុយក្រេនត្រៀមប្រើគ្រាប់បែកវិទ្យុសកម្ម ដោយថាវាជាលេសទីក្រុងម៉ូស្គូសម្រាប់ការពង្រីកជម្លោះតែប៉ុណ្ណោះ ក៏ប៉ុន្តែលោកបានប្រាប់ឲ្យភាគីរុស្ស៊ីឲ្យរក្សាការទាក់ទងតាមរយៈទូរស័ព្ទជាមួយគ្នាបន្ដទៀតផងដែរ»។
អត្ថបទគួរអាន
ម្យ៉ាងវិញទៀត ប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីថ្ងៃអាទិត្យនោះដែរថា មានតែរុស្ស៊ីទេ ដែលមានសមត្ថភាពប្រើប្រាស់អាវុធនុយក្លេអ៊ែរនៅអឺរ៉ុប ហើយលោកបានជំទាស់យ៉ាងដាច់ខាតទៅនឹងការលើកឡើងរបស់រដ្ឋមន្ត្រីការពារជាតិរុស្ស៊ីដែលថា អ៊ុយក្រែនកំពុងត្រៀមប្រើប្រាស់ «គ្រាប់បែកវិទ្យុសកម្ម» ទៅលើកងទ័ពរុស្ស៊ីនោះ។
មែនទែនទៅ មិនមានការបញ្ជាក់ណាមួយពីភាគីរុស្ស៊ីដែលថា ការសន្ទនាតាមទូរស័ព្ទទទួលលទ្ធផលវិជ្ជមាន ឬក៏យ៉ាងណានោះទេ។ ទោះជាយ៉ាងណាក៏ដោយ គេមើលឃើញថា ប្រទេសរុស្ស៊ី និងប្រទេសសមាជិកនៃសម្ព័ន្ធយោធាណាតូដឹកមុខដោយសហរដ្ឋអាមេរិក បាននិងកំពុងរក្សាបណ្តាញទំនាក់ទំនងគ្នាយ៉ាងសកម្ម ស្របពេលដែលអន្តរជាតិកំពុងមានការព្រួយបារម្ភថា ការគិតខុសណាមួយពីសំណាក់មហារុស្ស៊ី ដែលជាអ្នកក្តោបក្តាប់អាវុធនុយក្លេអ៊ែរច្រើនបំផុតនោះ អាចនឹងឈានទៅរកការប្រើវា នោះសង្គ្រាមលោកលើកទីបីអាចនឹងផ្ទុះឡើងក៏ថាបាន។
បើក្រឡែកទៅមើលស្ថានការណ៍សង្គ្រាមវិញ រុស្ស៊ីនៅតែបន្តបាញ់មីស៊ីល និងយន្តហោះដ្រូនចូលទៅក្នុងទីក្រុង Mykolaiv ភាគខាងត្បូងអ៊ុយក្រែន ដោយបានបំផ្លាញប្លុកផ្ទះល្វែងមួយ ដោយសង្រ្គាមកំពុងមាននិន្នាការឆ្ពោះទៅរក «ការរីករាលដាលកាន់តែខ្លាំងដោយមិនអាចគ្រប់គ្រង់បាន»។
មួយវិញទៀត ក៏មានការវាយប្រហារពីសំណាក់កងទ័ពអ៊ុយក្រែនទៅលើទីក្រុងផលិតកប៉ាល់មួយកន្លែង ដែលមានចម្ងាយ ៣៥ គីឡូម៉ែត្រពីខេត្ត Kherson ដោយបានបង្ខំរុស្ស៊ីជម្លៀសមនុស្សជាង៦ម៉ឺននាក់ចេញពីតំបន់ដែលងាយនឹងត្រូវរងការវាយប្រយុទ្ធគ្នារវាងកងទ័ពម៉ូស្គូ និងកងកម្លាំងអ៊ុយក្រែនក្នុងពេលខាងមុខដ៏ខ្លីនេះ។
កាលពីថ្ងៃអាទិត្យទី២៣តុលា អគ្គសេនាធិការអ៊ុយក្រែនបាននិយាយថា កងការពារប្រឆាំងយន្តហោះចម្បាំងបានបាញ់ទម្លាក់យន្តហោះគ្មានមនុស្សបើករបស់រុស្ស៊ីផលិតដោយអ៊ីរ៉ង់ចំនួន ១២ គ្រឿងក្នុងរយៈពេល២៤ម៉ោងកន្លងមកនេះ។ យ៉ាងណាមិញ ការរុលចូលវាយបករបស់កងទ័ពអ៊ុយក្រែនក្នុងប៉ុន្មានសប្តាហ៍ថ្មីៗនេះនៅជុំវិញទីក្រុង Kherson និងនៅតំបន់ភាគឦសាន្ដរបស់ប្រទេស ក៏ត្រូវបានជួបជាមួយនឹងការវាយប្រហារទប់ទល់ពីសំណាក់កងទ័ពម៉ូស្គូខ្លាំងក្លាវិញផងដែរ៕
