លោក ងួន ឆាយលាង នាយកប្រតិបត្តិក្រុមហ៊ុន Pointer Property កត់សម្គាល់ឃើញថា នៅដើមឆ្នាំនេះ ទីផ្សារខុនដូហាក់មានការកម្រើកឡើងវិញបន្តិច ពោលគឺចរន្តទិញលក់ក្នុងវិស័យនេះមានជាហូរហែលើគម្រោងដែលបានអភិវឌ្ឍន៍រួចកន្លងមក។ ប៉ុន្តែអ្នកជំនាញរូបនេះ អះអាងថា ការទិញលក់ភាគច្រើនធ្វើឡើងក្រោមរូបភាពទិញសម្រាប់រស់នៅ និងបំពេញតម្រូវការជាក់ស្តែង ខណៈសម្រាប់ការវិនិយោគមិនសូវសម្បូរនោះទេ។ តែយ៉ាងណាអ្នកជំនាញរូបនេះជឿជាក់ថា ខុនដូដែលស្ថិតនៅទីតាំងល្អ នៅតែទទួលបានការទិញលក់។
ស្រដៀងគ្នានេះដែរ លោកស្រី អាន សុធីតា នាយិកាគ្រប់គ្រងក្រុមហ៊ុនអចលនទ្រព្យ PropNex សង្កេតឃើញថា ចរន្តទិញលក់ខុនដូនៅដើមឆ្នាំ២០២៤ នេះ នៅតែបន្តកើតមានជាហូរហែចំពោះគម្រោង ដែលស្ថិតនៅតំបន់មានសក្តានុពល និងការរចនាម៉ូដល្អ។ ការទិញលក់ក្នុងវិស័យខុនដូបច្ចុប្បន្នភាគច្រើនធ្វើឡើងក្រោមរូបភាពទិញសម្រាប់ប្រើប្រាស់ផ្ទាល់ខ្លួន ខណៈការទិញជាលក្ខណៈដុំសម្រាប់ទុកវិនិយោគហាក់មិនមានដូចមុននោះទេ។ សម្រាប់អ្នកជំនាញរូបនេះ ការវិនិយោគនៅក្នុងវិស័យខុនដូនៅកម្ពុជាបច្ចុប្បន្ន ក្រុមហ៊ុនអភិវឌ្ឍន៍មិនអាចគិតតែលើតម្លៃនោះទេ ពោលគឺត្រូវគិតទាំងទីតាំង និងការរចនាម៉ូតផងដែរ។
អត្ថបទគួរអាន
ជាមួយគ្នានេះលោក ខន គង្គា អគ្គនាយក្រុមហ៊ុន ERA កម្ពុជាកត់សម្គាល់ឃើញថា នៅជិតមួយត្រីមាសកន្លងមកនេះ ចរន្តទិញលក់ក្នុងវិស័យខុនដូនៅកម្ពុជា ពុំមានការកើនឡើងគួរឱ្យកត់សម្គាល់នោះទេ ពោលគឺការទិញលក់មានចំនួនតិចតួចប៉ុណ្ណោះ ហើយការទិញលក់ភាគច្រើនជាវិនិយោគិនបរទេសដែលមកពីជប៉ុន កូរ៉េ និងចិនជាដើម។ ជាមួយគ្នានេះការវិនិយោគលើគម្រោងថ្មីៗក្នុងវិស័យនេះ ក៏ពុំមានសញ្ញាវិជ្ជមាននោះដែរ។បើតាមការវាយតម្លៃរបស់អ្នកជំនាញរូបនេះ នៅឆ្នាំនេះអាចមានគម្រោងខុនដូថ្មីចន្លោះពី៣ទៅ៤គម្រោងប៉ុណ្ណោះអាចបើកការដ្ឋានសាងសង់។
បើយោងតាមរបាយការណ៍របស់ធនាគារជាតិនៃកម្ពុជា នៅក្នុងឆ្នាំ២០២៣ កន្លងទៅ ទីផ្សារលក់ខុនដូនៅកម្ពុជា មានការកើនឡើងប្រមាណ២% បើធៀបនឹងឆ្នាំ២០២២ ខណៈការលក់លំនៅឋានដូចជាផ្ទះល្វែង វីឡាទោល និងវីឡាភ្លោះធ្លាក់ចុះជិត៥០%។ យ៉ាងណាមិញធនាគារជាតិនៃកម្ពុជា ព្យាករវិស័យសំណង់ និងអចលនទ្រព្យរបស់កម្ពុជា ដែលបានរងផលប៉ះពីវិបត្តិផ្សេងៗនាពេលកន្លងមក នឹងបន្តមានកំណើនទាប៕
None
