![ក្រុមហ៊ុន CPL ចាប់ដៃគ្នា ជាមួយក្រុមហ៊ុនធំ២ អភិវឌ្ឍវិស័យអចលនវត្ថុកម្ពុជា ឆ្ពោះទៅរកទីក្រុងវ័យឆ្លាត](https://cdn.cambonomist.com/media/images/canva-photo-editor_1_maXgaFz.2e16d0ba.fill-960x540.png)
លោកឧកញ៉ា ចេង ខេង ប្រធានក្រុមហ៊ុនអចលនទ្រព្យ CPL បានប្រសាសន៍នៅក្នុងពិធីចុះអនុស្សរណៈនោះថា នេះជាជំហានថ្មីមួយទៀតសម្រាប់ក្រុមហ៊ុន CPL ក្នុងការអភិវឌ្ឍវិស័យអចលនវត្ថុនៅកម្ពុជាឲ្យមានលក្ខណៈជាទីក្រុង វ័យឆ្លាត ឬហៅថា ស្មាតស៊ីធី នាពេលអនាគត។
លោកឧកញ៉ាបានបន្តថា ការសហការជាមួយក្រុមហ៊ុនទាំង២នេះ បានផ្តល់ប្រយោជន៍យ៉ាងច្រើនដល់ក្រុមហ៊ុនលោក ជាពិសេសប្រយោជន៍សម្រាប់ប្រទេសកម្ពុជាទាំងមូល ព្រោះថា ដោយសារតែក្រុមហ៊ុនលោកមានជំនាញតែលើការលក់ និងផ្សព្វផ្សាយគម្រោង ប៉ុន្តែមិនមានជំនាញលើការចេញប្លង់ ឫសាងសង់នោះទេ ហេតុដូចនេះ ក្រុមហ៊ុនទាំង២នេះ នឹងជួយក្រុមហ៊ុនឲ្យ ក្រុមហ៊ុន CPL កាន់តែរឹងមាំថែមទៀត។
![ក្រុមហ៊ុន CPL ចាប់ដៃគ្នា ជាមួយក្រុមហ៊ុនធំ២ អភិវឌ្ឍវិស័យអចលនវត្ថុកម្ពុជា ឆ្ពោះទៅរកទីក្រុងវ័យឆ្លាត](https://cdn.cambonomist.com/media/images/canva-photo-editor_2_3eW33y4.2e16d0ba.fill-960x540.png)
លោក ជីន ស៊ូផាក ប្រធានក្រុមហ៊ុនហានលីមនៃ Korea In World Development &Construction បានឲ្យដឹងថា បានជាលោកជ្រើសរើសក្រុមហ៊ុន CPL ធ្វើជាដៃគូសហការលើការអភិវឌ្ឍវិស័យអចលនទ្រព្យនៅកម្ពុជា ព្រោះលោកមានភាពជឿជាក់យ៉ាងខ្លាំង ទៅលើក្រុមហ៊ុននេះ ដោយសារតែមានប្រព័ន្ធគ្រប់គ្រងការងារ ឈានមុខគេនៅកម្ពុជា ដែលដូចទៅនឹង ប្រព័ន្ធការងាររបស់ក្រុមហ៊ុនផ្សេងៗនៅបរទេសដែរ។
![ក្រុមហ៊ុន CPL ចាប់ដៃគ្នា ជាមួយក្រុមហ៊ុនធំ២ អភិវឌ្ឍវិស័យអចលនវត្ថុកម្ពុជា ឆ្ពោះទៅរកទីក្រុងវ័យឆ្លាត](https://cdn.cambonomist.com/media/images/canva-photo-editor_3_8Vh8jO6.2e16d0ba.fill-960x540.png)
លោក ស៊ូផាក បន្តថា ក្រុមហ៊ុនលោកបានបង្កើតឡើងនៅក្នុងអំឡុងឆ្នាំ ២០០០ ហើយអ្វីដែលជាជំនាញស្នូលរបស់ក្រុមហ៊ុនលោក គឺការសាងសង់ ដូចនេះនៅពេលក្រុមហ៊ុនសហការជាមួយក្រុមហ៊ុន CPL ដែលជាក្រុមហ៊ុនជំនាញលើការលក់ និងផ្សព្វផ្សាយគម្រោងបែបនេះ ភាពរីកចម្រើននិង ការអភិវឌ្ឍគម្រោងនានាកាន់តែរហ័ស និងមានប្រសិទ្ធភាពថែមទៀត។
ចំណែកឯលោក ជា ប៊ុនសៀង ជានាយកប្រតិបត្តិ និងជាប្រធានស្ថាបត្យករនៃក្រុមហ៊ុន HBAAវិញ ក៏បានឲ្យដឹងដែរថា ដោយសារតែក្រុមហ៊ុនរបស់លោកមានជំនាញផ្នែកស្ថាបត្យកម្ម ដូច្នេះការចាប់ដៃគ្នាសហការជាមួយក្រុមហ៊ុន សាងសង់លីមនៃ Korea In World Development &Construction និងក្រុមហ៊ុនផ្សព្វផ្សាយ និងលក់ CPL ពិតជាការសហការមួយដ៏ល្អបំផុត ដើម្បីជួយឲ្យវិស័យអចលវត្ថុកម្ពុជា រីកចម្រើនកាន់តែឆាប់រហ័ស ដូចទៅនឹងបណ្តាប្រទេសមួយចំនួនទៀតនៅក្នុងតំបន់អាស៊ីដែរ។
បើតាមលោកឧកញ៉ា ចេង ខេង ក្រោយពីការចុះអនុស្សរណៈនេះហើយ គម្រោងអភិវឌ្ឍដំបូងដែលក្រុមហ៊ុនលោក និងក្រុមហ៊ុនទាំង២ នឹងសិក្សាទៅលើនោះ អាចជាការសាងសង់អគារខ្ពស់ៗ
ជាប្រភេទខុនដូ ឫអគារពាណិជ្ជកម្មជាដើម៕