ជាមួយគ្នានេះ អ្នកជំនាញជឿជាក់ថា រាជរដ្ឋាភិបាលកម្ពុជានឹងមានវិធានការច្បាស់លាស់ក្នុងការទប់ស្កាត់មេរោគបំប្លែងខ្លួនអូមីក្រុងនេះ និងស្នើឲ្យរាជរដ្ឋាភិបាលបិទជើងហោះហើរពីគោលដៅប្រទេសមួយចំនួនដែលកំពុងមានការផ្ទុះមេរោគបំប្លែងខ្លួននេះ បើពុំដូច្នេះទេ វិស័យទេសចរណ៍អាចប្រឈមនឹងការខាតបង់សាជាថ្មី ប្រសិនបើមេរោគបំប្លែងថ្មីអូមីក្រុងចូលមកអុកឡុកនៅកម្ពុជា។
ស្របពេលវិស័យទេសចរណ៍កម្ពុជាជាពិសេសទេសចរណ៍ផ្ទៃក្នុងចាប់ផ្តើមកំរើកឡើងវិញសន្សឹមៗបន្ទាប់ពីរាជរដ្ឋាភិបាលកម្ពុជាប្រកាសបើកប្រទេសឡើងវិញ និងលើកលែងការធ្វើចត្តាឡីស័កចំពោះអ្នកដំណើរចូលមកកម្ពុជា ដែលបានចាក់វ៉ាក់សាំងកូវីដ-១៩ រួចមិនបានប៉ុន្មានផង ស្រាប់តែមានវត្តមានមេរោគកូវីដ-១៩ បំប្លែងខ្លួនថ្មីអូមីក្រុងមួយបន្ថែមទៀត ដែលកំពុងបង្កក្តីបារម្ភជាថ្មីដល់ពិភពលោកទាំងមូលរួមទាំងកម្ពុជាផងដែរ។
ពាក់ព័ន្ធមេរោគកូវីដ-១៩បំប្លែងថ្មីអូមីក្រុងនេះលោក ធួន ស៊ីណាន ប្រធានសមាគមទីភ្នាក់ងារទេសចរណ៍អាស៊ីប៉ាស៊ីហ្វិកកម្ពុជា ដែលបានតាមដានយ៉ាងយកចិត្តទុកដាក់លើបញ្ហានេះ ហើយលោកបានចាត់ទុកមេរោគបំប្លែងថ្មីនេះថា ជាការគំរាមកំហែងថ្មីមួយទៀត សម្រាប់វិស័យទេសចរណ៍កម្ពុជា ដែលរំពឹងនឹងមានកំណើនខ្ពស់នៅចុងឆ្នាំ២០២១ ឬដើមឆ្នាំ២០២២ ខាងមុខ។
អត្ថបទទាក់ទង
ទោះបីមេរោគនេះ មិនទាន់មានវត្តមាននៅកម្ពុជាក៏ដោយ តែអ្នកជំនាញបារម្ភថា វត្តមានរបស់អូមីក្រុងនៅតាមប្រទេសមួយចំនួនចង់មិនចង់ នឹងជះឥទ្ធិពលមិនល្អដល់ផែនការស្តារវិស័យទេសចរណ៍ និងទទួលភ្ញៀវទេសចរបរទេស ដែលបាននចាក់វ៉ាក់សាំងរួចរបស់កម្ពុជា។ ទោះយ៉ាងណា លោក ធួន ស៊ីណាន ជឿជាក់ថា រាជរដ្ឋាភិបាលនឹងមានវិធានការច្បាស់លាស់ក្នុងការទប់ស្កាត់មេរោគបំប្លែងខ្លួនថ្មីនេះមិនឲ្យចូលមកកម្ពុជា តាមរយៈការបិទជើងហោះហើរពីប្រទេសមួយចំនួន ដែលមានការផ្ទុះមេរោគបំប្លែងថ្មីនេះ។
លោកជំទាវ ឆាយ ស៊ីលីន ប្រធានសមាគមទេសចរណ៍កម្ពុជាក៏បានបង្ហាញក្តីបារម្ភចំពោះឥទ្ធិពលនៃមេរោគបំប្លែងខ្លួនថ្មីអូមីក្រុងក្នុងការធ្វើឲ្យប៉ះពាល់ដល់វិស័យទេសចរណ៍កម្ពុជាផងដែរ។ អ្នកជំនាញរូបនេះ បានគូសបញ្ជាក់ថា មេរោគបំប្លែងខ្លួនថ្មីនេះនឹងក្លាយជាឧបសគ្គថ្មីមួយបន្ថែមទៀត សម្រាប់គម្រោងបើកទទួលភ្ញៀវទេសចរបរទេស ដែលបានចាក់វ៉ាក់សាំងកូវីដ-១៩ រួចរបស់កម្ពុជា ប្រសិនបើកមេរោគនេះមានវត្តមាននៅកម្ពុជា និងប្រទេសក្នុងតំបន់អាស៊ាន។
ប្រធានសមាគមទេសចរណ៍រូបនេះ វាយតម្លៃថា ប្រតិបត្តិករទេសចរណ៍អាចប្រឈមនឹងការខាតបង់កាន់តែធ្ងន់ធ្ងរប្រសិនបើមេរោគបំប្លែងថ្មីនេះ ធ្វើឲ្យរាំងស្ទះដល់ការធ្វើដំណើររបស់ភ្ញៀវទេសចរបរទេស ដែលមានបំណងចូលមកកម្ពុជា។ ខាតបង់ ក៏ដោយតែប្រត្តិករបានចំណាយថវិកាយ៉ាងច្រើនលើការរៀបចំហេដ្ឋារចនាសម្ព័ន្ធ និងកន្លែងរកស៊ីរបស់ពួកគេឡើងវិញ ដើម្បីត្រៀមទទួលភ្ញៀវទេសចរបរទេស ដែលបានចាក់វ៉ាក់សាំងរួច ដែលរំពឹងមានកំណើនខ្ពស់នៅចុងឆ្នាំ២០២១ ឬដើមឆ្នាំ២០២២ខាងមុខ។
គួរបញ្ជាក់ថា មេរោគកូវីដ-១៩ បំប្លែងខ្លួនថ្មីអូមីក្រុងត្រូវបានរកឃើញមានប្រភពចេញពីប្រទេសអាហ្វ្រិក ហើយបច្ចុប្បន្នមេរោគនេះកំពុងមានវត្តមាននៅតាមបណ្តាប្រទេសមួយចំនួនលើពិភពលោក។ តាមរយៈវត្តមានរបស់មេរោគបំប្លែងខ្លួនថ្មីនេះ ប្រទេសមួយចំនួនលើពិភពលោកបានរឹតបន្តឹងវិធានការ និងបិទការហោះហើរពីប្រទេសមានហានិភ័យមួយចំនួន។ ជាក់ស្តែងប្រទេសមួយចំនួននៅតំបន់អាស៊ានមានដូចជាហ្វីលីពីន ឥណ្ឌូណេស៊ី ថៃ និងសិង្ហបុរីជាដើម ក៏បានបិទជើងហោះពីប្រទេសអាហ្វ្រិក និងប្រទេសអឺរ៉ុបមួយចំនួន ដើម្បីទប់ស្កាត់មេរោគបំប្លែងខ្លួនថ្មីនេះផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
