អតីតនិស្សិតបញ្ចប់ការសិក្សានៅប្រទេសជប៉ុន និងជាអតីតប្រធានសាខាធនាគារធំមួយនៅភ្នំពេញរូបនេះ បានបង្កើតក្រុមហ៊ុនដោយខ្លួនឯង និងបានហែលឆ្លងឧបសគ្គជាច្រើន រហូតទទួលបានជោគជ័យ ដោយមានដៃគូសហការទាំងជាតិនិងអន្តរជាតិ និងទទួលបានអតិថិជនពីក្រុមហ៊ុនក្នុងស្រុក និងក្រុមហ៊ុនបរទេសដទៃទៀតដូចជា៖ សិង្ហបុរី ម៉ាឡេស៊ី ហ្វីលីពីន ឥណ្ឌា និងអូស្រ្តាលី ជាដើម។
បើតាម លោក លន់ បូរី ការបង្កើតក្រុមហ៊ុន 3G Agent នេះ គឺដើម្បីជួយអភិវឌ្ឍធនធានមនុស្សនៅកម្ពុជា ដែលលោកអះអាងថា គុណភាពធនធានមនុស្សនៅកម្ពុជា នៅចាញ់ប្រទេសអភិវឌ្ឍន៍មួយចំនួនក្នុងតំបន់។
លោកពន្យល់ថា៖ «គ្រប់ក្រុមហ៊ុនទាំងអស់ គឺតែងតែមានការពិបាកក្នុងការជ្រើសរើសបុគ្គលិកល្អ និងតែងតែមានបញ្ហាដែលកើតពីបុគ្គលិក។ បុគ្គលិកខ្លះ ធ្វើការ៦ខែទើបអាចមានផលិតភាពដល់ក្រុមហ៊ុន ខណៈបុគ្គលិកពូកែខ្លះ រត់ចេញពីក្រុមហ៊ុន ដែលទាំងនេះ សុទ្ធសឹងជាបញ្ហា។ ដូច្នេះ ខ្ញុំចង់យកចំណេះ ជំនាញ និងបទពិសោធន៍ការងារជិត២០ឆ្នាំរបស់ខ្ញុំ ជួយម្ចាស់ក្រុមហ៊ុនឲ្យទទួលបានបុគ្គលិកដែលជាទ្រព្យរបស់ក្រុមហ៊ុន»។
តើអ្នកបានអានអត្ថបទនេះ ឬនៅ?
តើលក្ខណសម្បត្តិបុគ្គលិកដូចម្តេច ដែលក្រុមហ៊ុនមិនគួរមើលរំលង?
បុគ្គលិក គឺជាបេះដូងរបស់ក្រុមហ៊ុន ដែលតម្រូវឲ្យប្រធានក្រុមហ៊ុនត្រូវជ្រើសរើសដោយប្រុងប្រយ័ត្ន ដើម្បីទទួលបានបុគ្គលិកល្អ មកបម្រើការងារជំរុញការអភិវឌ្ឍក្រុមហ៊ុន។ លោក លន់ បូរី បានបង្ហើបគន្លឹះចំនួនពីរ ដើម្បីជ្រើសរើសបុគ្គលិកថ្នាក់ក្រោមប្រកបដោយគុណភាពនិងមានប្រសិទ្ធភាព។
លោកបញ្ជាក់យ៉ាងដូច្នេះថា៖ «បុគ្គលិកថ្នាក់ក្រោម គឺគួរតែជ្រើសរើសបុគ្គលិកដែលមានអាកប្បកិរិយា និងចរិតលក្ខណៈល្អរបស់គាត់ ពីព្រោះ បទពិសោធន៍ការងារ យើងអាចបណ្តុះបណ្តាលបានទេ ផ្ទុយទៅវិញ សម្រាប់អាកប្បកិរិយា និងអត្តចរិតល្អ យើងបណ្តុះបណ្តាលអត់បានទេ ដោយសារវាកើតឡើងតាំងពីសង្គមគ្រួសារ ការអប់រំ និងបទពិសោធន៍សព្វបែបសព្វយ៉ាង។ ដូច្នេះ បើគាត់មានបញ្ហា គឺធ្វើឲ្យមានបញ្ហាដល់ក្រុមហ៊ុនទាំងមូល។ មួយទៀត គឺត្រូវជ្រើសរើសមនុស្សដែលមានស្មារតីធ្វើការងារជាក្រុម»។
លោកបន្ថែមថា ការជ្រើសរើសបុគ្គលិក គេចែកជា៣ប្រភេទ គឺបុគ្គលិកថ្នាក់ក្រោម ថ្នាក់កណ្តាល និងថ្នាក់ខ្ពស់។ លោកពន្យល់ថា បុគ្គលិកថ្នាក់ក្រោម គឺត្រូវផ្តោតសំខាន់លើអត្តចរិត និងការងារក្រុម ហើយបុគ្គលិកថ្នាក់កណ្តាល គួរតែជ្រើសរើសមនុស្សដែលយល់ច្បាស់ពីការងារ និងមានទំនួលខុសត្រូវខ្ពស់ ខណៈបុគ្គលិកថ្នាក់ខ្ពស់ ដែលមានភាពចាស់ទុំ មានជំនាញ និងចំណេះដឹងច្បាស់លាស់ហើយនោះ គួរជ្រើសរើសមនុស្សដែលពូកែរៀបចំផែនការតាមវិស័យរបស់ខ្លួន និងមានលទ្ធភាពដាក់គោលដៅថ្មីៗនៅក្នុងទីផ្សារ ដែលអាចធ្វើឲ្យមានលទ្ធផលល្អសម្រាប់ការអភិវឌ្ឍក្រុមហ៊ុន៕
None
