ឃ្លាំងស្បៀងរបស់ UN ត្រូវប្រជាជននៅហ្កាហ្សារាប់ពាន់នាក់សម្រុកចូលលួច

យោងតាមទីភ្នាក់ងារជំនួយរបស់អង្គការសហប្រជាជាតិ សម្រាប់ប៉ាឡេស្ទីន (Unrwa) បានឱ្យដឹងកាលពីថ្ងៃអាទិត្យថា ឃ្លាំងផ្ទុកស្បៀងរួមមានម្សៅ និងសាប៊ូ ត្រូវបានលួច និងខូចខាត។ យោងតាមទីភ្នាក់ងារនេះ ឃ្លាំងជំនួយធំបំផុតទីពីររបស់ខ្លួន ដែលមានទីតាំងនៅភាគកណ្តាលតំបន់ Gaza ត្រូវបានប្រជាជនសម្រុកចូលលួចកាលពីថ្ងៃសៅរ៍ ខណៈឃ្លាំងនេះ គឺកាន់កាប់ភាគច្រើន នៃជំនួយមនុស្សធម៌ដែលផ្តល់ដោយអង្គការសហប្រជាជាតិ ចាប់តាំងពីដើមដំបូងនៃការផ្ទុះសង្គ្រាម។

បើតាមវីដេអូ និងរូបភាពដែលគេថតបាន មនុស្សបាននាំគ្នាប្រមូលយកម្សៅ ស្រូវសាលី និងឧបករណ៍អនាម័យរួមទាំងរបស់របរប្រើប្រាស់ផ្សេងៗទៀត។ ក្រៅពីនេះ កន្លែងស្តុកជំនួយជាច្រើនផ្សេងទៀតនៅកណ្តាល និងភាគខាងត្បូងនៃតំបន់ហ្កាហ្សា ក៏ត្រូវបានពលរដ្ឋនៅតំបន់នោះចូលលួចដូចគ្នាដែរ។

បើតាមអ្នកនាំពាក្យជាន់ខ្ពស់របស់កម្មវិធីស្បៀងអាហារពិភពលោករបស់អង្គការសហប្រជាជាតិ (WFP) លោកស្រី Abeer Etefa បានប្រាប់កាសែត BBC ថា ការឆ្មក់ចូលលួចស្បៀង និងរបស់របរប្រើប្រាស់ក្នុងឃ្លាំងទាំងនោះ គឺដោយសារតែប្រជាជននៅតំបន់ហ្កាហ្សា អស់សង្ឃឹម និងកំពុងប្រឈមនឹងភាពអត់ឃ្លានមែនទែនហើយ។

ជាមួយគ្នានោះ អ្នកដែលលួចពីឃ្លាំងជំនួយខ្លះបានប្រាប់ទីភ្នាក់ងារបារាំង AFPថា ពួកគេធ្វើនេះដោយបង្ខំចិត្ត ព្រោះពួកគេគ្មានម្សៅ គ្មានជំនួយ គ្មានទឹក សូម្បីតែបង្គន់អនាម័យក៏លែងមានដែរ។ បើតាមអ្នករស់នៅហ្កាហ្សាខ្លះទៀតឱ្យដឹងថា មានជំនួយតិចតួចបំផុត រួមទាំងប្រេងឥន្ធនៈត្រូវបានអនុញ្ញាតឱ្យដឹកចូលទៅក្នុងតំបន់ហ្គាហ្សា ចាប់តាំងពីសង្គ្រាមផ្ទុះឡើងមក។ ខណៈអ៊ីស្រាអែល ដាក់ការសង្ស័យថា ជំនួយមនុស្សធម៌ទាំងនោះត្រូវបានយកទៅប្រើប្រាស់ដោយក្រុមហាម៉ាស​។

យ៉ាងណមិញ អ៊ីស្រាអែល កាលពីថ្ងៃអាទិត្យថា ខ្លួននឹងអនុញ្ញាតឱ្យមានជំនួយបន្ថែមទៀតចូលទៅក្នុងហ្កាហ្សានៅប៉ុន្មានថ្ងៃខាងមុខនេះតាមរយៈច្រកព្រំដែនជាមួយអេហ្ស៊ីប។

ស្របពេលជាមួយគ្នានេះ ព្រះរាជអាជ្ញានៃតុលាការឧក្រិដ្ឋកម្មអន្តរជាតិ លោក ខារីម ខាន់ (Karim Khan) ទៅមើលច្រកព្រំដែនរ៉ាហ្វា( Rafah) រវាងប្រទេសអេហ្ស៊ីប និងតំបន់ហ្កាហ្សា និងបាននិយាយថា តុលាការ ICC កំពុងស៊ើបអង្កេតយ៉ាងសកម្មទៅលើការសម្លាប់រង្គាលរបស់ក្រុមហាម៉ាស់ កាលពីថ្ងៃទី៧ ខែតុលា ក៏ដូចជាស្ថានភាពនៅក្នុងតំបន់ហ្កាហ្សា និងនៅ West Bank។ លោក ខារីម ក៏បានព្រមានផងដែរថា ការទប់ស្កាត់ការផ្តល់ជំនួយមនុស្សធម៌ណាមួយចូលទៅកាន់តំបន់នេះអាចចាត់ទុកជាឧក្រិដ្ឋកម្មសង្គ្រាម។

នៅសហរដ្ឋអាម៉េរិក ឯណោះវិញ ប្រធានាធិបតីលោក ចូ បៃដិន បានប្រាប់នាយករដ្ឋមន្ត្រីអ៊ីស្រាអែលលោក បេនចាមីន នេតាន់យ៉ាហ៊ូ ក្នុងជំនួបតាមទូរសព្ទមួយកាលពីថ្ងៃអាទិត្យថា អ៊ីស្រាអែល មានសិទ្ធិការពារខ្លួន តែគួរតែធ្វើដោយអនុលោមស្របតាមច្បាប់អន្តរជាតិ ស្តីពីការការពារជនស៊ីវិល។

សេតវិមានក៏បានឱ្យដឹងដែរថា លោក បៃដិន បានអំពាវនាវឱ្យមានការបង្កើនជំនួយមនុស្សធម៌ជាបន្ទាន់បន្ថែមទៀត ដើម្បីបំពេញតម្រូវការរបស់ជនស៊ីវិលនៅក្នុងតំបន់ហ្គាហ្សា។ គិតមកទល់នឹងពេលនេះ យោងតាមអាជ្ញាធរប៉ាឡេស្ទីននៅហ្កាហ្សា មានមនុស្សជាង៨ពាន់នាក់ហើយបានស្លាប់នៅក្នុងការវាយប្រហារតាមអាកាសបីសប្តាហ៍មកនេះរបស់អ៊ីស្រាអែល៕