គេនៅចាំបានថា កាលពីឆ្នាំ២០១៩ អំឡុងពេលដែលលោកដូណាល់ត្រាំ នៅជាប្រធានាធិបតីអាមេរិក រដ្ឋបាលលោកត្រាំ បានចោទប្រកាន់ក្រុមហ៊ុន Huawei នេះថា បានគំរាមកំហែងដល់សន្ដិសុខជាតិរបស់អាមេរិក និងបានដាក់ក្រុមហ៊ុននេះ ចូលក្នុងបញ្ជីខ្មៅរបស់អាមេរិក និងហាមក្រុមហ៊ុនអាមេរិកនានាមិនឲ្យរកស៊ីជាមួយក្រុមហ៊ុននេះផងដែរ។ ទណ្ឌកម្មណេះ គឺដូចជាអាមេរិកបានកាច់ចង្គោមខ្លារបស់ Huawei ចោលអញ្ចឹងដែរ ដោយវាបានធ្វើឲ្យប៉ះពាល់យ៉ាងខ្លាំង ដល់សមត្ថភាពក្នុងការផលិតបន្ទះឈីបដោយខ្លួនឯងរបស់ក្រុមហ៊ុនចិន Huawei និងសមាសធាតុវត្ថុធាតុដើមដែលប្រមូលទិញពីដៃគូខាងក្រៅ។
លោក ហ្គូភីង (Guo Ping ) ប្រធានក្រុមហ៊ុន Huawei បាននិយាយថា ដូចគ្រប់គ្នាដឹងហើយថា បន្ទះឈីបទូរស័ព្ទ ត្រូវការបច្ចេកវិទ្យាខ្ពស់ក្នុងការផលិត ជាមួយនឹងការប្រើប្រាស់មានតិច។ ក្រុមហ៊ុន Huawei អាចបង្កើតវាបាន ប៉ុន្ដែ មិនមានដៃគូណាមួយជួយក្នុងការបង្កើតវានោះទេ ដូច្នេះហើយទើបក្រុមហ៊ុន Huawei ស្ថិតក្នុងស្ថានភាពជាប់គាំងក្នុងការផលិតឧបករណ៍នេះ។
ទោះយ៉ាងណា ប្រធានក្រុមហ៊ុន Huawei រូបនេះ អះអាងថា ក្រុមហ៊ុនរបស់ខ្លួននឹងបន្ដជំនះប្រតិបត្តិការអាជីវកម្មនៅក្នុងការប្រកួតប្រជែងទីផ្សារស្មាតហ្វូន ហើយបន្ដអភិវឌ្ឍផលិតកម្មបន្ទះឈីបរបស់ខ្លួនឯងឲ្យបាន ដើម្បីឈានទៅដណ្ដើមយកតំណែងកំពូលក្រុមហ៊ុនស្មាតហ្វូនក្នុងពិភពលោកត្រឡប់មកវិញ។
អត្ថបទគួរអាន
តាំងពីមានការដាក់ទណ្ឌកម្មពីសំណាក់សហរដ្ឋអាមេរិកមក ក្រុមហ៊ុន Huawei ដែលធ្លាប់ឈរតំណែងជាម៉ាកទូរស័ព្ទស្មាតហ្វូនលក់ដាច់ជាងគេបំផុត បានរបូតតំណែងរបស់ខ្លួន ដោយមកឈរនៅលំដាប់លេខ៥វិញក្នុងចំណោមទូរស័ព្ទលក់ដាច់ជាងគេនៅក្នុងប្រទេសចិន ដែលវាគឺជាលើកទី១ហើយ ក្នុងរយៈពេល៧ឆ្នាំ ដែលក្រុមហ៊ុនយក្សរបស់ចិនមួយនេះ បានធ្លាក់ចុះមកនៅលំដាប់ទាបដល់លេខ៥បែបនេះ។ នេះយោងតាមការស្រាវជ្រាវមួយរបស់ក្រុមហ៊ុនអន្តរជាតិ Canalys។
នៅក្នុងខែវិច្ឆិកា ឆ្នាំ២០២០ ក្រុមហ៊ុន Huawei បានលក់ក្រុមហ៊ុនម៉ាកទូរស័ព្ទ Honor របស់ខ្លួន ដើម្បីរក្សាអាជីវកម្មឲ្យបន្ដរស់បានក្រោយពីការលក់មានការធ្លាក់ចុះខ្លាំង។
នៅពាក់កណ្ដាលឆ្នាំ២០២១ ចំណូលដុលរបស់ក្រុមហ៊ុន Huawei បានដាំក្បាលចុះ ២៩% ដែលជាការធ្លាក់ចុះខ្លាំងបំផុតមិនធ្លាប់មាន។ ប្រាក់ចំណូលទាំងនេះ គឺបានមកពីអាជីវកម្មជាច្រើនផ្សេងៗគ្នារបស់ក្រុមហ៊ុននេះ ដោយក្នុងនោះ ចំណូលពីការលក់ទូរស័ព្ទស្មាតហ្វូនបានធ្លាក់ចុះ ៤៧% មកនៅត្រឹមប្រមាណ ២១ពាន់លានដុល្លារអាមេរិកប៉ុណ្ណោះ៕
None
