ឯកឧត្តម ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្មបានបញ្ជាក់ប្រាប់ខេមបូណូមីសថា ជាចេតនារបស់ កម្ពុជា គឺចង់បង្កើតកិច្ចព្រមព្រៀងពាណិជ្ជកម្មសេរីទ្វេភាគីជាមួយ ជប៉ុន ដែលជាបងធំសេដ្ឋកិច្ចមួយនៅតំបន់អាស៊ី និងជាដៃគូពាណិជ្ជកម្មដ៏ធំមួយផងដែររបស់កម្ពុជា។ ក្រោយពេលគោលបំណងនេះ អាចសម្រេចបានមែននោះ ជប៉ុននឹងក្លាយជាគោលដៅបន្ទាប់ពីចិន និងកូរ៉េដែលអាចមានកិច្ចព្រមព្រៀងនេះជាមួយកម្ពុជា ខណៈដែលបច្ចុប្បន្នកម្ពុជាក៏កំពុងសិក្សាពីលទ្ធភាពចុះកិច្ចព្រមព្រៀងពាណិជ្ជកម្មសេរីជាមួយនឹងប្រទេសឥណ្ឌាផងដែរ។
អ្នកនាំពាក្យឆ្លាស់វេនក្រសួងពាណិជ្ជកម្ម ឯកឧត្តម ប៉ែន សុវិជាតិបានអះអាងថា កិច្ចការងារនេះគ្រាន់តែជាគោលដៅរបស់កម្ពុជាតែប៉ុណ្ណោះ ខណៈបច្ចុប្បន្នទាំងភាគីកម្ពុជា និងជប៉ុនមិនទាន់ឈានដល់ការសិក្សាលទ្ធភាពកម្រិតបឋមនៅឡើយទេ។ ឯកឧត្តម បានបន្ថែមថា ជានីតិវិធីមុនឈានដល់ការចុះហត្ថលេខាលើកិច្ចព្រមព្រៀង ភាគីទាំងពីរ ត្រូវឆ្លងកាត់ការសិក្សាលទ្ធភាពកម្រិតបឋម និងវាយតម្លៃលទ្ធផលនៃការសិក្សាជាមុនសិន មុនឈានដល់ការរៀបចំនីតិវិធីផ្ទៃក្នុងផ្សេងៗ។
អត្ថបទទាក់ទង
គិតមកទល់ពេលនេះ កម្ពុជាបានចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគីជាមួយចិនរួចរាល់ហើយ ខណៈដែលការចុះហត្ថលេខាជាមួយនឹងកូរ៉េខាងត្បូងធ្លាប់គ្រោងធ្វើឡើងនៅពាក់កណ្ដាលឆ្នាំ២០២១ ប៉ុន្ដែ ត្រូវអូសបន្លាយពេលមកទល់ពេលនេះ នៅមិនទាន់បានចុះហត្ថលេខានៅឡើយទេ ដោយសារតែបញ្ហារំខានពីមេរោគរាតត្បាតកូវីដ-១៩។ សម្រាប់កិច្ចព្រមព្រៀងពាណិជ្ជកម្មសេរីកម្ពុជា-ចិនដែលបានចុះហត្ថលេខារួចហើយនោះ គ្រោងចូលជាធរមាននៅដើមឆ្នាំ២០២២ ខាងមុខនេះ។
បើតាមរបាយការណ៍របស់អង្គការពាណិជ្ជកម្ម Jetro របស់ជប៉ុន នៅឆមាសទី១ឆ្នាំ២០២១ ទំហំពាណិជ្ជកម្មកម្ពុជា-ជប៉ុនសម្រេចបានជាង១ពាន់លានដុល្លារអាមេរិកកើនឡើងជិត១០% បើធៀបនឹងឆមាសទី១កាលពីឆ្នាំ២០២០ ដែលមានប្រមាណ១ពាន់លានដុល្លារអាមេរិក។ ក្នុងនោះការនាំចេញទំនិញរបស់កម្ពុជាទៅជប៉ុននៅឆមាសទី១សម្រេចបានជាង៨រយលានដុល្លារ កើនឡើងជិត៣% ខណៈការនាំចូលពីជប៉ុនមកកម្ពុជាមានទឹកប្រាក់ជិត៣រយលានដុល្លារ កើនឡើង៣៥% បើធៀបនឹងឆមាសទី១កាលពីឆ្នាំមុន៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
