ការកាត់បន្ថយបុគ្គលិកនេះ នឹងប៉ះពាល់ដល់ក្រុមហ៊ុនបុត្រសម្ព័ន្ធរបស់ Huawei ដែលមានឈ្មោះថា Future Wei Technologies ដែលមានជំនាញផ្នែកស្រាវជ្រាវ និងអភិវឌ្ឍន៍ ហើយបច្ចុប្បន្នមានបុគ្គលិកបម្រើការជាង ៨៥០នាក់។
យ៉ាងណាមិញ បុគ្គលិកជនជាតិចិនរបស់ Huawei ដែលបម្រើការនៅក្នុងសហរដ្ឋអាមេរិក ត្រូវបានផ្តល់ជម្រើសឲ្យត្រលប់មកធ្វើការនៅក្នុងប្រទេសដើមកំណើតវិញ ឬការបន្តធ្វើការនៅទីនោះ។
បុគ្គលិកមួយចំនួន ត្រូវបានគេផ្តល់ដំណឹងរួចទៅហើយ ពីការបញ្ចប់ការងារ ខណៈដែលចំនួនពិតប្រាកដ នឹងត្រូវប្រកាសនាពេលឆាប់ៗខាងមុខ។
អត្ថបទទាក់ទង!
ក្រោយពីនាយកដ្ឋានពាណិជ្ជកម្មអាមេរិក បានដាក់ក្រុមហ៊ុន Huawei ទៅក្នុងបញ្ជីត្រួតពិនិត្យនោះ បុគ្គលិកក្រុមហ៊ុន Future Wei Technologies ត្រូវប្រឈមមុខនឹងការហាមឃាត់ ក្នុងទំនាក់ទំនងជាមួយ សហការីដទៃទៀត ដែលមានការិយាល័យក្នុងប្រទេសចិន។
គួររម្លឹកបន្តិចថា ក្រោយកិច្ចពិភាក្សាគ្នាជាមួយ លោក ស៊ី ជីនពីង ប្រធានាធិបតីចិន នាឱកាសកិច្ចប្រជុំ G20 លោក ដូណាល់ ត្រាំ ដែលជាប្រធានាធិបតីសហរដ្ឋអាមេរិក ក៏បានបង្ហើបថា លោក ត្រៀមខ្លួនរួចជាស្រេច ក្នុងការបើកផ្លូវឲ្យ ក្រុមហ៊ុនអាមេរិក លក់ផលិតផលឲ្យ ក្រុមហ៊ុន Huawei វិញ បើសិនជា មិនមានបញ្ហាណាមួយ ទាក់ទងនឹងសន្តិសុខជាតិ កើតឡើងនោះទេ។
យ៉ាងណាមិញ បើតាមសេចក្តីសម្រេចរបស់នាយកដ្ឋានពាណិជ្ជកម្មអាមេរិក គឺមិនបានដកក្រុមហ៊ុន Huawei ចេញពី បញ្ជីត្រួតពិនិត្យទាំងស្រុងនោះទេ គឺនៅតែមានការហាមឃាត់ចំពោះ ការបញ្ជាទិញ ពីក្រុមហ៊ុនអាមេរិកមួយចំនួនដដែល។
សូមបញ្ជាក់ថា នាយកដ្ឋានពាណិជ្ជកម្មអាមេរិក បានដាក់ក្រុមហ៊ុន Huawei ទៅក្នុង បញ្ជីត្រួតពិនិត្យ កាលពីខែឧសភា កន្លងទៅនេះ ដែលហាមឃាត់ ក្រុមហ៊ុនអាមេរិក មិនឲ្យនាំចេញ និងលក់ផលិតផលអេឡិចត្រូនិក ទៅឲ្យក្រុមហ៊ុនចិនឡើយ ក៏ប៉ុន្តែក្រោយការជួបពិភាក្សាគ្នាជាថ្មី រវាងមេដឹកនាំនៃប្រទេសអាមេរិក និងចិន នៅចុងខែមិថុនានេះ គឺលោក ដូណាល់ ត្រាំ យល់ព្រមតាមសំណើររបស់លោក ស៊ី ជីនពីង អនុញ្ញាតឲ្យ ក្រុមហ៊ុន Huawei ទិញផលិតផលរបស់អាមេរិក ដែលមិនប៉ះពាល់សន្តិសុខជាតិ៕
None
