សម្តេច ហ៊ុន សែន បានថ្លែងអះអាងយ៉ាងដូច្នេះ នៅក្នុងឱកាស បើកការដ្ឋានសាងសង់ ស្ពានបេតុងខ្សែកាប ឆ្លងកាត់ទន្លេបាសាក់ តភ្ជាប់រាជធានីភ្នំពេញ ពីទីក្រុងកោះពេជ្រ ទៅកាន់ទីក្រុងរណបកោះនរា និងពីកោះនរា ឆ្ពោះទៅផ្លូវជាតិលេខ១ នាព្រឹកថ្ងៃទី ២៦ ខែតុលា ឆ្នាំ២០២០។
ដ្បិតតែ សេដ្ឋកិច្ចកម្ពុជាយើងធ្លាក់ចុះ និងប្រាក់ចំណូលមានការថមថយចុះក្ដី ប៉ុន្ដែ បើតាមសម្តេច ហ៊ុន សែន បានបញ្ជាក់ថា ចំពោះប្រាក់ចំណូលរបស់រដ្ឋនៅតែអាចទ្រទ្រង់សម្រាប់ការចំណាយផ្សេងៗរបស់រដ្ឋបានដដែល។ តួយ៉ាង នៅឆមាសទី ១ ឆ្នាំ ២០២០ កម្ពុជាសម្រេចបានអតិរេកពាណិជ្ជកម្ម ប្រមាណ ២០០ លានដុល្លារ ប៉ុន្ដែ នៅត្រីមាសទី ២ ប្រាក់ចំណូល និងចំណាយអាចនឹងមានប្រហាក់ប្រហែលគ្នា។
អត្ថបទទាក់ទង
សម្តេច តេជោ ហ៊ុន សែន បានលើកឡើងថា វិស័យឯកជន បានចូលរួមចំណែកយ៉ាងសកម្មជាមួយនឹងរាជរដ្ឋាភិបាលក្នុងកាលៈទេសៈកូវីដ-១៩នេះ ខណៈរាជរដ្ឋាភិបាលក៏បានខិតខំធ្វើយ៉ាងណា ជួយកុំឲ្យក្រុមហ៊ុនក្ស័យធន ឬបិទទ្វារ នៅអំឡុងពេលកូវីដ-១៩ ដូចជាការបន្ធូរបន្ថយពន្ធ និងការលើកទឹកចិត្តមួយចំនួនទៀត។ សម្តេច បានសង្កត់ធ្ងន់ទៀតថា បើរោងចក្របិទទ្វារ នឹងធ្វើឲ្យបាត់បង់ការងារប្រជាជនច្រើន ដូច្នេះហើយ ទើបរាជរដ្ឋាភិបាលបានដុតដៃដុតជើង ធ្វើយ៉ាងណាឲ្យរោងចក្រមិនឈានទៅរកការក្ស័យធន នៅអំឡុងពេលដ៏លំបាកនេះ។
បើតាមសម្តេចនាយករដ្ឋមន្ត្រីកម្ពុជា ការបាត់បង់ការងាររបស់ពលរដ្ឋកម្ពុជា ដោយសារតែរងផលប៉ះពាល់ពីកូវីដ-១៩ មកទល់ពេលនេះ មានប្រមាណ ៣០ម៉ឺននាក់ ខណៈដែលការងារមួយចំនួនក៏ត្រូវបានបង្កើតឡើងជាបន្ដបន្ទាប់ផងដែរ។ ទន្ទឹមនឹងនោះ ការវិនិយោគថ្មីៗ ក៏នៅតែមានសកម្មភាព មិនមានការធ្លាក់ចុះខ្លាំងនោះទេ។ ជាក់ស្ដែង គម្រោងទីក្រុងរណបកោះនរា ដែលគ្រោងនឹងចំណាយការសាងសង់សរុប ២ពាន់៥រយលានដុល្លារអាមេរិក ដែលទើបតែបានបើកការដ្ឋានសាងសង់ស្ពានឆ្លងពីកោះពេជ្រនោះ ត្រូវបានលោកឧកញ៉ា ពុង ឃាវសែ ដែលជាប្រធានក្រុមប្រឹក្សាភិបាលក្រុមហ៊ុន OCIC និងជាម្ចាស់គម្រោងទីក្រុងរណបនេះ បានអះអាងថា ក្នុងរយៈពេល ៣ ឆ្នាំក្រុមហ៊ុននឹងចំណាយថវិកា៥៥០ លានដុល្លារអាមេរិក ដើម្បីសាងសង់ហេដ្ឋារចនាសម្ព័ន្ធទីក្រុងរណបនេះ ខណៈគិតតាំងពីដើមឆ្នាំ២០២០ មកទល់ពេលនេះ ការសាងសង់ហេដ្ឋារចនាសម្ព័ន្ធ សម្រេចបាន ២៧%ហើយ។
អត្ថបទគួរឲ្យចាប់អារម្មណ៍!
លោក ឧកញ៉ា ពុង ឃាវសែ បានគូសបញ្ជាក់ទៀតថា សម្រាប់ការសាងសង់ហេដ្ឋារចនាសម្ព័ន្ធទីក្រុងរណបកោះនរារយៈពេល៣ឆ្នាំដំបូង រំពឹងថា នឹងចូលរួមចំណែកក្នុងផលិតផលក្នុងស្រុកសរុប ឬហៅ GDP ររបស់កម្ពុជា ប្រមាណ ២២៥លានដុល្លារ ក្នុងមួយឆ្នាំៗ ដែលស្មើនឹង០,៩% នៃ GDP នាពេលបច្ចុប្បន្ន។ គម្រោងនេះ អាចនឹងត្រូវការកម្លាំងពលកម្មប្រមាណ ៧០០នាក់ និងអាចកើនដល់៧ពាន់នាក់ នៅពេលមានសកម្មភាពសាងសង់ពេញទំហឹង ហើយនៅពេលបញ្ចប់ការសាងសង់ទីក្រុងរណបកោះនរានេះ នឹងអាចបង្កើតការងារបានដល់ជាង ១ម៉ឺនកន្លែង។
សូមបញ្ជាក់ថា សេដ្ឋកិច្ចរបស់ប្រទេសកម្ពុជា នៅឆ្នាំ២០២០នេះ ត្រូវបានស្ថានប័នអត្រាជាតិមួយចំនួនបានធ្វើការព្យាករថា នឹងមានការធ្លាក់ចុះតែអត្រានៃការព្យាករធ្លាក់ចុះនោះ គឺមានខុសគ្នា។ តួយ៉ាង បានព្យាករថា សេដ្ឋកិច្ចកម្ពុជា នឹងធ្លាក់ចុះដល់ ២,៨% ខណៈធនាគារអភិវឌ្ឍន៍អាស៊ី បានព្យាករ ថានឹងធ្លាក់ចុះ ៤% រីឯធនាគារពិភពលោកវិញព្យាករថា ធ្លាក់ចុះ ២%៕
None
