តែយ៉ាងណាសម្តេចតេជោមិនបានបង្ហើបប្រាប់ទេថា នាយករដ្ឋមន្ត្រីថ្មីនោះជានរណានោះទេ។ ជាមួយគ្នានេះនាយករដ្ឋមន្ត្រីចាំផ្ទះរូបនេះក៏បានសុំការអធ្យាស្រ័យពីកម្មករកម្មការិនីចំពោះការខនខានជួបសំណេះសំណាលដូចអ្វីដែលបានសន្យាផងដែរ។
តាមរយៈសារជាសំឡេងជិត៤នាទីនៅព្រឹកថ្ងៃទី២៦ កក្កដា សម្តេចតេជោ ហ៊ុន សែន នាយករដ្ឋមន្ត្រីកម្ពុជាចាំផ្ទះបានគូសបញ្ជាក់ថា នាយករដ្ឋមន្ត្រីថ្មីអាចនឹងជំនួសនាយករដ្ឋមន្ត្រីចាស់ ជួបសំណេះសំណាលជាមួយកម្មករកម្មការិនីរោងចក្រក្រោយរាជរដ្ឋាភិបាលអាណត្តិថ្មីត្រូវបានបង្កើតឡើង។ យ៉ាងណានៅក្នុងសារជាសំឡេងនោះ សម្តេចតេជោ ហ៊ុន សែន មិនបានបញ្ជាក់ឈ្មោះនាយករដ្ឋមន្ត្រីថ្មី ដែលត្រូវជួបសំណេះសំណាលជាមួយកម្មករកម្មការិនីជំនួសសម្តេចថាជានរណានោះទេ។ ប៉ុន្តែនៅក្នុងបទសម្ភាសជាមួយទូរទស្សន៍ phoenix មួយកាលពីពេលថ្មីៗ សម្តេចតេជោ បានអះអាងថា បេក្ខភាពនាយករដ្ឋមន្ត្រីសម្រាប់អាណត្តិទី៧មានតែសម្តេច និងឯកឧត្តម ហ៊ុន ម៉ាណែត ដែលត្រូវជាកូនប្រុសច្បងរបស់សម្តេចតែពីរនាក់ប៉ុណ្ណោះ។ នៅក្នុងបទសម្ភាសនោះដែរសម្តេចបានបង្ហើបថា នៅក្រោយការបោះឆ្នោត៣ទៅ៤សប្តាហ៍ឯកឧត្តម ហ៊ុន ម៉ាណែត អាចក្លាយជានាយករដ្ឋមន្ត្រីក៏អាចថាបាន។
សម្តេចតេជោបានថ្លែងយ៉ាងដូច្នេះថា៖«យើងនឹងជួបគ្នានៅក្រោយការបង្កើតរាជរដ្ឋាភិបាលថ្មី ដែលនឹងអាចមានលទ្ធភាពខ្ពស់បំផុតមាននាយករដ្ឋមន្ត្រីថ្មីទៅសួរសុខទុក្ខកម្មករកម្មការិនីរបស់យើង ជំនួសនាយករដ្ឋមន្ត្រីចាស់ ដែលនេះជាលទ្ធភាពនៃការកើតឡើងនៃរាជរដ្ឋាភិបាលថ្មី ដែលមានទាំងនាយករដ្ឋមន្ត្រីថ្មី ហើយខ្ញុំក៏មិនទៅណានោះដែរ ខ្ញុំនឹងបកស្រាយរឿងនេះនៅថ្ងៃទី៣ ខែសីហា ក្នុងថ្ងៃសម្ពោធផ្លូវក្រវាត់ក្រុងទី៣»។
អត្ថបទគួរអាន
នៅក្នុងសារជាសំឡេងនោះដែរ សម្តេចតេជោ ហ៊ុន សែន ក៏បានសុំការអធ្យាស្រ័យពីកម្មករកម្មការិនីចំពោះការខកខានក្នុងការជួបសំណេះសំណាលជាមួយកម្មករកម្មាការិនីរោងចក្រទាំង១០គោលដៅទាំងនៅរាជធានីភ្នំពេញនិងតាមបណ្តាខេត្ត ដូចអ្វីដែលសម្តេចបានសន្យាកាលពីពេលកន្លងទៅ។ សម្តេចអះអាងថា ការលើកពេលជួបសំណេះសំណាលនេះ គឺធ្វើឡើងក្រោមហេតុផលកត្តាពេលវេលា ស្របពេលកម្ពុជាកំពុងស្ថិតក្នុងដំណាក់កាលបង្កើតរាជរដ្ឋាភិបាលថ្មីសម្រាប់អាណត្តិទី៧ ដែលទើបបញ្ចប់ការបោះឆ្នោតយ៉ាងរលូនកាលពីពេលថ្មីៗ។ ម្យ៉ាងទៀតសម្តេចតេជោ ចង់ឲ្យការជួបសំណេះសំណាលជាមួយកម្មករនិយោជិតនេះធ្វើឡើងក្នុងអាណត្តិរាជរដ្ឋាភិបាលថ្មីៗ។
តាមរយៈលទ្ធផលបឋមដែលប្រកាសដោយគណៈកម្មាធិការជាតិរៀបចំការបោះឆ្នោត(គ.ជ.ប)បានបង្ហាញឲ្យឃើញថា គណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធានបានឈ្នះយ៉ាងភ្លូកទឹកភ្លូកដីនៅក្នុងការបោះឆ្នោតជ្រើសតាំងតំណាងរាស្ត្រអាណត្តិទី៧ជាមួយការទទួលបានសំឡេងគាំទ្រជាង៦លាន៣៩ម៉ឺននាក់ ឬស្នើនឹងជាង៨២%នៃសន្លឹកឆ្នោតបានការទាំងអស់។ ដោយឡែកគណបក្សហ៊្វ៊ុនស៊ិនប៉ិច ឈរនៅលំដាប់លេខ២ ដោយទទួលបានសំឡេងគាំទ្រជិត៧២ម៉ឺននាក់ ឬស្មើនឹង១០%នៃសំឡេងឆ្នោតបានការសរុប។ តាមលទ្ធផលបណ្តោះអាសន្នអ្នកទៅចូលរួមបោះឆ្នោតនៅអាណត្តិទី៧មានចំនួនជាង៨លាន២សែននាក់ ស្មើនឹងជាង៨៤% នៃចំនួនអ្នកដែលគ្រប់អាយុបោះឆ្នោតនៅឆ្នាំនេះ៕
