ប្រការនេះហើយ បានធ្វើឲ្យ IMF ចាត់ទុកថា កំពុងបង្កហានិភ័យកាន់តែខ្លាំង ប្រសិនបើអត្រាការប្រាក់សកលលោកមានការកើនឡើងកាន់តែលឿនជាងអ្វីដែលបានរំពឹងទុក។
មន្ត្រីជាន់ខ្ពស់របស់អង្គការមូលនិធិរូបិយវត្ថុអន្តរជាតិ បាននិយាយថា ការរាតត្បាតកូវីដ១៩ បង្កឲ្យបំណុលកើនដល់ទៅទំហំ ២៥៦% នៃ ផលិតផលក្នុងស្រុករបស់ពិភពលោក GDP ក្នុងឆ្នាំ២០២០ ពោលគឺកើនឡើង ២៨% បន្ថែមទៀត ធៀបនឹងកម្រិតបំណុលដែលធ្លាប់មានពីមុន។ ការខ្ចីប្រាក់របស់រដ្ឋាភិបាលប្រទេសនានា តំណាងឲ្យពាក់កណ្ដាលនៃទឹកប្រាក់បំណុលដែលបានកើនឡើង ២៨ទ្រីលានដុល្លារ ប៉ុន្ដែ បំណុលនៅក្នុងវិស័យឯកជនក្នុងចំណោមសាជីវកម្មមិនមែនហិរញ្ញវត្ថុ និង បំណុលគ្រួសារវិញ ក៏បានកើនដល់កម្រិតខ្ពស់បំផុតមួយផងដែរ។
បើតាមអង្គការមូលនិធិរូបិយវត្ថុអន្តរជាតិដដែលនេះ បានឲ្យដឹងទៀតថា ប្រទេសដែលមានសេដ្ឋកិច្ចជឿនលឿន និងប្រទេសចិន គឺតំណាងឲ្យដល់ទៅ ៩០% នៃបំណុលដែលបានកើនឡើងសរុប ដោយសារតែបំណុលទាំងនោះ មានអត្រាការប្រាក់ទាបសម្រាប់ប្រទេសទាំងនេះ។ ដោយឡែក សម្រាប់ប្រទេសកំពុងអភិវឌ្ឍន៍វិញ បំណុលមានការកើនឡើងតិចតួចប៉ុណ្ណោះ ព្រោះតែមានការរារាំងដោយការចំណាយលើការខ្ចីប្រាក់មានខ្ពស់ និងមានការកម្រិតលទ្ធភាពដើម្បីទទួលបានមូលនិធិជាដើម។
អត្ថបទគួរអាន
អគ្គនាយកកិច្ចការសារពើពន្ធរបស់ IMFបានបញ្ជាក់ថា អត្រាការប្រាក់កាន់តែខ្ពស់នឹងកាត់បន្ថយផលប៉ះពាល់នៃការកើនឡើងការចំណាយសារពើពន្ធនិងបង្កឲ្យមានក្ដីបារម្ភអំពីចីរភាពបំណុលកាន់តែខ្លាំង។
មន្ត្រីអង្គការមូលនិធិរូបិយវត្ថុអន្តរជាតិ បានគូសបញ្ជាក់ទៀតថា ហានិភ័យនឹងមានកាន់តែខ្ពស់ ប្រសិនបើអត្រាការប្រាក់កើនឡើងខ្ពស់ជាងការរំពឹងទុក ហើយកំណើននៃការផ្ដល់កម្ចីមានការធ្លាក់ចុះ។ បន្ថែមពីនេះ ការរឹតបន្ដឹងកាន់តែខ្លាំងនៃលក្ខខណ្ឌហិរញ្ញវត្ថុ ក៏នឹងបង្កើនសម្ពាធកាន់តែធ្ងន់ធ្ងរទៅលើរដ្ឋាភិបាល ក្រុមគ្រួសារ និងក្រុមហ៊ុន ដែលកំពុងជំពាក់បំណុលនៅមិនទាន់សងរួចនៅទូទាំងពិភពលោកផងដែរ៕
None
