ក្រុមហ៊ុនធានារ៉ាប់រងទាំងអស់ បានផ្តល់សំណងជូនអតិថិជនជាង៤៦លានដុល្លារនៅ៩ខែឆ្នាំនេះ ខណៈទំហំបុព្វលាភមានជាង២៦៦លានដុល្លារ

ទំហំបុព្វលាភនេះត្រូវបានរួមចំណែកដោយទីផ្សារធានារ៉ាប់រងអាយុជីវិតជាង៥៥% ធានារ៉ាប់រងទូទៅជាង៤២% និងធានារ៉ាប់រងខ្នាងតូចជាង២%។

ក្នុងបទសម្ភាសជាមួយសារព័ត៌មាន ខេមបូណូមីស លោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជាបានគូសបញ្ជាក់ថា ក្រុមហ៊ុនធានារ៉ាប់រង ដែលជាសមាជិករបស់សមាគមទាំងអស់បានផ្តល់សំណងលើផលប៉ះពាល់ជូនអតិថិជនសរុបជាង៤៦លានដុល្លារ នៅក្នុងរយៈពេល៩ខែ ឆ្នាំ២០២៣ កើនឡើងប្រមាណ៤៤% បើធៀបនឹងរយៈពេលដូចគ្នាកាលពីឆ្នាំ២០២២។ ក្នុងចំណោមសំណងទាំងនេះត្រូវបានផ្តល់ក្នុងទីផ្សារធានារ៉ាប់រងទូទៅជាង២១លានដុល្លារ និងធានារ៉ាប់រងអាយុជីវិតប្រមាណ១០លានដុល្លារ និងធានារ៉ាប់រងខ្នាតតូចប្រមាណ៦០ម៉ឺនដុល្លារ។ ការកើនឡើងនៃសំណងធានារ៉ាប់រងនេះ ត្រូវបានអ្នកជំនាញរូបនេះអះអាងថា គឺដោយសារតែហានិភ័យរបស់អ្នកប្រើប្រាស់សេវាធានារ៉ាប់រងមានការកើនឡើង ពិសេសលើធានារ៉ាប់រងអគ្គិភ័យ, រថយន្ត និងធានារ៉ាប់រងលើសុខភាព។

បើតាមថ្នាក់ដឹកនាំសមាគមរូបនេះ គិតត្រឹមត្រីមាសទី៣ឆ្នាំនេះ ទីផ្សារធានារ៉ាប់រងមានទំហំបុព្វលាភសរុបជាង២៦៦លានដុល្លារកើនឡើងជាង៤% បើធៀបនឹងរយៈពេលដូចគ្នាកាលពីឆ្នាំមុន ដែលមានត្រឹមតែ២៥៥លានដុល្លារ។ ទំហំបុព្វលាភនេះ ត្រូវបានរួមចំណែកដោយទីផ្សារធានារ៉ាប់រងអាយុជីវិតជាង៥៥% ធានារ៉ាប់រងទូទៅជាង៤២% និងធានារ៉ាប់រងខ្នាតតូចជាង២%។ លោកបានបន្ថែមថា នៅក្នុងរយៈពេល៩ខែឆ្នាំ២០២៣ អ្នកទិញធានារ៉ាប់រងអាយុជីវិតមានទំហំបុព្វលាភជាង១១៣លានដុល្លារអាម៉េរិកកើនឡើង១០% ខណៈអ្នកទិញធានារ៉ាប់រងទូទៅមានទំហំជាង១៤៧លានដុល្លារធ្លាក់ចុះជិត១% និងធានារ៉ាប់រងខ្នាតតូចមានទំហំជាង៥លានដុល្លារកើនឡើងជាង២៧%។

​យោងតាមទិន្នន័យពីសមាគមធានារ៉ាប់រងកម្ពុជា គិតត្រឹមត្រីមាសទី៣ឆ្នាំនេះ អ្នកទិញធានារ៉ាប់រងនៅកម្ពុជា មានចំនួនសរុបជិត៣លាននាក់ ក្នុងនោះអ្នកទិញធានារ៉ាប់រងអាយុជីវិតមានប្រមាណ១លាន៤សែននាក់ ធានារ៉ាប់រងទូទៅមាន៧៦ម៉ឺននាក់ និងធានារ៉ាប់រងខ្នាតតូចមានប្រមាណ៨១ម៉ឺននាក់៕

អត្ថបទ៖ បូ ដូឡា​