ធនាគារ ហត្ថា ចូលរួមសម្ពោធអគារសិក្សាថ្មី និងដាំកូនឈើនៅខេត្តកំពង់ធំ ដើម្បីលើកកម្ពស់វិស័យអប់រំ និងបរិស្ថាន

ក្នុងឱកាសនោះ គណៈប្រតិភូបានចូលរួមក្នុងសកម្មភាពសំខាន់ៗចំនួន៣ រួមមាន កម្មវិធីដាំកូនឈើ​នៅវិទ្យាល័យ ជា ចាន់តូ ដើម្បីរួមចំណែកលើកកម្ពស់បរិស្ថានបៃតង និងបង្កើតបរិយាកាសសិក្សា​ដែលស្រស់ស្រាយ និងប្រកបដោយផាសុកភាព។
ជាមួយគ្នានេះ ក៏មានការសម្ពោធដាក់ឱ្យប្រើប្រាស់ជាផ្លូវការនូវអគារសិក្សាថ្មី​នៅសាលាបឋមសិក្សាចំបក់ខាងត្បូង ស្ថិតក្នុងស្រុកសន្ទុក ខេត្តកំពង់ធំ និងអគារសិក្សាថ្មីមួយទៀត​នៅសាលាបឋមសិក្សាតាំងក្រសៅ ឃុំតាំងក្រសៅ ស្រុកប្រាសាទសំបូរ ខេត្តកំពង់ធំ។
ធនាគារ ហត្ថា បានលើកឡើងថា ខ្លួននៅតែបន្តប្តេជ្ញាចិត្តចូលរួមជាមួយរាជរដ្ឋាភិបាល​ក្នុងការអនុវត្តសកម្មភាពសង្គម តាមរយៈការគាំទ្រវិស័យអប់រំ ការអភិវឌ្ឍធនធានមនុស្ស និងការលើកកម្ពស់បរិស្ថានបៃតង។ ធនាគារយល់ឃើញថា ការបង្កើតបរិយាកាសសិក្សា​ដែលមានផាសុកភាព គឺជាមូលដ្ឋានដ៏សំខាន់សម្រាប់ការកសាងធនធានមនុស្ស និងជំរុញការអភិវឌ្ឍប្រទេសកម្ពុជាឱ្យកាន់តែរីកចម្រើន និងមានចីរភាពនាពេលអនាគត។