លោកស្រី អូរ៉ាម៉ុន ស៊ុបថាវីធុម (Auramon Supthaweethum) អគ្គនាយកនៃនាយកដ្ឋានចរចាពាណិជ្ជកម្មថៃបាននិយាយថា អនុស្សរណៈនៃការយោគយល់គ្នានេះនឹងត្រូវបានចុះហត្ថលេខានៅថ្ងៃទី ១៣ ខែតុលា ដោយទីភ្នាក់ងារពាក់ព័ន្ធនៅខាងក្រៅកិច្ចប្រជុំថ្នាក់រដ្ឋមន្ត្រីលើកទី ៦ ស្ដីពីការលើកកម្ពស់ទំនាក់ទំនងសេដ្ឋកិច្ចថៃ និងសិង្ហបុរី។
លោក ជូរីន ឡាក់សាណាវីស៊ីត (Jurin Laksanawisit) រដ្ឋមន្ត្រីក្រសួងពាណិជ្ជកម្មថៃ និងលោក តាន ស៊ី ឡេង (Tan See Leng) រដ្ឋមន្ត្រីការងាររបស់សិង្ហបុរីគ្រោងនឹងធ្វើជាសហប្រធាននៃកិច្ចប្រជុំនេះដែលធ្វើឡើងក្នុងបំណងពន្លឿនកិច្ចសហប្រតិបត្តិការលើវិស័យកសិកម្មច្នៃប្រឌិត សេដ្ឋកិច្ចឌីជីថល ការវិនិយោគ ទេសចរណ៍ និងកម្មសិទ្ធិបញ្ញា ហើយសហប្រតិបត្តិការសេដ្ឋកិច្ចនេះ នឹងគាំទ្រដល់កំណើនអាជីវកម្មប្រកបដោយនិរន្តរភាពនៅក្នុងប្រទេសទាំងពីរនេះ។
លោកស្រី អូរ៉ាម៉ុន បាននិយាយថា នាយកដ្ឋានកម្មសិទ្ធិបញ្ញានៃប្រទេសថៃ និងការិយាល័យកម្មសិទ្ធិបញ្ញានៃប្រទេសសិង្ហបុរីគ្រោងនឹងចុះហត្ថលេខាលើអនុស្សារណៈនៃការយោគយល់គ្នាមួយស្តីពីកិច្ចសហប្រតិបត្តិការទ្វេភាគី ខណៈដែលភាគីទាំង២នេះក៏គ្រោងនឹងចុះហត្ថលេខាលើអនុស្សារណៈស្ដីពីពាណិជ្ជកម្មសាច់ជ្រូក និងសាច់មាន់ផងដែរ។
អត្ថបទគួរអាន
ក្រៅពីនេះ ប្រទេសថៃ និងសិង្ហបុរី នឹងមានការចុះអនុស្សារណៈយោគយោល់គ្នារវាងក្រុមហ៊ុនវិស័យឯកជនមួយចំនួនទៀត ពិសេសនៅក្នុងក្រុមហ៊ុនពាក់ព័ន្ធវិស័យកសិកម្ម ថាមពល និងការលក់រាយជាដើម។
សិង្ហបុរីគឺជាដៃគូពាណិជ្ជកម្មធំជាងគេទី៤របស់ប្រទេសថៃនៅថ្នាក់តំបន់អាស៊ាន និងជាដៃគូពាណិជ្ជកម្មធំជាងគេទី៨ក្នុងពិភពលោករបស់ថៃ ដោយនៅក្នុងរយៈពេល៨ខែដំបូងនៃឆ្នាំ២០២២នេះ ពាណិជ្ជកម្មទ្វេភាគីបានកើនឡើងដល់ប្រមាណ ១៣ពាន់លានដុល្លារ ពោលគឺបានកើនឡើងជាង២០%បើធៀបនឹងរយៈពេលដូចគ្នាកាលពីឆ្នាំមុន។ ហើយក្នុងចំណោមចំនួនពាណិជ្ជកម្មសរុបនេះ គឺការនាំចេញរបស់ថៃទៅសិង្ហបុរីមានជាង ៧ពាន់លានដុល្លារគឺបានកើនឡើង ជិត២៤% រីឯការនាំចូលមកវិញមានទំហំទឹកប្រាក់ចំនួនជាង ៥ពាន់៦រយលានដុល្លារពោលគឺបានកើនឡើងជាង១៦%។
ការនាំចេញដ៏សំខាន់បំផុតរបស់ថៃទៅសិង្ហបុរី រួមមាន ត្បូងពេជ្រគ្រឿងអលង្ការ មាសគីឡូ ប្រេងចម្រាញ់ បន្ទះសៀគ្វី ឧបករណ៍ សមាសធាតុកុំព្យូទ័រ និងផលិតផលឧស្សាហកម្មផ្សេងទៀត ខណៈដែលការនាំចូលដ៏មកវិញមាននដូចជា ឧបករណ៍កុំព្យូទ័រ និងសមាសធាតុគីមី ប្រេងចម្រាញ់ បន្ទះសៀគ្វីអគ្គីសនី គ្រឿងអលង្ការ ត្បូង និងគ្រឿងមាសពេជ្រផ្សេងទៀត។
ការវិនិយោគផ្ទាល់របស់ថៃនៅសិង្ហបុរីក្នុងកំឡុងឆ្នាំ២០០៥-២០២១មានទំហំទឹកប្រាក់ចំនួន១៤៦ពាន់លានដុល្លារ ខណៈដែលការវិនិយោគក្នុងឆ្នាំ២០២១តែមួយឆ្នាំគត់ គឺបានមានដល់ទឹកប្រាក់ជិត៨ពាន់លានដុល្លារឯណោះ។
ចំណែកការវិនិយោគផ្ទាល់របស់សិង្ហបុរីនៅក្នុងប្រទេសថៃនៅក្នុងអំឡុងពេលដូចគ្នានេះដែរគឺ មានទំហំទឹកប្រាក់ចំនួន ៨៦.១ ពាន់លានដុល្លារ រីឯតម្លៃនៃការវិនិយោគក្នុងឆ្នាំ២០២១ មាន ជាង ៥ពាន់លានដុល្លារ៕
អត្ថបទ៖ សុខ ជា
