ផែនការរបស់រដ្ឋាភិបាលឥណ្ឌានេះ ត្រូវបានគេមើលឃើញ អាចនឹងធ្វើឲ្យផលប៉ះពាល់ដល់ក្រុមហ៊ុនម៉ាកយីហោទូរស័ព្ទចិនមួយចំនួន រួមទាំងក្រុមហ៊ុន Xiaomi ផងដែរ។
ផែនការរបស់រដ្ឋាភិបាលឥណ្ឌានេះ មានបំណងជំរុញឱ្យក្រុមហ៊ុនយក្សរបស់ចិនមួយចំនួនកុំកំណត់តម្លៃទូរស័ព្ទស្មាតហ្វូនទាបពេកនៅប្រទេសឥណ្ឌា ដែលជាទីផ្សារលក់ទូរស័ព្ទស្មាតហ្វូងដ៏ធំបំផុតទី២នៅក្នុងពិភពលោក ហើយវាបានកើតឡើងចំពេលមានការព្រួយបារម្ភកាន់តែខ្លាំងឡើងចំពោះម៉ាកផលិតផលថ្មី ដែលមានការប្រើប្រាស់ច្រើនរបស់ចិនដូចជាក្រុមហ៊ុនទូរស័ព្ទ Realme និង Transsion ជាដើម។ នេះបើយោងតាមប្រភពសុំមិនបញ្ចេញអត្តសញ្ញាណ ដែលបានអះអាងប្រាប់សារព័ត៌មាន Bloomberg។
ទូរស័ព្ទស្មាតហ្វូនតម្លៃក្រោម ១៥០ ដុល្លារគឺមានចំណែកការលក់ដល់ទៅ១ភាគ៣ នៃការលក់ស្មាតហ្វូនសរុបនៅក្នុងប្រទេសឥណ្ឌា នៅត្រីមាសទី២ឆ្នាំ២០២២ ដោយក្នុងនោះ ក្រុមហ៊ុនចិនបានបញ្ចេញលក់ផលិតផលទាំងនោះរហូតដល់ ៨០%ឯណោះ ។ នេះបើយោងតាមស្ថាប័នតាមដានទីផ្សារ Counterpoint។
អត្ថបទគួរអាន
កន្លងមក ទីក្រុងញូវដែលីបានដាក់ក្រុមហ៊ុនចិនដែលកំពុងប្រតិបត្តិការក្នុងប្រទេសនេះដូចជាក្រុមហ៊ុន Xiaomi ក្រុមហ៊ុន Oppo និងក្រុមហ៊ុន Vivo ជាដើមឱ្យស្ថិតនៅក្រោមការត្រួតពិនិត្យហិរញ្ញវត្ថុ យ៉ាងដិតដល់ដែលនាំឱ្យមានការទារបង់ពន្ធ និងការចោទប្រកាន់ពីការលាងលុយកខ្វក់ជាដើម។
សូមបញ្ជាក់ថា រដ្ឋាភិបាលឥណ្ឌាកាលពីមុនក៏បានប្រើប្រាស់មធ្យោបាយក្រៅផ្លូវការមួយចំនួន ដើម្បីហាមឃាត់ក្រុមហ៊ុន Huawei Technologies Co. និងក្រុមហ៊ុនផលិតឧបករណ៍ទូរគមនាគមន៍ ZTE Corp.របស់ចិន ក្នុងការពង្រីកបណ្ដាញប្រើប្រាស់នៅក្នុងប្រទេសឥណ្ឌាផងដែរ ប៉ុន្ដែមិនមានគោលនយោបាយផ្លូវការហាមឃាត់ផ្លូវការលើក្រុមហ៊ុនទាំងអស់នេះនៅឡើយទេ៕
