![មេដឹកនាំឥណ្ឌូនេស៊ី](https://cdn.cambonomist.com/media/images/tkrng.2e16d0ba.fill-960x540.jpg)
នៅខែសីហា ខាងមុខ រដ្ឋាភិបាលឥណ្ឌូនេស៊ីនឹងរើស្ថាប័នមួយចំនួនពីរដ្ឋធានីហ្សាកាតា ទៅកាន់រដ្ឋធានីថ្មីនូសានតារ៉ា ដែលកំពុងសាងសង់នៅលើកោះបូណេអូ ហើយលោក វីដូដូ មានគម្រោងរៀបចំពិធីបុណ្យឯករាជ្យជាតិ នៅថ្ងៃទី១៧ ខែសីហា របស់ឥណ្ឌូនេស៊ី នៅក្នុងរដ្ឋធានីថ្មីនេះ មុនពេលអាណត្តិរបស់លោកនឹងត្រូវបញ្ចប់នៅក្នុងខែតុលា ឆ្នាំនេះ។ ប៉ុន្តែកាលពីថ្ងៃទី១១ ខែមិថុនា លោក វីដូដូ បានបង្ហើបថា ពិធីបុណ្យឯករាជ្យជាតិ នៅឆ្នាំនេះនឹងប្រព្រឹត្តទៅទាំងនៅរដ្ឋធានីនូសានតារ៉ា និងទាំងនៅរដ្ឋធានីហ្សាកាតា ប៉ុន្តែលោកមិនបានប្រាប់ពីមូលហេតុនោះទេ។
ការបង្ហើបឱ្យដឹងរបស់លោក វីដូដូ នេះបានធ្វើឡើងបន្ទាប់ពីលោកបានប្រកាសកាលពីដើមខែនេះពីការលាឈប់ភ្លាមៗរបស់មន្ត្រីកំពូលពីរនាក់ដែលទទួលខុសត្រូវចំពោះការត្រួតពិនិត្យការសាងសង់រដ្ឋធានីថ្មីនេះ។ មន្ត្រីកំពូលទាំងពីរនេះ គឺម្នាក់ជាប្រធានអាជ្ញាធរក្រុងនូសានតារ៉ា គឺ លោក បំបាង ស៊ូសានតូណូ (Bambang Susantono) និងអនុប្រធានគឺលោក ដូនី រ៉ាហាចូ (Dhony Rahajoe)។
លោក វីដូដូ គ្រាន់តែប្រាប់ពីមូលហេតុនៃការចុះចេញពីតំណែងនេះថា គឺដោយសារផលប្រយោជន៍ផ្ទាល់ខ្លួន ប៉ុន្តែបើតាមប្រភពមួយចំនួនដែលដឹងពីមូលហេតុនេះបានប្រាប់សារព័ត៌មាននីកេអេស៊ាថា មានហេតុផលជាច្រើនចំពោះការលាឈប់ពីតំណែងនេះ។
មន្ត្រីរដ្ឋាភិបាលម្នាក់ដែលដឹងពីគម្រោងនេះបាននិយាយថា អតីតប្រធានអាជ្ញាធរក្រុងនូសានតារ៉ា លោក ស៊ូសានតូណូ មិនអាចធ្វើតាមបំណងរបស់លោក វីដូដូ ចំពោះការប្រញាប់ប្រញាល់ និងបង្កើនល្បឿនការងារនៃការសាងសង់រដ្ឋធានីថ្មីនេះបានទេ ព្រោះលោកជាមនុស្សមានការប្រុងប្រយ័ត្ន និងមានវិន័យខ្លាំងពេក ខណៈដែលមនុស្សភាគច្រើននៅទីក្រុងថ្មីនេះនៅមិនទាន់ច្បាស់លាស់ទាក់ទងនឹងការិយាធិបតេយ្យរបស់អង្គការចាត់តាំងនៅឡើយ៕
អត្ថបទ៖ សុខ មង្គល