សេចក្តីសម្រេចលេខ ១៣-២ ចុះថ្ងៃទី១៦ ខែមីនា ឆ្នាំ២០២២ របស់តុលាការយុត្តិធម៌ ICJ បានបង្គាប់ឲ្យរុស្ស៊ីផ្អាកជាបន្ទាន់នូវប្រតិបត្តិការយោធា ដែលខ្លួនបានចាប់ផ្តើមកាលពីថ្ងៃទី២៤ ខែកុម្ភៈ ឆ្នាំ២០២២ នៅលើទឹកដីអ៊ុយក្រែន។ សេចក្តីសម្រេចដដែលបន្ថែមថា រុស្ស៊ីក៏ត្រូវតែធានាឲ្យបានថា កងកម្លាំងផ្សេងទៀតដែលស្ថិតនៅក្រោមការគ្រប់គ្រងរបស់ខ្លួន ឬគាំទ្រដោយទីក្រុងម៉ូស្គូ មិនគួរបន្តប្រតិបត្តិការយោធាឡើយ។ ត្រង់ចំណុចនេះ ICJ ទំនងជាចង់សំដៅដល់ក្រុមឧទ្ទាមផ្តាច់ទឹកដីនិយមក្នុងតំបន់ ដុនបាស ដែលរុស្ស៊ីប្រកាសទទួលស្គាល់ជារដ្ឋឯករាជ្យ មុនពេលចូលវាតទីលើអ៊ុយក្រែន។
អ៊ុយក្រែនបានប្តឹងរុស្ស៊ី នាំយកសំណុំរឿងនៅតុលាការ ICJ ភ្លាមៗបន្ទាប់ពីការលុកលុយរបស់រុស្ស៊ីបានចាប់ផ្តើមនៅថ្ងៃទី២៤ខែកុម្ភៈ ដោយនិយាយថា ការលើកទ័ពចូលឈ្លានពានរបស់ទីក្រុងម៉ូស្គូ ក្រោមហេតុផលទប់ស្កាត់អំពើប្រល័យពូជសាសន៍នៅភាគខាងកើតអ៊ុយក្រែន គឺគ្រាន់តែជាលេសរបស់រុស្ស៊ី ដែលគ្មានមូលដ្ឋាន។
អត្ថបទគួរអាន
កាលពីដើមខែនេះ អំឡុងសវនាការរបស់ ICJ អ៊ុយក្រែនបាននិយាយថា គ្មានការគំរាមកំហែងនៃអំពើប្រល័យពូជសាសន៍នៅភាគខាងកើតអ៊ុយក្រែននោះទេ ហើយលើសពីនេះ អនុសញ្ញាស្តីពីអំពើប្រល័យពូជសាសន៍ឆ្នាំ១៩៤៨ របស់អង្គការសហប្រជាជាតិ ដែលប្រទេសរុស្ស៊ី និងអ៊ុយក្រែន ជាប្រទេសហត្ថលេខីដែរនោះ ក៏មិនបានអនុញ្ញាតឱ្យមានការឈ្លានពានណាមួយ ដើម្បីទៅការរារាំងអំពើប្រល័យពូជសាសន៍ដែរ។
គួរជម្រាបថា នៅមុនពេលស្ថានការណ៍ដល់ដំណាក់កាលនេះ កងកម្លាំងរដ្ឋាភិបាលអ៊ុយក្រែនបានប្រយុទ្ធជាមួយក្រុមឧទ្ទាមបំបែកខ្លួន ដែលគាំទ្រដោយរុស្ស៊ីនៅក្នុងតំបន់ Donbass ភាគខាងកើតអ៊ុយក្រែនចាប់តាំងពីឆ្នា២០១៤មកម្ល៉េះ។ ក្រុងកៀវ និងសម្ព័ន្ធមិត្តរបស់លោកខាងលិចបានច្រានចោលការអះអាងរបស់ទីក្រុងមូស្គូ អំពីអំពើប្រល័យពូជសាសន៍ក្នុងតំបន់នោះ។
ដោយឡែក ក្រុមប្រឹក្សាសន្តិសុខអង្គការសហប្រជាជាតិគ្រោងនឹងបើកកិច្ចប្រជុំម្តងទៀត ដើម្បីបោះឆ្នោតនៅថ្ងៃសុក្រសប្តាហ៍នេះ លើការផ្តល់ជំនួយនិងស្តីពីការការពារជនស៊ីវិលក្នុងប្រទេសអ៊ុយក្រែន។ ប៉ុន្តែ ក្រុមប្រឹក្សាសន្តិសុខ ទំនងជានឹងមិនមានការបោះឆ្នោតឲ្យ បញ្ចប់ការប្រយុទ្ធគ្នា ឬការដកទ័ពរបស់រុស្ស៊ីនោះទេ ព្រោះគេបានដឹងច្បាស់ហើយថា រុស្ស៊ីប្រាកដជាប្រើសិទ្ធិរបស់ខ្លួន ក្នុងនាមជាសមាជិកអចិន្ត្រៃយ៍ ដើម្បីវេតូ(Veto) លើសេចក្ដីសម្រេចនេះ៕
None
