កំពង់ផែទេសចរណ៍អន្តរជាតិ ខេត្តកំពត គ្រោងចំណាយថវិកាប្រមាណ ១០លានដុល្លារលើការស្តារជម្រៅផ្លូវទឹក ដើម្បីឲ្យនាវាចរណ៍ចេញ-ចូលបាន

បើគ្មានការប្រែប្រួលទេកំពង់ផែទេសចរណ៍នេះ គ្រោងដាក់ឱ្យដំណើរការបណ្តោះអាសន្ននៅត្រីមាសទី៣ និងដាក់ឱ្យដំណើរការជាផ្លូវការនៅចុងឆ្នាំ២០២៤។

ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានគូសបញ្ជាក់ថា មកទល់ពេលនេះរាជរដ្ឋាភិបាល បានបញ្ចប់កិច្ចលទ្ធកម្មក្នុងការជ្រើសរើសក្រុមហ៊ុនឯកជន ដើម្បីមើលថែទាំ និងធ្វើប្រតិបត្តិការនៅកំពង់ទេសចរណ៍អន្តរជាតិ ខេត្តកំពត រួចហើយ។ ក្នុងនោះរាជរដ្ឋាភិបាល បានផ្តល់សិទ្ធិឱ្យក្រុមហ៊ុន AZ Builder ដែលជាបុត្រសម្ព័ន្ធរបស់ក្រុមហ៊ុន AZ Group ជាអ្នកទទួលបន្ទុកលើការដំណើរការកំពង់ផែនេះ ក្រោមក្របខណ្ឌកិច្ចសន្យាភាពជាដៃគូរវាងរដ្ឋ និងឯកជន(PPP)។ ការជ្រើសរើសនេះធ្វើឡើងក្នុងកិច្ចប្រជុំមួយរវាងក្រសួងសេដ្ឋកិច្ច និងហិរញ្ញវត្ថុ, ក្រសួងសាធារណការ និងដឹកជញ្ជូន និងក្រសួងទេសចរណ៍កាលពីពេលកន្លងទៅថ្មីៗនេះ។

ដើម្បីឈានទៅដំណើរការកំពង់ផែទេសចរណ៍អន្តរជាតិ កំពត ដែលបានបញ្ចប់ការសាងសង់ជិតពីរឆ្នាំមួយនេះ ក្រុមហ៊ុនដែលទទួលបានសិទ្ធិគ្រប់គ្រង និង ធ្វើប្រតិបត្តិការ AZ Builder គ្រោងចំណាយថវិកាចន្លោះពី ៥លានដុល្លារ ទៅ១០លានដុល្លារ ដើម្បីបំពាក់ឧបករណ៍បច្ចេកទេសផ្សេងៗ ក៏ដូចជាស្តារជម្រៅផ្លូវទឹកចេញចូលកំពង់ផែនេះ សំដៅធ្វើយ៉ាងឲ្យកប៉ាល់ ឬនាវាដឹកភ្ញៀវទេសចរ ធុនតូន និងមធ្យមអាចធ្វើចរាចរណ៍ចេញចូលកំពង់ផែនេះបាន។ នេះបើតាមការគូសបញ្ជាក់របស់ឯកឧត្តម ផន រឹម។

ពាក់ព័ន្ធនឹងកំពង់ផែទេសចរណ៍កំពតនេះដែរ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានគូសបញ្ជាក់កាលពេលថ្មីៗនេះថា ដើម្បីធានាឲ្យកំពង់ផែទេសចរណ៍មួយនេះដំណើរការទៅមានសុវត្ថិភាពល្អ និងមាននិរន្តរភាពសម្រាប់នាវាគ្រប់ប្រភេទធ្វើចរាចរណ៍បានដោយរលូននោះ រាជរដ្ឋាភិបាល តម្រូវឱ្យប្រតិបត្តិករកំពង់ផែអនុវត្តកាតព្វកិច្ចចាំបាច់មួយចំនួនដូចជា ការជីកបូមស្តារផ្លូវទឹក ឱ្យបានធំទូលាយ ការសិក្សាបន្ថែមលើបច្ចេកទេស ការបំពាក់ឧបករណ៍សញ្ញាជំនួយនាវាចរណ៍ និងការវិនិយោគលើហេដ្ឋារចនាសម្ព័ន្ធសុវត្ថិភាពមួយចំនួនទៀត ដើម្បីធានាឱ្យបានថា កំពង់ផែនេះនឹងក្លាយជាកំពង់ផែទេសចរណ៍អន្តរជាតិពេញលេញស្របតាមបទដ្ឋានបច្ចេកទេសជាតិ និងអន្តរជាតិ។

ឯកឧត្តម ប៉េង ពោធិ៍នា បានបន្តថា កំពង់ផែទេសចរណ៍អន្តរជាតិ ខេត្តកំពតនេះ គ្រោងដាក់ឱ្យដំណើរការបណ្តោះអាសន្ននៅអំឡុងត្រីមាសទី៣ឆ្នាំនេះ ហើយបើពុំមានការប្រែប្រួលទេកំពង់ផែនេះនឹងដាក់ឱ្យប្រើប្រាស់ជាផ្លូវការតែម្តងនៅចុងឆ្នាំនេះ។

សូមបញ្ជាក់ថា កំពង់ផែទេសចរណ៍អន្តរជាតិ ខេត្តកំពត អភិវឌ្ឍន៍សាងសង់នៅលើផ្ទៃដីទំហំជាង៤ហិកតា បានបើកការដ្ឋានសាងសង់​កាលពីខែសីហា ឆ្នាំ២០១៨ និងបានបញ្ចប់ការសាងសង់កាលពីខែមិថុនា ឆ្នាំ២០២២ ជាមួយទុនវិនិយោគជាង ៩,២លានដុល្លា ក្រោមថវិកាបដិភាគរវាងធនាគារអភិវឌ្ឍន៍អាស៊ី និង រាជរដ្ឋាភិបាលកម្ពុជា៕

អត្ថបទ៖ បូ ដូឡា​