កំណត់ត្រាថ្មី! នៅថៃមានអ្នកឆ្លងកូវីដ-១៩ មួយថ្ងៃកើនដល់ជិត ៣ពាន់នាក់ និងស្លាប់៨នាក់!
ប្រទេសថៃ មានកំណត់ត្រាតួលេខខ្ពស់ថ្មីទៀតហើយនៅថ្ងៃទី ២៤ ខែមេសានេះ ដោយចំនួនអ្នកឆ្លងកូវីដ-១៩ ក្នុងមួយថ្ងៃកើនដល់ជិត៣ពាន់នាក់ និងអ្នកស្លាប់មាន…
ការសម្រេចដាក់ប្រទេសក្នុងគ្រាមានអាសន្នដូចនេះធ្វើឡើងនៅមុនពេលដែលព្រឹត្តិការណ៍កីឡាអូឡាំពិកនឹងឈានចូលមកដល់ក្នុងរយៈពេល៣ខែទៀត ពោលគឺនៅថ្ងៃទី២៣ខែកក្កដាឆ្នាំនេះ។
គួររំឭកថា នេះជាលើកទី៣ហើយ ដែលជប៉ុនបានប្រកាសដាក់ប្រទេស រួមមានទីក្រុងសំខាន់ៗរបស់ខ្លួន ក្នុងគ្រាមានអាសន្ន ក្រោយបន្តរកឃើញអ្នកវិជ្ជមានកូវីដ១៩ក្នុងចំនួនដ៏ព្រួយបាម្ភ។
ការដាក់ប្រទេសក្នុងគ្រាមានអាសន្នលើកនេះនឹងផ្តើមធ្វើឡើងពីថ្ងៃអាទិត្យសប្តាហ៍នេះរហូតដល់ថ្ងៃទី១១ខែឧសភា ដោយនឹងរាប់បញ្ចូលក្រុងតូក្យូ និងខេត្ត៣ផ្សេងទៀតរួមមាន អូសាកា ក្យូតូ និង ខេត្តយ៉ូហ្គោ។
មែនទែនទៅ ការដាក់ប្រទេសក្នុងគ្រាមានអាសន្នជាជម្រើសចុងក្រោយបំផុតហើយសម្រាប់ប្រទេសជប៉ុន ដោយហេតុថាវិធានការរិតបណ្តឹងសុវត្ថិភាពកន្លងមកពុំសូវទទួលបានប្រសិទ្ធភាព ខណៈដែរគ្រែសម្រាប់អ្នកជំងឺក៏បាននិងកំពុងបង្កការព្រួយបារម្ភពីការខ្វះខាតផងដែរ។
សូមជម្រាបថា វិធានការលើកនេះ នឹងតម្រូវឲ្យភោជនីយដ្ឋានដែលមានការលក់គ្រឿងស្រវឹង ត្រូវផ្អាកដំណើរការសិន ស្របពេលដែលហាងអាហារដែលមិនមានលក់គ្រឿងស្រវឹងនឹងត្រូវបិទទ្វារឈប់ទទួលភ្ញៀវត្រឹមម៉ោង៨យប់។
ដើម្បីកាត់បន្ថយការធ្វើដំណើររបស់ពលរដ្ឋ ប្រតិបត្តិករដឹកជញ្ជូនសាធារណៈ ដូចជារថភ្លើងក្រោមដី នឹងត្រូវបានរដ្ឋាភិបាលជប៉ុន ស្នើឱ្យបង្កើនជើងរថភ្លើងនៅថ្ងៃធ្វើការ ដើម្បីបញ្ជៀសការកក់ស្ទះ តែត្រូវកាត់បន្ថយចំនួនរថភ្លើងនៅថ្ងៃចុងសប្តាហ៍និងថ្ងៃឈប់សម្រាកវិញ។
សួនកម្សាន្ត រោងភាពយន្ត តម្រូវឲ្យផ្អាកដំណើរការខណៈព្រឹត្តិការណ៍កីឡា ដូចជាការប្រកួតបាល់ទាត់ តម្រូវឲ្យប្រកួតដោយបិទទ្វារ។ មានន័យថា ពុំអនុញ្ញាតឲ្យមានអ្នកគាំទ្រចូលទស្សនាឡើយ។ ដោយឡែក សម្រាប់សាលារៀនមិនទាន់តម្រូវឲ្យផ្អាកការសិក្សានៅឡើយទេ តែរដ្ឋាភិបាលជប៉ុន ទទូចឲ្យសាលារៀបចំកាលវិភាគ ដើម្បីកាត់បន្ថយការជួបប្រជុំច្រើន ដូចជាសកម្មភាពនានានៅក្រៅថ្នាក់រៀនជាដើម។
ភាពមិនប្រាកដប្រជានៃកូវីដ១៩ បង្កផលប៉ះពាល់ដល់ព្រឹត្តិការណ៍កីឡាអូឡាំពិក
បើតាមកម្រោង គណៈកម្មាធិការអូឡាំពិករបស់ជប៉ុន នឹងត្រូវចេញសេចក្តីសម្រេចនៅក្នុងខែនេះ ថានឹងអនុញ្ញាតឲ្យអ្នកនៅក្នុងស្រុក បានចូលទស្សនាព្រឹត្តិការណ៍នេះឬយ៉ាងណា។ ប៉ុន្តែបើយោងតាម Nikkei បានរាយការណ៍ថា ផែនការនេះទំនងត្រូវបានពន្យាពេលក្នុងការសម្រេចចិត្តសិន។
កងទាំង៥ពណ៌ដែលជារូបសញ្ញាព្រឹត្តិការណ៍កីឡាអូឡាំពិក ស្ថិតក្នុងក្រុងតូក្យូ ប្រទេសជប៉ុន - Xinhua
អ្វីៗមិនទាន់មានភាពច្បាស់លាស់នៅឡើយ ប៉ុន្តែបើតាមការប៉ាន់ស្មាន បុគ្គលិកសុខាភិបាលដល់ទៅជាង១ម៉ឺននាក់នឹងត្រូវការជាចាំបាច់ សម្រាប់ព្រឹត្តិការណ៍ទាំងមូល។ យ៉ាងណាមិញ ជុំវិញបញ្ហានេះ កំពុងត្រូវបានគណៈកម្មការជជែកពិភាក្សាគ្នានៅឡើយ។
អត្តពលិកនិងមន្ត្រីប្រហែល ៣០.០០០ នាក់ត្រូវបានគេរំពឹងថានឹងចូលរួមព្រឹត្តិការណ៍អូឡាំពិកលើកនេះ។ យ៉ាងណាមិញគណៈកម្មការអូឡាំពិកជប៉ុន មិនបានទាមទារឲ្យអ្នកចូលរួមទាំងអស់ចាក់វ៉ាក់សាំងជាមុននោះទេ។
សូមបញ្ជាក់ថា
ប្រទេសជប៉ុនមានអ្នកឆ្លងកូវីដ១៩សរុបជាង៥៥ម៉ឺននាក់
ខណៈអ្នកស្លាប់ដោយសារជំងឺដ៏កាចសាហាវមួយនេះមានជិត ១ម៉ឺននាក់ហើយ៕
ចុច Like Facebook Page របស់ខេមបូណូមីសនិងចូលរួមក្នុង Telegram ដើម្បីទទួលបានព័ត៌មានថ្មីៗលឿនរហ័សមុនគេ: https://t.me/cambonomist
None
