លោកមហាធៀ ស្នើឲ្យព្រះមហាក្សត្រម៉ាឡេស៊ីលុបចោលការដាក់ប្រទេសក្នុងគ្រាអាសន្ន

អតីតនាយករដ្ឋមន្ត្រីម៉ាឡេស៊ីលោក មហាធៀ មហាម៉ាត់(Mahathir Mohamad) បានដាក់ញត្តិមួយទៅកាន់វិមានជាតិម៉ាឡេស៊ីកាលពីថ្ងៃអង្គារទី២០មេសា ដោយជំរុញឱ្យព្រះមហាក្សត្រដកចេញវិញនូវវិធានការដាក់ប្រទេសក្នុងភាពអាសន្នដោយសារកូវីដ-១៩ ដោយលោកបានអះអាងថា វាបានប្រែក្លាយម៉ាឡេស៊ីទៅជាប្រទេសបែបរបបផ្តាច់ការ។ នេះបើតាមការចុះផ្សាយដោយសារព័ត៌មានអន្តរជាតិធំៗជាច្រើន។

លោក មហាធៀ មហាមាត់ អតីតនាយករដ្ឋមន្ត្រីម៉ាឡេស៊ី

ព្រះមហាក្សត្របានប្រកាសដាក់ប្រទេសម៉ាឡេស៊ីក្នុងភាពអាសន្ននៅទូទាំងប្រទេសកាលពីខែមករាកន្លងទៅ តាមការផ្តល់យោបល់របស់នាយករដ្ឋមន្ត្រី ម៉ូយីឌីន យ៉ាហ្ស៊ីន (Muhyiddin Yassin) ក្នុងគោលបំណងប្រយុទ្ធប្រឆាំងនឹងវីរុសកូវីដ១៩ ខណៈដែលករណីវិជ្ជមានកូវីដ-១៩ ជាច្រើនត្រូវបានរកឃើញក្នុងប្រទេសមួយនេះ។

ក្នុងវ័យ៩៥ឆ្នាំទៅហើយ លោក មហាធៀ កាលពីថ្ងៃអង្គារបាននាំយកញត្តិមួយ ដែលប្រមូលផ្តុំទៅដោយហត្ថលេខារបស់សកម្មជន និងអ្នកនយោបាយឯទៀតនៅម៉ាឡេស៊ីប្រមាណជិត៤ម៉ឺនហត្ថលេខា ទៅកាន់វិមានជាតិម៉ាឡេស៊ីនាទីក្រុងកូឡាឡាំពួរ ដើម្បីស្នើដល់ព្រះមហាក្សត្រឲ្យដកចេញវិញនូវការដាក់ប្រទេសក្នុងភាពអាសន្ន។

ក្នុងញត្តិនោះ បានព្រមានថា ការដាក់ប្រទេសក្នុងភាពអាសន្នយូរពេក បណ្តាលឱ្យខូចខាតដល់ សេដ្ឋកិច្ចធ្ងន់ធ្ងរ និងប៉ះពាល់ដល់លទ្ធិប្រជាធិបតេយ្យនៅប្រទេសម៉ាឡេស៊ី។

សូមបញ្ជាក់ថា បើតាមផែនការ ការដាក់ប្រទេសម៉ាឡេស៊ីក្នុងភាពអាសន្ន នឹងត្រូវបន្តដល់ខែសីហាឆ្នាំ២០២១ ប៉ុន្តែប្រសិនបើស្ថានភាពកូវីដ-១៩ មិនបានធូរស្រាលនោះទេ ម៉ាឡេស៊ីទំនងនឹងត្រូវបន្តដាក់ប្រទេសក្នុងភាពអាសន្នបន្តទៀត។

គួរជម្រាបជូនថា ម៉ាឡេស៊ីក៏ជាប្រទេសមួយ ដែលរងគ្រោះខ្លាំងណាស់ដែរ ដោយសាររលកឆ្លងកូវីដ-១៩ បើធៀបនឹងប្រទេសឯទៀត ជាពិសេសប្រទេសក្នុងតំបន់អាស៊ាន។ គិតមកទល់ពេលនេះ ម៉ាឡេស៊ីមានអ្នកឆ្លងកូវីដ-១៩ចំនួនជិត ៤០ម៉ឺននាក់ហើយ ខណៈអ្នកស្លាប់មានប្រមាណ ១ពាន់៤រយនាក់៕