ជប៉ុនផ្ដល់ឥណទានសម្បទាន និងហិរញ្ញប្បទានឥតសំណងសរុបជាង ៧១លានដុល្លារមកឲ្យកម្ពុជា

ប្រទេសកម្ពុជា និងជប៉ុននៅថ្ងៃទី១១ ខែតុលាឆ្នាំ២០២១នេះ បានចុះហត្ថលេខាលើលិខិតប្តូរសារដ៏សំខាន់មួយ ដោយក្នុងនោះ ភាគីជប៉ុនបានយល់ព្រមផ្ដល់ឥណទានសម្បទាន និងហិរញ្ញប្បទានឥតសំណងសរុបជាទឹកប្រាក់ជាង៧១លានដុល្លារអាមេរិក មកឲ្យប្រទេសកម្ពុជា សម្រាប់យកមកប្រើប្រាស់ពង្រីកសមត្ថភាពផ្គត់ផ្គង់ទឹកស្អាត និងកម្មវិធីអភិវឌ្ឍន៍សេដ្ឋកិច្ច និងសង្គម។

ឯកឧត្ដម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេសនៃព្រះរាជាណាចក្រកម្ពុជា និង ឯកឧត្ដម មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា ចុះហត្ថលេខាលើលិខិតប្ដូរសារ និងឯកសារពាក់ព័ន្ធ

បើតាម ស្ថានទូតជប៉ុនប្រចាំកម្ពុជាបានអះអាងថា ការផ្តល់ឥណទានសម្បទាន និងហិរញ្ញប្បទានឥតសំណងមកឲ្យកម្ពុជានេះ ជាការឆ្លើយតបទៅនឹងសំណើរបស់រាជរដ្ឋាភិបាលកម្ពុជានិងក្នុងគោលបំណងពង្រឹងទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងពីរ។

ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា និង ឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូតវិសាមញ្ញជប៉ុនប្រចាំកម្ពុជាបានសម្រេចចុះ លិខិតប្ដូរសារ សម្រាប់ឥណទានសម្បទាន១គម្រោង និងហិរញ្ញប្បទានឥតសំណង៥គម្រោង នៅថ្ងៃទី១១ ខែតុលា ឆ្នាំ២០២១ នៅទីស្ដីការក្រសួងការបរទេស និងសហប្រតិបត្តិការអន្តរជាតិ។

ក្នុងនោះជប៉ុនបានផ្ដល់ជំនួយឥណទានសម្បទានមានចំនួន ១គម្រោង ដែលមានទឹកប្រាក់សរុបជាង៥៧លានដុល្លារអាមេរិក សម្រាបគម្រោងពង្រីកសមត្ថភាពផ្គត់ផ្គង់ទឹកស្អាតខេត្តសៀមរាបដំណាក់កាលទី២ និងជំនួយហិរញ្ញប្បទានឥតសំណងជាង១៤លានដុល្លារអាមេរិក សម្រាប់កម្មវិធីអភិវឌ្ឍសេដ្ឋកិច្ច និងសង្គម។

គម្រាងសហប្រតិបត្តិការទាំងនេះត្រូវបានរំពឹងទុកថា នឹងចូលរួមចំណែកដល់ការអភិវឌ្ឍវិស័យនីមួយៗនាពេលអនាគត និងការយោគយល់គ្នាទៅវិញទៅមក ក៏ដូចជាការពង្រឹងទំនាក់ទំនងមិត្តភាពរវាងជប៉ុននិងកម្ពុជា។

គួរបញ្ជាក់ថា ជប៉ុនបាននឹងកំពុងបោះទុនវិនិយោគនៅក្នុងវិស័យជាច្រើននៅក្នុងប្រទេសកម្ពុជា។ ជាក់ស្តែងបើតាមក្រុមប្រឹក្សាអភិវឌ្ឍន៍កម្ពុជា (CDC) បានអនុម័តដល់ក្រុមហ៊ុនវិនិយោគជប៉ុនចំនួន ២១១ គម្រោងជាមួយនឹងទុនវិនិយោគជាង ៣ពាន់ ១០០ លានដុល្លារអាមេរិក។

សូមជម្រាបដែរថា កន្លងមកនេះ ជប៉ុនបានផ្ដល់ជំនួយមកកាន់ប្រទេសកម្ពុជាជាបន្ទាប់បន្ទាប់ទាំងថវិកា និងសម្ភារ។ ជាក់ស្ដែង កាលពីពេលថ្មីៗនេះ ជប៉ុនក៏បានផ្ដល់វ៉ាក់សាំងកូវីដ១៩ចំនួន ១លានដូសមកឲ្យប្រទេសកម្ពុជាផងដែរ៕