ត្រង់ចំណុចនេះ សម្ដេច ហ៊ុន សែន ក៏បានស្នើឲ្យបណ្ដាប្រទេសម្ចាស់បំណុលនានាគួរប្រើវិធីសាស្រ្តដូចប្រទេសជប៉ុន ដើម្បីដោះបំណុលដែលកម្ពុជាបានជំពាក់។
ថ្លែងនៅក្នុងពិធីអបអរសាទរខួបអនុស្សាវរីយ៍លើកទី១៣៧ នៃទិវាពលកកម្មអន្តរជាតិ១ឧសភា និងពិធីបើកការដ្ឋានសាងសង់ចំណតផែកុងតឺន័រ នៅខេត្តព្រះសីហនុ និងពិធីអបអរសាទរខួបអនុស្សាវរីយ៍លើកទី៧០ នៃទំនាក់ទំនងការទូតរវាងកម្ពុជា និងជប៉ុន នៅថ្ងៃទី១ ខែឧសភា ឆ្នាំ២០២៣ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានបញ្ជាក់ពីទំនាក់ទំនងនៃការធ្វើពាណិជ្ជកម្មរវាងកម្ពុជា និងជប៉ុន ពិសេសការចូលរួមរបស់ជប៉ុន ក្នុងការអភិវឌ្ឍសង្គម និងសេដ្ឋកិច្ចនៅកម្ពុជា តាមរយៈការផ្ដល់ជំនួយឥតសំណង ប្រាក់កម្ចី និងការជួយសម្រួលការដោះបំណុលដែលកម្ពុជាជំពាក់ជប៉ុនជាដើម។
បើតាមសម្ដេច ហ៊ុន សែន វិធីសាស្រ្តក្នុងការដោះបំណុលដែលកម្ពុជាបានជំពាក់ជប៉ុននោះ គឺជប៉ុនបានផ្ដល់ទំនិញមួយចំនួនសម្រាប់លក់នៅកម្ពុជា ដើម្បីឲ្យកម្ពុជាមានលទ្ធភាពសងបំណុលទៅជប៉ុនវិញ។ សម្ដេចបានថ្លែងអំណរគុណដល់ប្រទេសជប៉ុន ដែលមានវិធីដោះបំណុលយ៉ាងល្អដល់កម្ពុជា ដែលប្រទេសផ្សេងៗ អាចយកធ្វើជាគំរូបាន។
ដោយឡែក ជុំវិញទំហំពាណិជ្ជកម្មទ្វេរភាគីកម្ពុជា-ជប៉ុន ត្រូវបានសម្ដេច ហ៊ុន សែន គូសបញ្ជាក់ថា កាន់តែស៊ីជម្រៅ និងរីកចម្រើនគួរឲ្យកត់សម្គាល់។ ជាក់ស្ដែង បើតាមរបាយការណ៍ដែលបង្ហាញដោយសម្ដេច ហ៊ុន សែន ទំហំពាណិជ្ជកម្មរវាងកម្ពុជា-ជប៉ុន នៅឆ្នាំ២០២២ កន្លងទៅ បានឡើងដល់ជិត ២ពាន់លានដុល្លារ ដោយក្នុងនោះ កម្ពុជាបាននាំចេញទៅជប៉ុន ក្នុងទំហំទឹកប្រាក់ជាង ១ពាន់លានដុល្លារ និងជប៉ុននាំចូលមកកម្ពុជាវិញ មានទំហំទឹកប្រាក់ជាង ៧០០លានដុល្លារ។ សម្ដេចបានបង្ហាញក្ដីរំពឹងថា ការធ្វើពាណិជ្ជកម្មរវាងកម្ពុជា-ជប៉ុន នឹងកាន់តែល្អប្រសើរ ជាពិសេសការនាំចេញរបស់កម្ពុជា ទៅកាន់ទីផ្សារជប៉ុនកាន់តែកើនឡើងថែមទៀត ខណៈប្រទេសទាំងពីរ គឺជាសមាជិកនៃកិច្ចព្រមព្រៀង RCEP។
សូមបញ្ជាក់ថា ប្រទេសកម្ពុជា និងជប៉ុន ថ្មីៗនេះ ក៏ទើបតែដំឡើងកម្រិតទំនាក់ទំនងទ្វេភាគី ពីដៃគូយុទ្ធសាស្ត្រ មកជា ដៃគូយុទ្ធសាស្ត្រគ្រប់ជ្រុងជ្រោយ ផងដែរ ដោយការប្រកាសពីកម្រិតទំនាក់ទំនងថ្មីនេះ បានធ្វើឡើងនៅក្នុងជំនួបទ្វេភាគីរវាងប្រមុខរាជរដ្ឋាភិបាលកម្ពុជា និងជប៉ុន នៅក្រៅកិច្ចប្រជុំអាស៊ាន ដែលបានធ្វើឡើងកាលពីខែវិច្ឆិកា កន្លងទៅ ហើយវានឹងក្លាយជាកត្តាលីករសម្រាប់កម្ពុជាក្នុងការស្រូបទាញការវិនិយោគ ពាណិជ្ជកម្មពីប្រទេសជប៉ុនកាន់តែច្រើនបន្ថែមទៀត នាពេលអនាគត។ នៅរយៈពេល ៣០ឆ្នាំ នៃទំនាក់ទំនងសេដ្ឋកិច្ច និងកិច្ចសហប្រតិបត្តិការអភិវឌ្ឍន៍កម្ពុជា-ជប៉ុន មានការរីកចម្រើនឥតឈប់ឈរ ពោលចាប់ពីឆ្នាំ១៩៩៤ រហូតមកដល់ ខែកក្កដា ឆ្នាំ២០២២ ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងក្រុមហ៊ុនជប៉ុនវិនិយោគនៅកម្ពុជាសរុបចំនួន ១៤៨គម្រោង ដែលមានទុនវិនិយោគសរុបជិត ៣ពាន់លានដុល្លារអាមេរិក៕
