តើយុវជនគួរត្រៀមខ្លួនបែបណា ដើម្បីចូលទីផ្សារការងារក្នុងយុគសម័យឌីជីថល?

ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានថ្លែងថា ការត្រៀមខ្លួនចូលក្នុងទីផ្សារការងារ គឺផ្ដើមចេញពីការជ្រើសរើសការសិក្សានៅសាកលវិទ្យាល័យ។ ឯកឧត្តមបានចាត់ទុកការសម្រេចចិត្តចូលរៀនក្នុងមុខជំនាញ និងកម្រិតណាមួយ គឺជាការសម្រេចចិត្ត និងជាជំហានទី១ ដែលជាមូលដ្ឋានក្នុងការចាប់យកទីផ្សារការងារនាពេលខាងមុខ។ ទន្ទឹមនេះ ឯកឧត្តម ក៏បានចាត់ទុកសកម្មភាពដែលរួមសហការគ្នាធ្វើ គឺជាចំណែកដ៏សំខាន់នៃយុទ្ធសាស្រ្តអភិវឌ្ឍន៍ការងារ សន្តិសុខសង្គម និងបណ្ដុះបណ្ដាលវិជ្ជាជីវៈ ដែលស្របជាមួយយុទ្ធសាស្រ្តបញ្ចកោលដំណាក់កាលទី១របស់រាជរដ្ឋាភិបាលកម្ពុជា នីតិកាលទី៧នៃរដ្ឋសភា។

​ជុំវិញការរៀបចំវេទិកាការងារ និងសិក្ខាសាលាចែករំលែកចំណេះដឹងស្តីពី«ការត្រៀមខ្លួនចូលទីផ្សារការងារក្នុងយុគសម័យឌីជីថល»នេះដែរ ត្រូវបានលោកបណ្ឌិត ផុន ណារិន នាយកសាកលវិទ្យាល័យពាណិជ្ជសាស្ដ្រ អេស៊ីលីដា ចាត់ទុកថា គឺជាឱកាសដ៏សំខាន់សម្រាប់និស្សិត ដែលកំពុងសិក្សា ហើយត្រៀមស្វែងរកការងារធ្វើនៅតាមក្រុមហ៊ុននានា។

​ជាមួយគ្នានេះ និស្សិតនៅសាកលវិទ្យាល័យពាណិជ្ជសាស្ដ្រ អេស៊ីលីដា បានចាត់ទុកការរៀបចំវេទិកាការងារ និងសិក្ខាសាលាចែករំលែកចំណេះដឹង គឺជាឱកាសដ៏ល្អសម្រាប់និស្សិតក្នុងការស្វែងរកការងារ ដ្បិតការងារមួយចំនួនពុំត្រូវការបទពិសោធន៍នោះទេ។ ការណ៍នេះ នឹងជួយឱ្យពួកគេទទួលបានបទពិសោធន៍ការងារដំបូង ដើម្បីឈានដល់ការដើរតាមក្ដីស្រមៃរបស់ខ្លួន។ បើតាមក្រុមនិស្សិតនៅសាកលវិទ្យាល័យនេះ គឺពួកគេបានត្រៀមខ្លួនរួចរាល់ក្នុងការចាប់យកឱកាសការងារនៅតាមក្រុមហ៊ុននានា ដែលកំពុងមានតម្រូវការបុគ្គលិក។

​គួរបញ្ជាក់ថា នៅក្នុងយុគសម័យឌីជីថលប្រព័ន្ធបច្ចេកវិទ្យាបានដើរតួនាទីយ៉ាងសំខាន់ក្នុងការបម្រើឱ្យការធ្វើធុរកិច្ច ពាណិជ្ជកម្ម និងការផ្តល់សេវាកម្មនានាទាំងក្នុងវិស័យរដ្ឋនិងឯកជន ជាពិសេសក្នុងជីវភាពរស់នៅប្រចាំថ្ងៃរបស់ប្រជាពលរដ្ឋតែម្តង។ កត្តានេះ វានឹងក្លាយឱកាសសម្រាប់សិស្ស និស្សិត ដែលរៀនក្នុងជំនាញនេះ ក្នុងការទទួលបានឱកាសការងារល្អៗជាមួយនឹងប្រាក់ចំណូលខ្ពស់ សម្រាប់លើកកម្ពស់ជីវភាពគ្រួសារ៕

អត្ថបទ៖ បូ ដូឡា​