ការសិក្សាមួយនៅអាហ្វ្រិកខាងត្បូង គឺជាការធ្វើតេស្តផ្ទាល់ទៅលើប្រសិទ្ធភាពវ៉ាក់សាំងប្រឆាំងនឹងកូវីដ-១៩បំប្លែងថ្មី «ឌែលតា» ដែលឆ្លងខ្លាំងនៅសហរដ្ឋអាមេរិក និងនៅជុំវិញពិភពលោក ។ ហើយលទ្ធផលបឋមនៃការសិក្សានេះត្រូវបានក្រសួងសុខាភិបាលអាហ្រ្វិកខាងត្បូងប្រកាសកាពីថ្ងៃសុក្រ (ថ្ងៃទី៦ ខែសីហា ឆ្នាំ២០២១) ។
នៅក្នុងការសិក្សា អ្នកស្រាវជ្រាវបានវាយតម្លៃប្រសិទ្ធភាពវ៉ាក់សាំង Johnson & Johnson ដែលចាក់តែមួយដូស នៅលើខ្លួនបុគ្គលិកសុខាភិបាលជិត ៥សែននាក់ ដែលជាបុគ្គលិកជួរមុខប្រឈមខ្លាំងនឹងការឆ្លងកូវីដ-១៩ ។
អត្ថបទទាក់ទង
លទ្ធផលបង្ហាញថា វ៉ាក់សាំង Johnson & Johnson មានប្រសិទ្ធភាព ៩៥% បង្ការការស្លាប់ ដែលបង្កដោយមេរោគបំប្លែងថ្មី «ឌែលតា» និង មានប្រសិទ្ធភាព ៧៥% បង្ការការឈឺធ្ងន់ធ្ងន់ ។ ចំណែកឯ មេរោគបំប្លែងថ្មី ឈ្មោះ «បេតា»វិញ ប្រសិទ្ធភាពវ៉ាក់សាំង Johnson & Johnson មានកម្រិតទាបជាងប្រសិទ្ធភាពប្រឆាំងនឹង «ឌែលតា» បន្តិច ។
ការសិក្សាបានរកឃើញថា នៅពេលការឆ្លងបានកើតឡើងលើអ្នកស្ម័គ្រចិត្តដែលបានចាក់វ៉ាក់សាំងរួច មេរោគបង្ករោគសញ្ញាស្រាលៗ នៅក្នុងអត្រា ៩៦% នៃចំនួនអ្នកដែលបានឆ្លង និងបណ្ដាលឲ្យឈឺធ្ងន់ធ្ងរ ឬស្លាប់បាត់បង់ជីវិត ក្នុងអត្រាតិចជាង ០,០៥% ។ ការសិក្សានេះ បានធ្វើឡើងពីខែកុម្ភៈ ដល់ខែឧសភា ឆ្នាំនេះ ៕
