យោងតាមការស្ទង់មតិមួយ ដែលធ្វើឡើងដោយ អាកាសយានដ្ឋានអន្តរជាតិ អ៊ិនឈុន របស់ប្រទេសកូរ៉េបានរកឃើញថា ជនជាតិកូរ៉េខាងត្បូង និងជនជាតិដទៃទៀត គឺពេញចិត្តនឹងការធ្វើដំណើរទៅក្រៅប្រទេស នៅពេលដែលវ៉ាក់សាំងកូវីដ១៩ ត្រូវបានអភិវឌ្ឍឡើងដោយជោគជ័យ។
ក្នុងនោះ ៧០% នៃជនជាតិកូរ៉េ និង ៨២% នៃជនជាតិចម្រុះ ឆ្លើយថា យល់ស្របនឹងការលើកឡើងខាងលើ ហើយជនជាតិចម្រុះ ដែលបានចូលរួមការស្ទង់មតិនេះ គឺមកពីប្រទេសចិន ជប៉ុន និងវៀតណាម។
អត្ថបទទាក់ទង!
ទោះយ៉ាងណាក៏ដោយ មានតែ ៣៣% នៃអ្នកឆ្លើយតប បានយល់ស្របទៅនឹង ការធ្វើដំណើរនៅពេលវ៉ាក់សាំង បង្កើតឡើងបាន ៣ ទៅ ៦ខែ ពោលគឺពួកគេ នៅមានក្តីព្រួយបារម្ភច្រើននៅឡើយ។
កាលពីពាក់កណ្តាលខែធ្នូ ឆ្នាំ ២០២០នេះ រដ្ឋាភិបាលប្រទេសកូរ៉េខាងត្បូង ក៏បានប្រកាសអះអាងថា នឹងមានវ៉ាក់សាំង សម្រាប់ប្រជាជន ៤៤លាននាក់ ដោយប្រមូលមកពី អ្នកផលិតវ៉ាក់សាំងចំនួន ៤កន្លែង និងទិញពីគម្រោងវ៉ាក់សាំងនានា នៅទូទាំងសកលលោក ហើយកញ្ចប់វ៉ាក់សាំងដំបូងបំផុត នឹងមកដល់នៅដើមឆ្នាំ ២០២១។
បើតាមការស្ទង់មតិដដែលនេះ ៧០% នៃអ្នកឆ្លើយតប នឹងធ្វើការចាក់វ៉ាក់សាំង នៅពេលដែលមានវ៉ាក់សាំង ហើយក្នុងនោះ ជនជាតិកូរ៉េ ភាគច្រើនយល់ឃើញថា ពួកគេ នឹងអាចធ្វើដំណើរកម្សាន្តទៅក្រៅប្រទេសបាន នៅពេលដែលចាក់វ៉ាក់សាំងរួចរាល់។
គួរជម្រាបដែរថា យោងតាមលទ្ធផលខាងលើនេះ អាកាសយានដ្ឋានរបស់កូរ៉េ នឹងធ្វើការត្រៀមខ្លួនឲ្យបានរួចរាល់ ដើម្បីដឹកជញ្ជូនអ្នកដំណើរក្នុងស្រុក ហោះចេញទៅក្រៅប្រទេស និងចំាទទួលភ្ញៀវទេសចរបរទេសផងដែរ នៅពេលដែលបញ្ហាមេរោគកូវីដ១៩ ត្រូវបានដោះស្រាយដោយ វ៉ាក់សាំងកូវីដ១៩៕
None
