តើទំនាក់ទំនងរវាងអាម៉េរិក និងហ្គ្រីនលែន កាន់តែអាប់អួរ ឬយ៉ាងណា ក្រោយកោះនេះបដិសេធមិនស្វាគមន៍ដំណើរទស្សនកិច្ចរបស់អនុប្រធានាធិបតីអាម៉េរិក?

ការបដិសេធមិនស្វាគមន៍ដំណើរទស្សនកិច្ចនេះ ចង់ ឬមិនចង់វានឹងធ្វើឱ្យទំនាក់ទំនងរវាងសហរដ្ឋអាម៉េរិក ជាមួយកោះហ្គ្រីនលែន និងដាណឺម៉ាក ដែលកំពុងល្អក់កករស្រាប់ហើយនោះកាន់តែអាប់អួរបន្ថែមទៀត។

អនុប្រធានាធិបតីអាម៉េរិក លោក ជេឌី វ៉ាន់ និយាយកាលពីពេលថ្មីៗថា លោក និងភរិយានឹងធ្វើដំណើរទៅហ្រ្គីនលែន នៅចុងសប្តាហ៍នេះ ដើម្បីពិនិត្យមើលស្ថានភាពសន្តិសុខនៅលើដែនកោះមួយនេះ ប៉ុន្តែមេដឹកនាំហ្រ្គីនលែន និងដាណឺម៉ាក បានបង្ហាញការមិនស្វាគមន៍ និងបានរិះគន់ដំណើរទស្សនកិច្ចនេះថា ជាសកម្មភាពបង្កហេតុ។ ការបដិសេធមិនស្វាគមន៍ដំណើរទស្សនកិច្ចនេះ ចង់ ឬមិនចង់វានឹងធ្វើឱ្យទំនាក់ទំនងរវាងសហរដ្ឋអាម៉េរិក ជាមួយកោះហ្គ្រីនលែន និងដាណឺម៉ាក ដែលកំពុងល្អក់កករស្រាប់ហើយនោះកាន់តែអាប់អួរបន្ថែមទៀត។

នាយករដ្ឋមន្ត្រីហ្រ្គីនឡែន លោក មូត អ៊ិហ្គេត (Mute Egede) បានរិះគន់ដំណើរទស្សនកិច្ចនេះថា ជាទង្វើបង្កហេតុឱ្យច្បាស់ក្រឡែត ដ្បិតវាធ្វើឡើងក្រោយប្រធានាធិបតី ដូណាល់ ត្រាំ បានគំរាមយកកោះនេះដាក់ឱ្យស្ថិតនៅក្រោមការគ្រប់គ្រងរបស់សហរដ្ឋអាម៉េរិក។

ពាក់ព័ន្ធនឹងដំណើរទស្សនកិច្ចរបស់អនុប្រធានាធិបតីអាមេរិកនេះដែរ នាយករដ្ឋមន្រ្តីប្រទេសដាណឺម៉ាក លោកស្រី មេត ហ្រ្វេដឺរិចសេន (Mette Frederiksen) បានលើកឡើងថា សហរដ្ឋអាម៉េរិក កំពុងអនុវត្តនូវអ្វី ដែលហ្រ្គីនលែន មិនអាចទទួលយកបាន។ លោកស្រីបានរិះគន់គណៈប្រតិភូអាម៉េរិក ដែលគ្រោងធ្វើដំណើរទស្សនកិច្ចទៅកាន់ហ្រ្គីនលែន ដែលជាទឹកដីរបស់ដាណឺម៉ាក ដែលប្រធានាធិបតីសហរដ្ឋអាម៉េរិក លោក ដូណាល់ ត្រាំ ចង់បានថា ជាដំណើរទស្សនកិច្ចដែលមិនអាចទទួលយកបាន។

លោកស្រីបានចាត់ទុកដំណើរទស្សនកិច្ចរបស់អនុប្រធានាធិបតីសហរដ្ឋអាម៉េរិកថា ជាដំណើរទស្សនកិច្ច ដែលហ្រ្គីនលែន និងដាណឺម៉ាក មិនចង់បាន។ ដំណើរទស្សនកិច្ចរបស់អនុប្រធានាធិបតីអាម៉េរិកនេះធ្វើឡើងនៅចំពេលមានភាពតានតឹងផ្នែកនយោបាយរវាងហ្រ្គីនលែន និងដាណឺម៉ាកផងដែរ ដោយសារហ្រ្គីនលែន ក៏កំពុងទាមទារឯករាជ្យភាពពីដាណឺម៉ាក ផងដែរ៕

ដោយៈ សរ សុជាតិ