ក្រុមហ៊ុន LG Chem បានចុះអនុស្សារណៈនៃការយោគយល់ជាមួយរដ្ឋ Tennessee ដើម្បីសង់រោងចក្រកាហ្សូតថ្មីមួយ លើទំហំផ្ទៃដី ១៧០ហិចតា ដែលនឹងក្លាយជារោងចក្រដ៏ធំបំផុតរបស់ក្រុមហ៊ុនកូរ៉េនេះ លើទឹកដីអាមេរិក។ រោងចក្រនេះ នឹងផលិតកាហ្សូត (cathode)ឱ្យបាន ១២ម៉ឺនតោនក្នុងមួយឆ្នាំរហូតដល់ឆ្នាំ២០២៧ សម្រាប់ការផលិតអាគុយ ដែលបំពាក់លើរថយន្តអគ្គិសនីបានចំនួន ១លាន ២សែនគ្រឿង។ កាហ្សូតនេះ គឺជាវត្ថុធាតុដើមដ៏សំខាន់សម្រាប់ការផលិតអាគុយរថយន្ដអគ្គិសនី។
លោក Shin Hak-cheol នាយកប្រតិបត្តិក្រុមហ៊ុន LG Chem បាននិយាយថា រោងចក្រកាហ្សូតថ្មីនេះ នឹងនាំក្រុមហ៊ុនបោះជំហានដ៏ធំមួយទៀត ក្នុងការក្លាយជាអ្នកផលិតវត្ថុធាតុដើមសម្រាប់អាគុយដ៏ល្អបំផុតក្នុងពិភពលោក និងបំពេញនូវចក្ខុវិស័យរបស់ខ្លួន ក្លាយជាក្រុមហ៊ុនវិទ្យាសាស្រ្តសាកលនាំមុខគេផងដែរ។
អត្ថបទគួរអាន
គួរដឹងថា រដ្ឋាភិបាលក្រុងវ៉ាស៊ីនតោន បានបញ្ចេញសកម្មភាពនានា ដើម្បីធានាដល់ខ្សែចង្វាក់ផ្គត់ផ្គង់អាគុយរថយន្តអគ្គិសនីក្នុងប្រទេស ដើម្បីពង្រឹងឧស្សាហកម្មមួយនេះ។ រាល់អ្នកទិញរថយន្តអគ្គិសនី ដែលផលិតនៅអាមេរិក តាមរយៈការប្រើប្រាស់វត្ថុធាតុដើម ដែលផលិតក្នុងប្រទេស គឺអាចទទួលបានការបន្ធូរបន្ថយពន្ធរហូតដល់ ៧៥០០ដុល្លារ ទៅតាមប្រភេទ និងទំហំអាគុយរថយន្ត ក្រោមច្បាប់ស្តីពីការកាត់បន្ថយអតិផរណា ដែលបានចេញកាលពីខែសីហាកន្លងទៅ។
ក្រុមហ៊ុនផលិតរថយន្តសាកល កំពុងត្រៀមរៀបចំបង្កើតខ្សែចង្វាក់ផលិតកម្មរថយន្តអគ្គិសនីនៅអាមេរិក ដើម្បីទាក់ទាញអតិថិជនដែលទទួលបានផលប្រយោជន៍ពីការបន្ធូរបន្ថយពន្ធនេះ។ ក្នុងនោះក្រុមហ៊ុនកូរ៉េ Hyundai កាលពីខែមុន បានវិនិយោគ ៥ពាន់ ៥រយលានដុល្លារលើរថយន្តអគ្គិសនី និងអាគុយ នៅរដ្ឋ Georgiaផងដែរ។ ទោះយ៉ាងណាមិញ មកដល់ពេលនេះ រថយន្តអគ្គិសនីរបស់ Hyundai នៅមិនទាន់មានក្នុងបញ្ជីឧបត្ថម្ភធនរបស់រដ្ឋាភិបាលអាមេរិកនោះទេ ខណៈក្រុមហ៊ុនកូរ៉េមួយនេះ មិនទាន់បានផលិតរថយន្តអគ្គិសនីនៅក្នុងប្រទេសនេះនៅឡើយ។
អ្នកវិភាគរបស់ធនាគារវិនិយោគ Goldman Sachs ជឿជាក់ថា តម្រូវការសម្រាប់អាគុយអាចនឹងបំពេញគ្រប់គ្រាន់ ដោយគ្មានការផ្គត់ផ្គង់ពីប្រទេសចិន ក្នុងរយៈពេល ៣ ទៅ ៥ឆ្នាំក្រោយ ដោយសារតែការវិនិយោគរបស់ក្រុមហ៊ុនកូរ៉េ LG និង SK Hynix នៅលើទឹកដីអាមេរិក ខណៈដែលប្រទេសចិន បានផលិតអាគុយប្រមាណ ៣ ភាគ ៤ នៃអាគុយក្នុងពិភពលោក ហើយក៏គ្របដណ្តប់លើការផលិតរ៉ែ និងគ្រឿងបង្គុំសម្រាប់អាគុយផងដែរ៕
អត្ថបទ៖ នៅ សំភី
