ថៃ ក្លាយជាប្រទេសដំបូងគេនៅអាស៊ីអាគ្នេយ៍ ដែលអនុញ្ញាតឲ្យអ្នកស្រឡាញ់ភេទដូចគ្នារៀបការដោយស្របច្បាប់

ក្រោយការឡាយព្រះហស្ថលេខារបស់ព្រះមហាក្សត្រថៃ ច្បាប់ស្ដីពីសមភាពអាពាហ៍ពិពាហ៍នេះ នឹងត្រូវចូលជាធរមានក្នុងរយៈពេល១២០ថ្ងៃទៀត ដែលត្រូវនឹងថ្ងៃទី២២ ខែមករា ឆ្នាំ២០២៥ ហើយប្រទេសថៃ នឹងក្លាយជាប្រទេសទី៣ នៅក្នុងតំបន់អាស៊ី ដែលទទួលស្គាល់ស្របច្បាប់ការរៀបការអ្នកស្រឡាញ់ភេទដូចគ្នា បន្ទាប់ពី កោះតៃវ៉ាន់ និងប្រទេសនេប៉ាល់។

មែនទែនទៅ ប្រទេសថៃ បានល្បីជាយូរមកហើយថា ជាឋានសួគ៌សម្រាប់សហគមន៍ស្រឡាញ់ភេទដូចគ្នានៅក្នុងតំបន់។ ជាក់ស្ដែង បើតាមទិន្នន័យពីស្ថាប័ន Asia Pacific Transgender Network បានបានឲ្យដឹងថា ទោះបីជា​មិនមានទិន្នន័យជាក់លាក់ក៏ដោយចុះ ប៉ុន្ដែតាការប៉ាន់ស្មានរបស់ស្ថាប័ននេះ នៅប្រទេសថៃ មានអ្នកស្រឡាញ់ភេទដូចគ្នាប្រមាណ ជាង៣១ម៉ឺននាក់។

ក្រុមសកម្មជន ដែលជាអ្នកគាំទ្រអ្នកស្រឡាញ់ភេទដូចគ្នា បានសាទរចំពោះចំណាត់ការនេះថា ជាប្រវត្តិសាស្ត្រមួយ ក្រោយពីពួកគេបានធ្វើយុទ្ធនាការជាច្រើនឆ្នាំមកហើយ ដើម្បីទាមទារសិទ្ធិសមភាពអាពាហ៍ពិពាហ៍នេះ។ សកម្មជនស្រឡាញ់ភេទដូចគ្នាឈ្មោះ អាន ឈូម៉ាផន (Ann Chumaporn) បានប្រាប់សារព័ត៌មាន BBC ថា ពេលនេះ ពួកគេមិនត្រឹមតែបានសរសេរឈ្មោះនៅលើសំបុត្រអាពាហ៍ពិពាហ៍ប៉ុណ្ណោះទេ ប៉ុន្តែក៏បានចារទុកក្នុងប្រវត្តិសាស្ត្រដែរថា ស្នេហាមិនកំណត់លក្ខខណ្ឌថាទាល់តែកើតមកជាមនុស្សបែបណានោះឡើយ។

សកម្មភាពរូបនេះបានបន្ថែមថា គាត់មានផែនការធ្វើពិធីមង្គលការជាក្រុមដ៏ធំមួយ ដោយមានគូស្វាមីភរិយាស្រឡាញ់ភេទដូចគ្នាជាង ១ ពាន់គូនៅពេលច្បាប់នេះបានចូលធរមាននៅថ្ងៃទី២២ ខែមករា ឆ្នាំក្រោយនេះ៕

អត្ថបទ៖ សុខ មង្គល