ជាមួយគ្នានោះ សម្ដេចតេជោ ហ៊ុន សែន ក៏បានស្នើផងដែរ ឲ្យប្រធានាធិបតីកូរ៉េ ដែលទើបឡើងកាន់តំណែងថ្មី ឯកឧត្តម យ៉ុន សុកយុល បន្តគាំទ្រលើគម្រោងសាងសង់ស្ពានមិត្តភាពកម្ពុជា-កូរ៉េខាងត្បូងនេះ ដែលសម្ដេចធ្លាប់បានលើកសំណើរនេះ ជូនឯកឧត្តម មូន ជេអ៊ីន អតីតប្រធានាធិបតីកូរ៉េខាងត្បូង។
សម្ដេចតេជោ ហ៊ុន សែន បានគូសបញ្ជាក់បែបនេះ ភាគីកូរ៉េបានយល់ព្រមជាមួយកម្ពុជា ក្នុងការសិក្សានិងត្រៀមផ្ដល់ហិរញ្ញប្បទាន និងជំនួយឥតសំណងសម្រាប់ការសាងសង់ស្ពានមិត្តភាពកម្ពុជា-កូរ៉េខាងត្បូង។ សម្តេចបានបញ្ជាក់ថា ជម្រើសទីតាំងនៃការសាងសង់ស្ពានមិត្តភាពកម្ពុជា-កូរ៉េនេះ មានច្រើន ប៉ុន្តែមានជម្រើសល្អតែ២ធំៗ ប៉ុណ្ណោះ។ក្នុងនោះ ជម្រើសទី១ សម្ដេចបានកំណត់ការសង់ចាប់ពីជ្រោយចង្វារ ឆ្លងកាត់ទន្លេរមេគង្គ ទៅកាន់ស្វាយជ្រុំ។ ចំណែក ជម្រើសទី២ គឺសង់ចាប់ពីផ្សាររាត្រី (សួនច្បារផ្សារចាស់) ឆ្លងកាត់ទន្លេសាប ភ្ជាប់ទៅជ្រោយចង្វារ ទើបបន្តពីជ្រោយចង្វារទៅកាន់ស្វាយជ្រុំ ដែលមានស្ពានចំនួន២។
អត្ថបទគួរអាន
លើសពីនេះ សម្តេចតេជោក៏បានសង្កត់ធ្ងន់ទៀតថា ស្ពានមិត្តភាពកម្ពុជា-កូរ៉េនេះ នឹងក្លាយជាស្ពានទំនើបដោយប្រើខ្សែកាប ដើម្បីសម្រួលដល់នាវាចរតាមទន្លេទាំង២ គឺទន្លេសាប និងទន្លេមេគង្គ ហើយនៅពេលស្ពាននេះសាងសង់រួច។ មិនត្រឹមជាមធ្យាបាយក្នុងការកាត់បន្ថយការកកស្ទះចរាចរណ៍នោះទេ សម្ដេចនាយករដ្ឋមន្រ្តីនៃកម្ពុជា ក៏មានក្ដីរំពឹងដែរថា ស្ពាននេះ នឹងអាចទាក់ទាញបានទេសចរទាំងក្នុងស្រុក និងបរទេស ផងដែរ។
ជុំវិញគម្រោងសាងសង់ស្ពានមិត្តភាពកម្ពុជា-សាធារណរដ្ឋកូរ៉េ នេះដែរ ក៏ត្រូវបានក្រុមអ្នកជំនាញក្នុងវិស័យអចលទ្រព្យ ជឿជាក់ថា តាមរយៈគម្រោងនេះវានឹងជួយជំរុញឲ្យតម្លៃអចលនទ្រព្យនៅតំបន់នោះ មានតម្លៃកាន់តែខ្ពស់បន្ថែមទៀត ខណៈបច្ចុប្បន្នតម្លៃអចលនទ្រព្យនៅតំបន់នោះកំពុងមានការកើនឡើងរួចទៅហើយ។ ក្រុមអ្នកជំនាញ ក៏បានបង្ហាញនូវគំនិតសុទិដ្ឋិនិយមទៀតថា គម្រោងនេះ វាមិនត្រឹមតែជួយលើកកម្ពស់កម្រិតជីវភាពរបស់ប្រជាពលរដ្ឋនៅតំបន់នោះឲ្យកាន់តែមានភាពល្អប្រសើរ ប៉ុណ្ណោះទេ ថែមទាំងជាផ្នែកមួយក្នុងការជួយជំរុញសេដ្ឋកិច្ចកម្ពុជាទាំងមូល ផងដែរ៕
None
