រដ្ឋមន្ត្រីក្រសួងការពារជាតិម៉ាឡេស៊ី បានលើកឡើងនៅក្នុងសេចក្ដីថ្លែងការណ៍នៅថ្ងៃអាទិត្យសប្ដាហ៍មុននេះថា ស្ថានភាពកូវីដ-១៩នៅម៉ាឡេស៊ី មិនទាន់អាចឲ្យរដ្ឋាភិបាលដកវិធានការបិទខ្ទប់ប្រទេសបាននៅឡើយទេ។
អាជ្ញាធរម៉ាឡេស៊ីបានឲ្យដឹងដែរថា នៅសប្ដាហ៍មុននេះ ប្រទេសម៉ាឡេស៊ីមានឆ្លងកូវីដ-១៩ ករណីថ្មីជាមធ្យម ៥ពាន់នាក់ក្នុងមួយថ្ងៃ ខណៈអ្នកស្លាប់វិញក៏មានរាប់សិបនាក់ក្នុងមួយថ្ងៃផងដែរ។ សេវាថែទាំ ក៏ដូចជាគ្រែពេទ្យសម្រាប់អ្នកជំងឺ គឺស្ទើរតែពេញអស់ទៅហើយសម្រាប់ការព្យាបាលអ្នកជំងឺកូវីដ-១៩ ខណៈដែលចំនួនអ្នកដែលបានចាក់វ៉ាក់សាំងគ្រប់ចំនួន២ដូសវិញ មានត្រឹមតែជាង ៦%ប៉ុណ្ណោះ នៃចំនួនប្រជាជនសរុបនៅក្នុងប្រទេសម៉ាឡេស៊ី។
អត្ថបទទាក់ទង
បើតាមរដ្ឋាភិបាលប្រទេសនេះ
បានឲ្យដឹងថា វិធានការបិទខ្ទប់ប្រទេស នឹងត្រូវដកចេញបាន លុះត្រាណាតែ
អ្នកឆ្លងកូវីដ-១៩ប្រចាំថ្ងៃ ធ្លាក់ចុះទាបមកនៅត្រឹមជាមធ្យមប្រមាណ
៤ពាន់នាក់ក្នុង១សប្ដាហ៍។
តើអំឡុងពេលបិទខ្ទប់ ម៉ាឡេស៊ីមានការរឹតត្បិតលើសកម្មភាពអ្វីខ្លះ?
នៅអំឡុងពេលបិទខ្ទប់ មានតែវិស័យផលិតកម្ម និងសេវាកម្មសំខាន់ៗប៉ុណ្ណោះ ដែលត្រូវបានអនុញ្ញាតឲ្យបើកដំណើរការ។ ដោយឡែក ទីតាំងផ្សេងទៀត ដូចជាមជ្ឈមណ្ឌលទិញទំនិញ សាលារៀន និងសួនសាធារណៈ គឺត្រូវបិទទ្វារបណ្ដោះអាសន្ន។
ការបម្លាស់ទីរបស់ប្រជាជនក៏មានការរឹតត្បិតដែរ ដោយអនុញ្ញាតឲ្យមនុស្សតែ២នាក់ប៉ុណ្ណោះនៃសមាជិកគ្រួសារ អាចចេញក្រៅផ្ទះបាន នៅក្នុងតំបន់ខ្លួនរស់នៅក្បែរនោះ ហើយសម្រាប់ការធ្វើដំណើរឆ្លងស្រុក/ខណ្ឌ គឺត្រូវបានហាមឃាត់។
សូមបញ្ជាក់ថា នេះគឺជាការបិទខ្ទប់លើកទី២ហើយរបស់ប្រទេសម៉ាឡេស៊ី អំឡុងពេលមានការរាតត្បាតកូវីដ-១៩ ខណៈដែលការបិទខ្ទប់កាលពីលើកមុនចន្លោះពីខែមីនា ដល់ខែឧសភា ឆ្នាំ២០២០ ហើយអំឡុងពេលនោះ ព្រំដែនប្រទេសត្រូវបានបិទ ហើយសកម្មភាពសេដ្ឋកិច្ចនានាក៏ត្រូវបានផ្អាកផងដែរ៕
None
