ឯកឧត្តម វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានប្រាប់ក្រុមការងារខេមបូណូមីសតាមប្រព័ន្ធតេឡក្រាមថា ទាក់ទិនទៅនឹងការនាំស្វាយចេញជាផ្លូវការទៅកាន់ប្រទេសចិននេះដែរ ក្រសួងកំពុងតែរង់ចាំចម្លើយពីអគ្គរដ្ឋបាលគយចិននៅឡើយទេ ព្រោះថា ភ្នាក់ងាររបស់អគ្គរដ្ឋបាលគយចិននៅទីក្រុងណាននីង ខេត្តគ័ងស៊ីបានធ្វើរបាយការណ៍ទៅហើយ តែមិនទាន់មានការឆ្លើយថាអនុញ្ញាតឬយ៉ាងណានោះទេ។
ឯកឧត្តម វេង សាខុន បញ្ជាក់ថា កម្ពុជាបានត្រៀមខ្លួនរួចជាស្រេចហើយ បើសិនជាអគ្គរដ្ឋបាលគយចិន យល់ព្រមបើកផ្លូវនៅពេលណានោះ កម្ពុជាអាចនាំចេញបានភ្លាម តែអ្វីដែលឯកឧត្តមព្រួយបារម្ភនោះ គឺរដូវស្វាយជិតផុតហើយ ដោយរំពឹងថា ភាគីចិនអាចអនុញ្ញាតឆាប់ៗ។
ឧកញ៉ា ហ៊ុន ឡាក់ អ្នកជំនួញដ៏ល្បីផ្នែកកសិកម្មនៅកម្ពុជា ដែលបានវិនិយោគដាំដុះ និងនាំចេញដំណាំដែលមានសក្តានុពលទៅក្រៅប្រទេសដូចជា ស្វាយនិងចេកជាដើមនោះ បានប្រាប់ខេមបូណូមីសថា លោកបានទទួលដំណឹងខ្លះដែរពីអគ្គនាយកដ្ឋានកសិកម្មថា ការនាំចេញស្វាយជាផ្លូវការទៅប្រទេសចិនអាចនឹងធ្វើឡើងនៅចុងខែមេសានេះ ។
អត្ថបទគួរអាន
ស្របពេលដែល ពេលវេលានៃការនាំចេញស្វាយទៅចិនមិនច្បាស់លាស់ ឧកញ៉ា ហ៊ុន ឡាក់ ក៏បានគូសបញ្ជាក់ដែរ រដូវប្រមូលផលស្វាយនឹងផុតនៅចុងខែឧសភានេះហើយ ដូចនេះ បើទោះបីជាមានការអនុញ្ញាតឲ្យនាំចេញស្វាយទៅចិនមែនក៏ដោយចុះ តែការនាំចេញអាចនឹងមានចំនួនតិចតួចប៉ុណ្ណោះ។
បើតាម រដ្ឋមន្ត្រីក្រសួងកសិកម្ម បើទោះជាបច្ចុបច្បន្នអគ្គរដ្ឋបាលគយចិនមិនទាន់មានការយល់ព្រមឲ្យមានការនាំចេញស្វាយទៅចិនជាផ្លូវការក្តី តែស្វាយដែលកម្ពុជា នាំចេញទៅតាមរយៈប្រទេសជិតខាង ដូចជាថៃ និងវៀតណាម គឺនៅតែអាចនាំចេញបានធម្មតា បើទោះស្ថិតនៅក្នុងកាលៈទេសៈនៃការរីករាលដាលជំងឺកូវីដ១៩ខ្លាំងយ៉ាងណាក៏ដោយ។
សូមបញ្ជាកា់ថា គិតមកទល់ពេលនេះ មានរយៈពេលជិត១ឆ្នាំមកហើយ ដែលក្រសួងកសិកម្មកម្ពុជា និងភាគីចិន បានចុះអនុស្សារណៈយោគយល់គ្នាស្ដីពីលក្ខខណ្ឌតម្រូវភូតគមានអនាម័យ សម្រាប់ការនាំចេញស្វាយពីកម្ពុជាទៅកាន់ទីផ្សារចិន ហើយកាលពីខែមីនា ខាងភាគីគយចិនក៏បានវាយតម្លៃលើការរៀបចំការងារមួយចំនួន ដើម្បីអាចឈាននាំចេញស្វាយទៅចិនផងដែរ ប៉ុន្ដែ លទ្ធផលចុងក្រោយស្ដីពីការសម្រេចអនុញ្ញាតឲ្យនាំចេញស្វាយទៅចិននៅមិនទាន់មានការបញ្ជាក់ត្រឡប់មកវិញពីភាគីចិននៅឡើយ៕
ទស្សនាវីដេអូ៖
ចុច Like Facebook Page របស់ខេមបូណូមីស និងចូលរួមក្នុង Telegram ដើម្បីទទួលបានព័ត៌មានថ្មីៗលឿនរហ័សមុនគេ: https://t.me/cambonomist
None
