របាយការណ៍បានឲ្យដឹងទៀតថា ក្នុងចំណោមទឹកប្រាក់វិនិយោគផ្ទាល់ពីបរទេសសរុបជាង ៥.៣០០ លានដុល្លារអាមេរិកនោះ មានប្រមាណ ៤.៥០០ លានដុល្លារអាមេរិក គឺបានវិនិយោគទៅក្នុងគម្រោងថ្មីៗ និងមានការកើនឡើងរហូតដល់ទៅ ៤៥០%ឯណោះ។ ចំណែកឯ ទឹកប្រាក់វិនិយោគប្រមាណ ៣៣៤ លានដុល្លារអាមេរិកផ្សេងទៀត គឺបានវិនិយោគបន្ថែមទៅលើគម្រោងដែលមានស្រាប់ និងទុនវិនិយោគប្រមាណជិតជាង៥៣០ លានដុល្លារទៀត គឺប្រើប្រាស់ដើម្បីទិញយកភាគហ៊ុននៃក្រុមហ៊ុនក្នុងស្រុក។
នៅក្នុងខែមករាកន្លងទៅនេះដែរ វិស័យថាមពលអគ្គិសនីវៀតណាម គឺមានការទាក់ទាញវិនិយោគច្រើនជាងគេ ដែលមានប្រមាណ៤ពាន់លានដុល្លារអាមេរិក នេះបើតាមទិន្នន័យពីភ្នាក់ងារវិនិយោគបរទេសវៀតណាម។ វិស័យកម្មន្ដសាល គឺឈរលំដាប់ទី២ ដែលទទួលបានទុនវិនិយោគប្រមាណជាង ៨៥០ លានដុល្លារ ហើយត្រូវបានតាមពីក្រោយដោយវិស័យបច្ចេកវិទ្យា និងលក់ដុំ និងរាយ។
អត្ថបទទាក់ទង!
ក្នុងចំណោម ៥៩ប្រទេស និងតំបន់ ដែលបានវិនិយោគនៅវៀតណាម គឺប្រទេសសិង្ហបុរីបាននាំមុខគេ ដែលមានទុនវិនិយោគប្រមាណជាង ៤ពាន់លានដុល្លារ ឬស្មើនឹងជាង៧៨% នៃការវិនិយោគផ្ទាល់ពីបរទេសសរុប និងត្រូវបានតាមពីក្រោយដោយប្រទេសកូរ៉េខាងត្បូង ដែលមានទុនវិនិយោគ ប្រមាណជាង ២៦០ លានដុល្លារ។ ទន្ទឹមនឹងនោះ នៅក្នុងខែមករាកន្លងទៅនេះ ប្រទេសវៀតណាម ក៏បានវិនិយោគនៅក្រៅប្រទេស ប្រមាណជិត៤លានដុល្លារអាមេរិក នៅសហរដ្ឋអាមេរិក ជប៉ុន កម្ពុជា និងកូរ៉េខាងត្បូង ជាដើម។
ដ្បិតតែខែមករា កន្លងទៅនេះ ការវិនិយោគផ្ទាល់ពីក្រៅប្រទេសមានការកើនឡើងខ្លាំងក៏ពិតមែន ក៏ប៉ុន្ដែ បើយើងក្រឡេកទៅមើលការនាំចេញរបស់វៀតណាមវិញ គឺចាប់ផ្ដើមមានការថយចុះគួរឲ្យកត់សម្គាល់ ដោយ៦ខែចុងក្រោយមកនេះ សុទ្ធតែធ្លាប់ទទួលបានអតិរេកពាណិជ្ជកម្ម ប៉ុន្ដែ សម្រាប់ខែមករាកន្លងទៅនេះ បែរជាទទួលបានឱនភាពពាណិជ្ជកម្មប្រមាណ ១០០ លានដុល្លារអាមេរិកទៅវិញ។
តួយ៉ាង តាមតួលេខ ដែលការិយាល័យស្ថិតិទូទៅរបស់វៀតណាម បានបង្ហាញថា តាមការប៉ាន់ស្មាន ការនាំចេញនៅក្នុងខែមករាកន្លងទៅនេះ គឺមានតែប្រមាណ១៩ពាន់លានដុល្លារាអាមេរិកប៉ុណ្ណោះ ធ្លាក់ចុះ១៤,៣% ធៀបនឹងរយៈពេលដូចគ្នាកាលពីឆ្នាំមុន។ រីឯការនាំចូលវិញ បានធ្លាក់ចុះ១១,៣% មកនៅមានប្រមាណ ១៩ពាន់ ១០០ លានដុល្លារអាមេរិក។
សូមបញ្ជាក់ថា កាលពីឆ្នាំ២០១៩ វៀតណាមបានបំបែកកំណត់ត្រាអតិរេកពាណិជ្ជកម្មខ្ពស់បំផុត មិនធ្លាប់មាន ដែលមានរហូតដល់ទៅជាង ១១ ពាន់លានដុល្លារអាមេរិក៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
