ការជួញដូរភាគហ៊ុនជាមធ្យមនៅកម្ពុជា បានកើនដល់ជិត៣០ម៉ឺនដុល្លារក្នុង១ថ្ងៃឡើងវិញ ក្រោយដាំក្បាលចុះជាច្រើនខែមកនេះ

នៅក្នុងវេទិកា« Earning Forum 2024- ប្រាក់ចំណេញ ឆ្នាំ២០២៤» របស់ផ្សារមូលបត្រកម្ពុជា នាថ្ងៃទី២០ ខែមិថុនា ឆ្នាំ២០២៤ ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជា បានគូសបញ្ជាក់ថា ចូលមកដល់ឆ្នាំ២០២៤នេះ វិស័យមូលបត្រកម្ពុជា ហាក់បានបង្ហាញទំនោរធ្លាក់ចុះគួរឱ្យកត់សម្គាល់ ដោយនៅក្នុងរយៈពេល៤ខែដំបូងដើមឆ្នាំ២០២៤ ទំហំជួញដូរភាគហ៊ុនជាមធ្យមនៅកម្ពុជា មានក្នុងរង្វង់១០ម៉ឺនដុល្លារក្នុង១ថ្ងៃប៉ុណ្ណោះ ដោយសារសារឥទ្ធិពលពីវិបត្តិសកលនានា។ តែយ៉ាងណា ថ្នាក់ដឹកនាំរូបនេះអះអាងថា នៅរយៈពេល២ខែចុងក្រោយនេះ ទំហំជួញដូរនៅក្នុងផ្សារមូលបត្រកម្ពុជា ហាក់មានសម្ទុះកើនឡើងមកវិញ ពោលគឺបច្ចុប្បន្នការជួយដូរភាគហ៊ុនជាមធ្យមបានកើនដល់ប្រមាណជិត៣០ម៉ឺនដុល្លារក្នុង១ថ្ងៃ និងរំពឹងថា មានការកើនឡើងជាបន្តបន្ទាប់ទៀតផងដែរ។

បើតាមឯកឧត្តម ហុង សុហួរ កត្តាដែលជំរុញឱ្យទំហំជួញដូរភាគហ៊ុននៅកម្ពុជាបច្ចុប្បន្នមានកំណើនឡើងវិញ ក៏ដោយសារនៅក្នុងអំឡុងពេលតម្លៃធ្លាក់ចុះ បានជំរុញឱ្យវិនិយោគិនមួយចំនួនបានចាប់ឱកាសទិញភាគហ៊ុនជាច្រើន ដែលបណ្តាលឱ្យការជួយដូរហាក់មានភាពល្អប្រសើរឡើងវិញ។

ម្យ៉ាងទៀតបើទោះបីជាស្ថានភាពសេដ្ឋកិច្ចបច្ចុប្បន្នកំពុងស្ថិតក្នុងភាពលំបាក និងមិនទាន់មានភាពច្បាស់លាស់យ៉ាងណាក៏ដោយ ប៉ុន្តែមានក្រុមហ៊ុនធំៗមួយចំនួននៅកម្ពុជា បានបង្ហាញ មហិច្ឆតាក្នុងការមកចុះបញ្ជីនៅក្នុងផ្សារមូលបត្រកម្ពុជាជាបន្តបន្ទាប់ ដែលជំរុញឱ្យវិនិយោគិនកាន់តែមានទំនុកចិត្តក្នុងការវិនិយោគលើវិស័យមូលបត្រនៅកម្ពុជា។

​យ៉ាងណាមិញតាមរយៈវេទិកា«ប្រាក់ចំណេញ ឆ្នាំ២០២៤» នាពេលនេះ ឯកឧត្តម ហុង សុហួរ ជឿជាក់ថា វានឹងផ្តល់ឱ្យវិនិយោគិនកាន់តែទទួលបានព័ត៌មានបន្ថែមទៀតអំពីក្រមហ៊ុនចុះបញ្ជី ក្នុងការផ្សព្វផ្សាយព័ត៌មានអាជីវកម្មក៏ដូចជាលទ្ធផលហិរញ្ញវត្ថុរបស់ក្រុមហ៊ុនដល់វិនិយោគិនសាធារណៈ ហើយវានឹងធ្វើឱ្យវិនិយោគិនកាន់តែមានទំនុកចិត្តក្នុងការវិនិយោគបន្ថែមនៅក្នុងផ្សារមូលបត្រកម្ពុជាផងដែរ។

​សូមជម្រាបថា បច្ចុប្បន្នមានក្រុមហ៊ុនចំនួន២២ បានចុះបញ្ជីបោះផ្សាយលក់ភាគហ៊ុននៅផ្សារមូលបត្រកម្ពុជា ក្នុងនោះ១១ក្រុមហ៊ុនបានបោះផ្សាយលក់មូលបត្រកម្មសិទ្ធិ និង១១ក្រុមហ៊ុនបោះផ្សាយលក់សញ្ញាបណ្ណ ឬមូលបត្របំណុល។ ដោយក្រុមហ៊ុនទាំងនេះអាចប្រមូលទុនបានប្រមាណ៣៧០លានដុល្លារ ដើម្បីយកទៅពង្រីកអាជីវកម្ម៕