ការខាតបង់ដោយផ្ទាល់ពីព្យុះ Milton អាចឡើងដល់៣៤ពាន់លានដុល្លារ ហើយវាបានសម្លាប់ជីវិតមនុស្សសរុបប្រមាណជា២៤នាក់នៅទូទាំងរដ្ឋផ្លរីដា។ នេះបើតាមការប៉ាន់ស្មានរបស់ក្រុមហ៊ុនសិក្សាស្រាវជ្រាវ CoreLogic ដែលបានវាយតម្លៃទៀតថា ក្រៅពីតម្លៃខូចខាតខាងលើវានៅអាចបង្កការខូចខាតផ្សេងៗដែលមិនមានការធានាមានតម្លៃពី៤ទៅ៦ពាន់លានដុល្លារបន្ថែមទៀត។ ក្រៅពីបង្កផលប៉ះពាល់ដោយផ្ទាល់ ក្រោមឥទ្ធិពលនៃព្យុះមហាប្រល័យនេះ បានធ្វើឱ្យមានបាតុភូតព្យុះផ្សេងៗចំនួន៩ទៀត ដែលសុទ្ធតែជាបាតុភូតគ្រោះធម្មជាតិដ៏រន្ធត់ ដែលបានធ្វើឱ្យពលរដ្ឋអាម៉េរិកខូចខាតរាប់សិបពាន់លានដុល្លារ។
ពាក់ព័ន្ធនឹងបញ្ហានេះទូរទស្សន៍អាម៉េរិក CNN បានរាយការណ៍ថា កត្តាដែលធ្វើឱ្យពលរដ្ឋអាម៉េរិករងផលប៉ះពាល់ធ្ងន់ធ្ងរដោយសារព្យុះទាំងនេះ គឺដោយសារនៅតាមតំបន់ជាច្រើនមិនមានគោលនយោបាយធានារ៉ាប់រងគ្របដណ្តប់លើការខូចខាតដោយសារទឹកជំនន់ ពោលគឺធានារ៉ាប់រងតែការខូចខាតដែលបណ្តាលមកពីព្យុះ។ ព្យុះសង្ឃរា Milton និងឥទ្ធិពលរបស់វាមិនបង្កឱ្យមានទឹកជំនន់នៅកន្លែង ដែលមានសេវាកម្មធានារ៉ាប់រងគ្រប់ដណ្តប់នោះទេ ដោយវាបានបង្កនៅកន្លែងដែលគ្មានសេវាធានារ៉ាប់រង។
លោក ដានីញែល បេតធេន(Daniel Betten)នាយកផ្នែកព្យាករណ៍អាកាសធាតុនៃក្រុមហ៊ុន CoreLogic បាននិយាយថា ព្យុះសង្ឃរា Milton នៅពេលវាបោកបក់មកដល់ដីគោកនៅរដ្ឋផ្លរីដា វាបានធ្វើអន្តរកម្មបាតុភូតអាកាសធាតុ ដែលបណ្តាលឱ្យមានខ្យល់បក់នៅភាគខាងជើង និងភាគពាយ័ព្យ។
លោក ថម ឡាសេន (Tom Larsen) អនុប្រធានផ្នែកគ្រប់គ្រងហានិភ័យ នៃក្រុមហ៊ុន CoreLogic បាននិយាយថា ការខូចខាតខ្លាំងបំផុត គឺនៅតំបន់ឆ្នេរ Tampa Bay ដោយសារទីនោះគឺជាតំបន់ប្រមូលផ្តុំដ៏ធំនៃអចលនទ្រព្យ រួមទាំងលំនៅដ្ឋានចាស់ៗ ដែលគេអភិរក្ស និងហេដ្ឋារចនាសម្ព័ន្ធពាណិជ្ជកម្មដែលមានតម្លៃខ្ពស់ និងមានតម្លៃធានារ៉ាប់រងខ្ពស់៕
ដោយៈ សរ សុជាតិ
