ឯកឧត្តម ស៊ាង ថៃ អ្នកនាំពាក្យក្រសួងពាណិជ្ជកម្មកម្ពុជា បានបង្ហាញពីកត្តាមួយចំនួន ដែលធ្វើឲ្យចំណូលរបស់ក្រសួងពាណិជ្ជកម្មមានការធ្លាក់ចុះនៅឆ្នាំ២០២០កន្លេងទៅនេះ។ ការធ្លាក់ចុះនេះ កើតឡើងក្រោយក្រសួងមានការកែប្រែ និងផ្លាស់ប្តូរលើប្រព័ន្ធបញ្ជាក់ដើមកំណើតទំនិញ និងការសម្រួលលើតម្លៃកម្រៃសេវានានា។
បើតាមអ្នកនាំពាក្យរូបនេះ កាលពីឆ្នាំ២០២០២ ក្រសួងពាណិជ្ជកម្មបានសម្រេចលុបចោលការចេញវិញ្ញាបនបត្របញ្ជាក់ ដើមកំណើតទំនិញ(CO) ដល់ក្រុមហ៊ុននាំចេញ ក្នុងករណីប្រទេសបញ្ជាទិញមិនតម្រូវឲ្យមានវិញ្ញាបនបត្របញ្ជាក់ដើមកំណើនទំនិញនេះ។
ទន្ទឹមនឹងនេះ ក្រសួងពាណិជ្ជកម្មបានសម្រេចបញ្ចុះតម្លៃកម្រៃសេវាលើការចុះបញ្ជីក្រុមហ៊ុន សហគ្រាស និងតម្លៃសេវាពិនិត្យនាមករណ៍ជាដើម។ ក្នុងនោះការចុះបញ្ជីក្រុមហ៊ុនថ្មីត្រូវបានបញ្ចុះតម្លៃពីជាង១លាន៦០ម៉ឺនរៀល មកត្រឹមតែប្រមាណ១លានរៀល។ រីឯការចុះបញ្ជីសហគ្រាសត្រូវបានចុះថ្លៃពី ៣០ម៉ឺនរៀលមកត្រឹម១៨ម៉ឺនរៀល និងកម្រៃសេវាពិនិត្យនាមករណ៍ ចុះពី៤ម៉ឺនរៀលមកត្រឹម ២ម៉ឺន៥ពាន់រៀល។
អត្ថបទគួរអាន
ក្នុងចំណោមចំណូលចម្បងៗដែលក្រសួងពាណិជ្ជកម្មទទួលបានមានដូចជាចំណូលបានមកពីការចុះបញ្ជីពាណិជ្ជកម្មមានជិត២០ពាន់លានរៀលឬស្មើនឹងជិត៥លានដុល្លារអាមេរិក ខណៈដែលចំណូលទទួលបានពីការផ្ដល់វិញ្ញាបនបត្រប្រភពដើមទំនិញ និងការចេញអាជ្ញាបណ្ណ និងសេវាពាក់ព័ន្ធមានជាង២៣ពាន់លានរៀល ឬស្មើនឹងជិត៦លានដុល្លារអាមេរិក។
គួរបញ្ជាក់ថាបើតាមរបាយការណ៍ពីក្រសួងពាណិជ្ជកម្ម នៅឆ្នាំ២០២០ ទំហំពាណិជ្ជកម្មរបស់កម្ពុជាជាមួយបណ្ដាប្រទេសជាដៃគូសុរបទាំងអស់មានជិត៣៦ពាន់លានដុល្លារ កើនឡើងជាង២,៥% ក្នុងនោះ ការនាំចេញរបស់កម្ពុជាមានជាង១៧ពាន់លានដុល្លារ កើនឡើងជិត១៧% និងការនាំចូលវិញមានជាង១៨ពាន់លានដុល្លារ ថយចុះជិត៨% ធៀបនឹងឆ្នាំ២០១៩។
ដៃគូពាណិជ្ជកម្មធំៗរបស់របស់កម្ពុជានៅឆ្នាំ២០២០ រួមមាន ចិន, អាមេរិក អឺរ៉ុប ថៃ វៀតណាម និងជប៉ុនជាដើម៕
None
