កត្តានៅពីក្រោយភាពធន់របស់គ្រឹះស្ថានហិរញ្ញវត្ថុ ទោះស្ថិតក្នុងវិបត្តិកូវីដ-១៩អូសបន្លាយ

តើមានកត្តាអ្វីខ្លះ ដែលធ្វើឲ្យវិស័យនេះ នៅតែអាចរក្សាភាពរឹងមាំក្នុងការផ្តល់ឥណទាន និងរក្សាបានចំនួនឥណទានមិនដំណើរការក្នុងកម្រិតទាប?

ធនាគារជាតិនៃកម្ពុជាបានវាយតម្លៃថា នៅឆមាសទី១ឆ្នាំ២០២១ វិស័យធនាគារ និងហិរញ្ញវត្ថុនៅតែអាចរក្សាបាននូវភាពធន់ក្នុងការប្រតិបត្តិការរបស់ខ្លួន ទោះបីមានការរំខានពីការឆ្លងរាលដាលនៃជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈយ៉ាងណាក្ដី។ ជាក់ស្តែង ចរន្តទ្រព្យសកម្ម ការផ្តល់ឥណទាន និងទទួលប្រាក់បញ្ញើពីអតិថិជនក្នុងវិស័យទាំងពីរនេះ នៅតែមានកំណើនខ្ពស់គួរឲ្យកត់សម្គាល់។

បើតាមរបាយការណ៍របស់ធនាគារជាតិនៃកម្ពុជា នៅឆមាសទី១ ឆ្នាំ២០២១ ចរន្តទ្រព្យសកម្មរបស់ប្រព័ន្ធធនាគារបានកើនឡើង១៨% ការផ្តល់ឥណទានជូនអតិថិជនកើនឡើងជាង ២៣% និងប្រាក់បញ្ញើអតិថិជនកើនជិត២១%។ 

លោក ផល វ៉ាន់ឌី នាយកប្រតិបត្តិនៃសមាគមមីក្រូហិរញ្ញវត្ថុកម្ពុជា បានលើកឡើងពីហេតុផលមួយចំនួនដែលធ្វើឲ្យវិស័យមីក្រូហិរញ្ញវត្ថុនៅកម្ពុជាក្នុងឆមាសទី១ឆ្នាំ២០២១ នៅតែអាចរក្សាភាពរឹងមាំ ទោះបីមានការរំខានពីការរាតត្បាតនៃជំងឺកូវីដ-១៩។ ហេតុផលទាំងនោះរួមមានការដាក់ចេញវិធានការសុខាភិបាល និងវិធានការស្តារសេដ្ឋកិច្ច ដើម្បីធានាដល់ដំណើរអាជីវកម្ម ដែលរងគ្រោះ និងងាយរងគ្រោះដោយសារការឆ្លងនៃជំងឺកូវីដ-១៩។

របាយការណ៍បូកសរុបការងារប្រចាំឆមាសទី១ និងដាក់ទិសដៅអនុវត្តសម្រាប់ឆមាសទី២របស់ធនាគារជាតិនៃកម្ពុជាបានបង្ហាញដែរថា នៅឆមាសទី១ឆ្នាំ២០២១ ចំនួនឥណទានមិនដំណើរការក្នុងវិស័យធនាគារ និងហិរញ្ញវត្ថុ នៅតែអាចរក្សាបានក្នុងកម្រិតទាបមួយ ដែលអាចទទួលយកបាន។ ក្នុងនោះ ចំនួនឥណទានមិនដំណើរការក្នុងវិស័យធនាគារបានរក្សាក្នុងកម្រិតទាប២,៤% និងវិស័យមីក្រូហិរញ្ញវត្ថុមានក្នុងកម្រិត ២%។ 

បើតាមលោក ផល វ៉ាន់ឌី មូលហេតុដែលធ្វើឲ្យវិស័យមីក្រូហិរញ្ញវត្ថុអាចរក្សាចំនួនឥណទានមិនដំណើរការបានក្នុងកម្រិតទាប គឺបន្ទាប់ពីធនាគារជាតិ នៃកម្ពុជាបានដាក់ចេញវិធានការឲ្យគ្រឹះស្ថានធនាគារ និងមីក្រូហិរញ្ញវត្ថុរៀបចំឥណទានឡើងវិញ ដើម្បីជួយសម្រាលបន្ទុកដល់អាជីវកម្ម និងអ្នករកស៊ីដែលរងផលប៉ះពាល់ដោយសារកូវីដ-១៩។

បើតាមរបាយការណ៍របស់ធនាគារជាតិនៃកម្ពុជា នៅរយៈពេល៦ខែក្នុងឆ្នាំ២០២១ គ្រឹះស្ថានធនាគារ និងមីក្រូហិរញ្ញវត្ថុបានរៀបចំឥណទានឡើងវិញជូនអតិថិជនបានជិត ៣៧ម៉ឺនគណនីដែលមានតម្លៃប្រមាណ ៥ពាន់៥រយលានដុល្លារអាមេរិក៕