យោងតាមការព្យាករណ៍ដដែលនេះ បានឲ្យដឹងថា កម្ពុជានិងទទួលរងនូវឥទ្ធិពលសម្ពាធទាបចាប់ពីថ្ងៃ២៧-២៨ខែតុលា ខណៈតំបន់មួយចំនួនទៀត នឹងរងឥទ្ធិពលពីទ្រនុងសម្ពាធខ្ពស់ចាប់ពីថ្ងៃទី២៩ ខែតុលា រហូតដល់ថ្ងៃទី០២ ខែវិច្ចិកា។
ចំពោះការប្រៃប្រួលអាកាសធាតុខាងលើនេះដែរនឹងធ្វើឲ្យរាជធានីភ្នំពេញនិងខេត្តមួយចំនួនអាចនឹងជួបបញ្ហាគ្រោះទឹកជំនន់ ដោយសារទឹកភ្លៀងផងដែរ។ ក្នុងនោះបណ្ដាខេត្តដែលនៅតំបន់វាលទំនាបកណ្ដាល នឹងមានភ្លៀងធ្លាក់នៅក្នុងកម្រិត មធ្យម បង្គួរទៅខ្លាំង លាយឡំជាមួយខ្យល់អន្រ្ទាក់ ចាប់ពីថ្ងៃទី២៧-២៨ ខែតុលា ដែល អាចបង្កជាជំនន់ទឹកភ្លៀងទៅខេត្ត កណ្ដាល ព្រៃវែង ស្វាយរៀង តាកែវ កំពង់ធំ កំពង់ស្ពឺ ពោធិ៍សាត់និងរួមទាំងរាជធានីភ្នំពេញផងដែរ។ សម្រាប់ថ្ងៃបន្ទាប់នឹងមានភ្លៀងធ្លាក់ក្នុងកម្រិតខ្សោយនិងមធ្យមតែប៉ុណ្ណោះ។
យ៉ាងណាមិញខេត្តដែលជាប់នៅតំបន់ជួរភ្នំដងរែក និងខ្ពង់រាបឦសាន ក៏នឹងទទួលរង ឥទ្ធិពលអាកាសធាតុដូចនិងខេត្តដែលស្ថិតនៅក្នុងតំបន់ទំនាបកណ្ដាលដូចគ្នាដែរ។ ចំណែកឯខេត្តក្នុងតំបន់ជាប់មាត់សមុទ្រវិញ ក៏អាចនិងមានភ្លៀងធ្លាក់ពីកម្រិតមធ្យម លាយឡំខ្យល់កន្រ្ទាក់ ដែលអាចបង្កជាជំនន់ទឹកភ្លៀងផងដែរ ។ ចំពោះផ្ទៃសមុទ្រវិញអាចមានភ្លៀង ខ្យល់ និងរលកសមុទ្រខ្ពស់ៗ។ ក្រសួងបានបន្តថា បន្ទាប់ពីនោះនិងមានភ្លៀងធ្លាក់កម្រិតខ្សោយទៅមធ្យមតែប៉ុណ្ណោះ។
សូមជម្រាបថា ក្រសួងធនធានទឹក និងឧតុនិយមក៏បានអំពាវនាវទៅដល់បងប្អូនប្រជាពលរដ្ឋទាំងអស់មានការប្រុងប្រយ័ត្ន ចំពោះបញ្ហាដែលអាចនឹងកើតមាន ជាពិសេសត្រៀមខ្លួនជាស្រេចនូវ សម្ភារៈ គ្រឿងបរិក្ខារ ក៏ដូចជាមានការការពារខ្ពស់ដើម្បីរក្សាសុវត្ថិភាពនៅអំឡុងពេលនោះផងដែរ៕
អត្ថបទ៖ ហួន ស្រីនីត
