ជាក់ស្ដែង បច្ចុប្បន្ន គ្រាប់កាកាវ ១តោន មានតម្លៃរហូតដល់ ២ពាន់ដុល្លារ ឯណោះ។ នេះបើតាមការបញ្ជក់អះអាងលោកឧកញ៉ា ហៃ លីអ៊ាង ដែលជាអ្នកវិនិយោគលើដាំដុះកាកាវ នៅខេត្តរតនគិរី។
លោកឧកញ៉ា ហៃ លីអ៊ាង ប្រធានអគ្គនាយកក្រុមហ៊ុនផលិតឱសថ PPM និងអ្នកវិនិយោគលើការដាំដុះដំណាំកាកាវ នៅខេត្តរតនគិរីដែរនោះ បានគូសបញ្ជាក់ប្រាប់សារព័ត៌មានឌីជីថលខេមបូណូមីសថា ដំបូងឡើយលោកគ្រាន់តែសាកល្បងដំដុះដំណាំកាកាវ បន្តិចបន្តួចប៉ុណ្ណោះ តែក្រោយពីមានតម្រូវការទីផ្សារកាន់តែច្រើនលោកបានពង្រីកការដាំដុះរហូត ៣០ហិកតា។ ជាអ្នកជំនួញ និងវិនិយោគលើការដាំដុះដំណាំកាកាវ តាំងពីឆ្នាំ២០១៤មក លោកឧកញ៉ា ហៃ លីអ៊ាងបានកត់សម្គាល់ឃើញថា ទីផ្សារកាកាវកាន់តែមានតម្រូវការច្រើន ក៏ប៉ុន្តែ សម្រាប់កម្ពុជាវិញ ការដាំដុះហាក់មិនទាន់គ្រប់តាមតម្រូវការទីផ្សារនៅឡើយទេ បើទោះបី ការដាំដុះដំណាំកាកាវ និងការរក្សាទុកគ្រាប់កាកាវ ជាដើម មានភាពងាយស្រួល យ៉ាងណាក៏ដោយ។ ស្ថិតលើផ្ទៃដី ៣០ហិកតា ជាមធ្យមឧកញ៉ា ហៃ លីអ៊ាងអាចប្រមូលផលកាកាវប្រហែល២តោន ក្នុង១ឆ្នាំ ខណៈតម្លៃជាសាកលវិញ អាចលក់បាន២ពាន់ដុល្លារ ក្នុង១តោន។
អត្ថបទទាក់ទង!
យ៉ាងណាមិញ សម្រាប់ដំណាំកាកាវនេះ ត្រូវបានឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ធ្លាប់បានគូសបញ្ជាក់ថា គឺជាដំណាំថ្មីមួយប្រភេទ ដែលក្រសួងកំពុងសិក្សានៅឡើយ ខណៈការវិនិយោគលើដំណាំកាកាវ ក៏នៅមានកម្រិតដែរ។ ក៏ប៉ុន្តែ យ៉ាងណា ក្រសួងកសិកម្ម រុក្ខាប្រមាញ់និងនេសាទ នៅតែបន្តសិក្សាបន្ថែមទៀត លើដំណាំនេះ ព្រោះតែវាក៏មានទីផ្សារមិនចាញ់ដំណាំកាហ្វេនោះដែរ។ នេះជាការបញ្ជាក់របស់ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។
បើតាមអ្នកជំនាញកសិកម្មបានអះអាងទៀតថា កាកាវជារុក្ខជាតិប្រភេទដំណាំងាយស្រួលក្នុងការដាំ លក្ខខណ្ឌអាកាសធាតុសមប្រកប សម្រាប់ដំណាំប្រភេទនេះ គឺត្រូវការអាកាសធាតុក្តៅហើយសើម ជាដំណាំមិនប្រកាន់រដូវ តែមិនអាចដាំបានក្នុងតំបន់ទំនាបដក់ទឹកបានទេ វាត្រូវការទឹកពី ៧០ទៅ៨០ភាគរយ ក្នុងការស្រោចស្រព និងការមើលថែទាំឱ្យបានដិតដល់ដូចប្រភេទដំណាំខ្លះផងដែរ បើមិនមានទឹកគ្រប់គ្រាន់ទេ វាប្រឈមនឹងហានិភ័យមួយចំនួន ដូចជាងាប់ដើម ក្រិនដើម ការលូតលាស់មិនល្អ និងការឱ្យផលយឺត៕
None
