អាជ្ញាធរខេត្តព្រះសីហនុ បានគូសបញ្ជាក់ថា វត្តមានអ្នកដំណើរជនជាតិចិន ដែលបានចូលមកកម្ពុជា តាមរយៈអាកាសយានដ្ឋានអន្តរជាតិខេត្តព្រះសីហនុ នាពេលនេះ ជាការបើកទំព័រថ្មី ក្នុងការស្ដារស័យទេសចរណ៍ នឹងកាន់តែធ្វើឲ្យខេត្តព្រះសីហនុ អាចស្រូបទាញទាំងភ្ញៀវទេសចរ និងក្រុមអ្នកវិនិយោគបន្ថែមទៀត ដែលជាកត្តាជំរុញដល់កំណើនសេដ្ឋកិច្ចជាតិ។
ឯកឧត្តម ឡុង ឌីម៉ង់ អភិបាលរងខេត្តព្រះសីហនុ បានអះអាងថា វត្តមានក្រុមអ្នកដំណើរចិន ដែលបានចូលមកកម្ពុជា នៅអាកាសយានដ្ឋានអន្តរជាតិខេត្តព្រះសីហនុ នៅថ្ងៃទី២៧ ខែមករា គឺមានចំនួនសរុប ១២០នាក់ ដោយរាប់បញ្ចូលទាំងភ្ញៀវទេសចរ និងក្រុមអ្នកបម្រើការលើយន្តហោះ។ ឯកឧត្តមបានចាត់ទុកការមកដល់របស់ភ្ញៀវទេសចរចិន គឺជាការបើកទំព័រថ្មីមួយរបស់កម្ពុជា ក្នុងការស្ដារ និងជំរុញវិស័យទេសចរណ៍ឲ្យងើបពីវិបត្តិកូវីដ-១៩ ខណៈកម្ពុជា បាននិងកំពុងទន្ទឹងរង់ចាំនូវវត្តមានរបស់ភ្ញៀវទេសចរ និងអ្នកវិនិយោគចិន។
អត្ថបទគួរអាន
ពិភពលោក រួមទាំងកម្ពុជា បានចាត់ទុកអ្នកដំណើរ និងវិនិយោគិនចិន គឺជាចលករយ៉ាងសំខាន់ក្នុងការជំរុញនូវកំណើនសេដ្ឋកិច្ច នៅក្រោយពេលដែលប្រទេសចិនចាប់ផ្ដើមបើកទូលាយសម្រាប់ការធ្វើដំណើរជាអន្តរជាតិឡើងវិញ។ អ្នកជំនាញនៅក្នុងវិស័យទេសចរណ៍ ធ្លាប់បានបង្ហាញនូវក្ដីរំពឹងថា នៅក្រោយបុណ្យចូលឆ្នាំប្រពៃណីចិនរួច កម្ពុជានឹងអាចទទួលបានទេសចរចិនកាន់តែច្រើនឡើងបន្ថែមទៀត ប៉ុន្ដែ វាក៏ទាមទារឲ្យមានការពង្រីកនូវជើងហោះហើរត្រង់បន្ថែមទៀត ដើម្បីជំរុញឲ្យតម្លៃសំបុត្រយន្ដហោះមានតម្លៃកាន់តែទាបជាងមុន។
បើតាមរបាយការណ៍របស់ក្រសួងទេសចរណ៍នៅឆ្នាំ២០២២កន្លងទៅថ្មីៗកម្ពុជាទទួលបានភ្ញៀវទេសចរអន្តរជាតិជាង២លាន២សែននាក់កើនឡើងជាង ១ពាន់ភាគរយ បើធៀបនឹងឆ្នាំ២០២១ ក្នុងនោះភ្ញៀវទេសចរជានជាតិចិនមានជាង១០ម៉ឺននាក់ ឈរលេខរៀងទី៣ បន្ទាប់ពីថៃដែលមាន៨៥ម៉ឺននាក់ និងវៀតណាមជាង៤៦ម៉ឺននាក់។ កាលមិនទាន់មានការឆ្លងជំងឺកូវីដ-១៩ ពោលគឺនៅឆ្នាំ២០១៨ និង២០១៩ ចិនបានឈរកំពូលតារាង មានភ្ញៀវទេសចរអន្តរជាតិ មកកម្សាន្ត នៅកម្ពុជា ច្រើនជាងគេ ក្នុងនោះឆ្នាំ២០១៨មានជិត២លាននាក់ និងឆ្នាំ២០១៩ មានជាង២លាននាក់៕
