ក្រុមហ៊ុនជាង ១៥០ នឹងចូលរួមពិព័រណ៍ B2B ផ្នែកវិស័យផ្គត់ផ្គង់ម្ហូបអាហារ សណ្ឋាគារ និងបដិសណ្ឋារកិច្ចកំពូលរបស់កម្ពុជា នៅខែវិច្ឆិកាខាងមុខ

ព្រឹត្តិការណ៍ពិព័រណ៍នេះ នឹងត្រូវរៀបចំឡើង​ដោយ Informa Markets Cambodia ដែលត្រូវបានចុះបញ្ឌី​ទទួល​ស្គាល់ដោយក្រសួងពាណិជ្ជកម្ម​ស្ថិតក្រោមឈ្មោះ​​ក្រុមហ៊ុន AMB Tarus Exhibitions (Cambnodia) Pte Ltd។

ព្រឹត្តិការណ៍ពិព័រណ៍ B2B ផ្នែកវិស័យផ្គត់ផ្គង់ម្ហូបអាហារ សណ្ឋាគារ និងបដិសណ្ឋារកិច្ចកំពូល​របស់កម្ពុជា នឹងក្លាយជាមជ្ឈមណ្ឌលដ៏រស់រវើក ដើម្បីបង្ហាញអំពីឧត្តមភាព នៃច្រវាក់ផ្គត់ផ្គត់​នៃឧស្សាហកម្ម​​​ម្ហូបអាហារកម្ពុជា ជាមួយនិន្នាការនៃការវិវត្តវិស័យបដិសណ្ឋារកិច្ច​ទំនើប​ទាន់សម័យ​នាពេលបច្ចុប្បន្ន និងអនាគត។

ថ្លែងនៅក្នុងសន្និសីទសារព័ត៌មាន កាលពីថ្ងៃទី ៧ ខែសីហា ឆ្នាំ២០២៤ លោកស្រី Alice Lem នាយកគ្រប់គ្រង និងអភិវឌ្ឍន៍អាជីវកម្ម​ប្រចាំប្រទេសម៉ាឡេស៊ី និងកម្ពុជា នៃក្រុមហ៊ុន Informa រំពឹងថា CAMFOOD & CAMHOTEL 2024 នឹងមានការចូលរួម​ពីសំណាក់​ក្រុមហ៊ុន​ដាក់តាំងជាង ១៥០ ក្រុមហ៊ុន ជាមួយអ្នកទស្សនាជាង ១២,០០០ នាក់។ លោកស្រីបន្ថែមថា ព្រឹត្តិការណ៍ដ៏សំខាន់នេះ ឆ្លុះបញ្ចាំងពីកំណើនរឹងមាំ និងសក្ដានុពលដ៏ធំធេងនៃឧស្សាហកម្ម​បដិសណ្ឋារកិច្ច​របស់កម្ពុជា។

ជាមួយគ្នានេះ លោក ឌិន សុមេធារិទ្ធ ប្រធានសហព័ន្ធទេសចរណ៍កកម្ពុជា បានមានប្រសាសន៍ដែរថា វិស័យបដិសណ្ឋារកិច្ច និងម្ហូបអាហារ​របស់កម្ពុជា នឹងមានកំណើនដែលមិនធ្លាប់មានពីមុនមក ដែលជំរុញ​ដោយកំណើន​ទេសចរណ៍ និងការពង្រីកទីផ្សារក្នុងស្រុក។ ទន្ទឹមនឹងនេះ ការតាំងពិព័រណ៍នេះ ជាយុទ្ធសាស្ត្រ​ ដើម្បីទាញយកទុនលើការបង្កើនការវិនិយោគលើហេដ្ឋារចនាសម្ព័ន្ធទេសចរណ៍ និងការបង្កើន​​ការផ្សព្វផ្សាយមុខម្ហូបខ្មែរលើឆាកអន្តរជាតិ។

ពិព័រណ៍នេះ នឹងបង្ហាញទម្រង់សំខាន់ៗចំនួន៣ រួមមាន៖

១, បរិក្ខារផ្គត់ផ្គង់៖ បង្ហាញការច្នៃប្រឌិតចុងក្រោយបង្អស់​ក្នុងបច្ចេកវិទ្យា​ផ្ទះបាយ ឧបករណ៍រៀបចំអាហារ និងសម្ភារៈផ្គត់ផ្គង់ភោជនីយដ្ឋាន។

២, អាហារ និងភេសជ្ជៈ ៖ គ្រឿងផ្សំ ភេសជ្ជៈ វិស័យកាហ្វេ និងផលិតផល​សម្រេចពីក្នុងស្រុក និងជុំវិញ​ពិភពលោក។

៣, បដិសណ្ឋារកិច្ច និងការលក់រាយ៖ បង្ហាញសេវាកម្មបដិសណ្ឋារកិច្ចទំនើប ដំណោះស្រាយបច្ចេកវិទ្យា និងការច្នៃប្រឌិត​ផ្នែកលក់រាយ និងលក់ដុំ។

លោកស្រី Alice Lem បានបន្ថែមថា ការតាំងពិព័រណ៍នេះ ផ្ដល់នូវវេទិកាដ៏ទូលំទូលាយមួយ​សម្រាប់​អ្នកជំនាញ​ក្នុងឧស្សាហកម្ម ដើម្បីបង្ហាញផលិតផល ប្រភពអ្នកផ្គត់ផ្គង់ថ្មី និន្នាការ និងបង្កើតទំនាក់ទំនង​អាជីវកម្ម​សំខាន់ៗសម្រាប់​អាជីវកម្មគ្រប់ទំហំ បង្កើតឱកាស និងបណ្ដាញទំនាក់ទំនងរវាងអ្នកផលិត អ្នកចែកចាយ និងដៃគូសក្ដានុពលផ្សេងៗទៀត។

ការតាំងពិព័រណ៍នេះ ក៏មានការរៀបចំការប្រកួតប្រជែងចម្អិនម្ហូប និងបដិសណ្ឋារកិច្ចថ្នាក់ជាតិ ឆ្នាំ២០២៤ ដោយផ្ដោតលើការប្រកួតប្រជែង ជំនាញធ្វើម្ហូប និងភាពច្នៃប្រឌិត រួមមានការឆ្លាក់ផ្លែឈើ និងបន្លែ ម្ហូបបួស ការរចនានំអាពាហ៍ពិពាហ៍ និងជំនាញបដិសណ្ឋារកិច្ចដូចជា រៀបចំគ្រែ រៀបចំផ្កា ការរៀបចំតុ និងវិញ្ញាសារជាច្រើនទៀត។

លោ​ក សុង តេង ប្រធានសមាគមចុងភៅកម្ពុជា មានប្រសាសន៍ថា “ការប្រកួតធ្វើម្ហូបថ្នាក់ជាតិ ឆ្នាំនេះ នឹងជំ​រុ​ញ​ឧ​ត្ត​មភាព​ផ្នែក​ធ្វើ​ម្ហូបអោយកាន់តែប្រសើរ។ យើងបានសិក្សាបញ្ហា ប្រឈមនានា ដើម្បីកែ​តម្រូវនិងពង្រឹង ជំនាញ​បច្ចេ​កទេ​ស​ដោ​យ​រួ​ម​បញ្ចូល​​ជា​មួយគ្រឿ​ង​ផ្សំ​ជា​តិ​និ​ង​អ​ន្ត​​រជា​តិ​ដើ​​ម្បី​ធ្វើអោ​យ​ប្រ​សើ​រ​ឡើ​ងនៃ​ម្ហូ​បដ៏​ស​ម្បូ​របែប​របស់កម្ពុជា ។​

លោកឧកញ៉ា ហ៊ី សុធា ប្រធានសមាគមសណ្ឋាគារកម្ពុជា បានបន្ថែមថា CAMFOOD & CAMHOTEL 2024 នឹង​ដើរ​តួនាទី​យ៉ាងសំខាន់ក្នុងការជួយឧស្សាហកម្មផ្នែកម្ហូបអាហារ និងបដិសណ្ឋារកិច្ច សម្របខ្លួនទៅនឹង​និន្នាការ ក្រោយជំងឺរាតត្បាត ក្រោមការណែនាំ​និង​ការ​អនុវ​ត្តប្រកបដោយនិរន្តរភាព ជាមួយនិងដំណោះស្រាយជាមួយនិ​ងប​ច្ចេ​ក​វិ​ទ្យា​ចុ​ង​ក្រោ​​យ​ប្រកបដោយផាសុកភាព។

លោកឧកញ៉ាលូ ម៉េង ជាស្ថាបនិក និងជានាយកប្រតិបត្តិនៃ Almond Hospitality Group បានមាន ប្រសា​សន៍​​ថា​ ព្រឹត្តិ​ការ​ណ៍​ពិព័រណ៍​ខាងមុខ​នេះ នឹង​ក្លាយជា​ព្រឹត្តិការណ៍ដ៏សំខាន់​មួយ​ ដោយក្នុង​ព្រឹត្តិការណ៍នោះ នឹង​​យក​ផលិតផល​កសិផល​របស់​កម្ពុជា​ចំនួន​៤មុខ​មកកែច្នៃ​ជា​ម្ហូប​ ដូចជាម្រេច​កំពត ស្វាយកែវរមៀត ស្វាយចន្ទី និង​អង្ករ​ប្រណីត​របស់​ខ្មែរ ដើម្បីឱ្យ​ចុង​ភៅជំ​នាញ​កែច្នៃមុខ​ម្ហូប​ថ្មី ។​បន្ទាប់ពីរកឃើញ​ជ័យ​លាភីហើយ​នោះ មុខ​ម្ហូប​នោះនឹងត្រូ​វផ្សព្វផ្សាយ​និងដាក់​ជាម្ហូប​ជាតិ​របស់​ខ្មែរ ៕