លោក ងួន ឡាយ ប្រធានសមាគមម្រេចកំពតបានគូសបញ្ជាក់ថា ទីផ្សារនាំចេញម្រេចកំពតធំជាងគេគឺ ការនាំចេញទៅកាន់ទីផ្សារអឺរ៉ុប និងទីផ្សារនៅបណ្តាប្រទេសក្នុងតំបន់អាស៊ីមួយចំនួនដូចជា កូរ៉េខាងត្បូង ជប៉ុន និងកោះតៃវ៉ាន់ជាដើម។ ហើយតម្លៃម្រេចកំពត គឺមិនមានការប្រែប្រួលនោះទេ គឺម្រេចខ្មៅនៅតែមានតម្លៃ ១៥ ដុល្លារ ក្នុង១គីឡូក្រាម រីឯម្រេចក្រហមមានតម្លៃ ២៥ ដុល្លារ ក្នុង១គីឡូក្រាម និងម្រេចសវិញ មានតម្លៃ ២៨ ដុល្លារ ក្នុង១គីឡូក្រាម។
បើតាម លោក ងួន ឡាយ បានគូសបញ្ជាក់បន្ថែមថា ទីផ្សារនាំចេញម្រេចកំពត ឆ្នាំនេះអាចនឹងល្អជាងឆ្នាំមុនផងដែរ ដ្បិតថា កសិករបានចុះកុងត្រាជាមួយក្រុមហ៊ុនដែលប្រមូលទិញរួចរាល់អស់ហើយ។ លោកបានបញ្ជាក់ដែរថា ទីផ្សារនាំចេញ គឺអាចមានឧបសគ្គតិចតួចដែរ ចំពោះកសិករដែលជាម្ចាស់ចម្ការខ្នាតធំមួយចំនួន ដែលពួកគាត់មិនមានទីផ្សារនាំចេញផ្ទាល់ខ្លួន ពីព្រោះថាខាងក្រុមហ៊ុនពួកគាត់ចុះកុងត្រាទិញ តែចំពោះកសិករខ្នាតតូច និងមធ្យម ដែលមានវិញ្ញាបនប័ត្របញ្ជាក់ផលិតផលសម្គាល់ភូមិសាស្រ្ត(GI) ប៉ុណ្ណោះ។
អត្ថបទគួរអាន
លោក ហែម ត្រូ កសិករដាំម្រេចមួយរូប នៅខេត្តកំពត ក៏បានអះអាងដែរថា សន្ទុះនៃលក់ម្រេចកំពតសម្រាប់ទីផ្សារនាំចេញនៅឆ្នាំនេះ មានភាពរលូនល្អ ដោយក្នុងមួយខែៗអាចនាំចេញចំនួនពីកន្លះតោនទៅ១តោនផងដែរ។ លោក បន្ថែមថា កសិករដាំម្រេចកំពតមកទល់ពេលនេះ ប្រមូលផលបានប្រមាណជាង ៥០% ហើយការប្រមូលផលឆ្នាំនេះ ហាក់មិនសូវខុសគ្នាពីឆ្នាំមុននោះទេ កំណើននៃការប្រមូលផលអាចនឹងមានកំណើនតិចតួចប៉ុណ្ណោះ ដោយសារតែផ្ទៃដីផលិតកម្មរក្សានៅដដែល។ ជាមួយគ្នានោះ ស្ថានភាពនៃការប្រមូលផលពេលបច្ចុប្បន្នហាក់មានផលប៉ះពាល់តិចតួចដែរ ដោយសារតែរដូវវស្សាមានភ្លៀងធ្លាក់ច្រើនដែលនាំឲ្យពិបាកក្នុងការប្រមូលផល ការហាលសម្ងួតម្រចផងដែរ។
បើតាមការបញ្ជាក់ពីប្រធានសមាគមម្រេចកំពត កាលពីឆ្នាំ២០២១ ម្រេចកំពតបាននាំចេញសរុបជាង ១០០តោន ខណៈដែលកាលពីឆ្នាំ២០២០ នាំចេញបានប្រហែលត្រឹមតែ៧០តោនប៉ុណ្ណោះ។
ដោយឡែកបើតាមទិន្នន័យពីក្រសួងកសិកម្មបង្ហាញថា នៅរយៈពេល ៤ខែដំបូងនៅឆ្នាំ២០២២ កម្ពុជាសម្រេចបានការនាំចេញម្រេចទូទៅ សរុបជារួម មានជិត៤ពាន់តោន ទៅកាន់ទីផ្សារអន្តរជាតិ កើនឡើងជិត ៨០% ធៀបនឹងរយៈពេលដូចគ្នាកាលពីឆ្នាំមុនហើយក្នុងនោះ វៀតណាម គឺជាប្រទេស បញ្ជាទិញម្រេចពីកម្ពុជាច្រើនជាងគេបំផុត៕
None
