តាមរយៈការស្ទង់មតិមួយធ្វើឡើងដោយសមាគមវាយនភ័ណ្ឌ និងសំលៀកបំពាក់វៀតណាម ក៏ដូចជាសមាគមស្បែកស្បែកជើងនិងកាបូប បានរកឃើញថាជាង ១២ ភាគរយនៃក្រុមហ៊ុនក្នុងស្រុករបស់វៀតណាម ត្រូវបានអតិថិជនបរទេសលុបចោលការកម្ម៉ង់ទិញ និងទាមទារសំណង ដោយសារតែរំលោភកិច្ចសន្យា ខណៈ ២១ ភាគរយទៀតត្រូវបានអតិថិជនក្រៅស្រុកលុបចោលការបញ្ជាទិញ ប៉ុន្តែមិនមានការទាមទារសំណងផ្សេងទៀតនោះទេ។
សូមជម្រាបថា ការលុបចោលទាំងនោះដោយសារការដឹកជញ្ជូនមានភាពយឺតយ៉ាវ ដែលជាធម្មតាការដឹកជញ្ជូនទំនិញពីអាស៊ីទៅអាមេរិកត្រូវចំណាយតែ ៤០ ថ្ងៃប៉ុណ្ណោះ តែក្រោយមានវិធានការគម្លាតសង្គមទំនិញទាំងនោះត្រូវចំណាយពេលរហូតដល់ ៨០ ថ្ងៃ។ ហេតុដូចនេះហើយ ភាពយឺតយ៉ាវនេះបានធ្វើឱ្យអតិថិជនបរទេសមួយចំនួនបានផ្លាស់ប្តូរការបញ្ជាទិញរបស់ពួកគេទៅប្រទេសផ្សេងទៀត ហើយការផ្លាស់ប្តូរបែបនេះ អាចនឹងបន្តក្នុងរយៈពេល ៥ ខែទៅមុខទៀត។
គួរបញ្ជាក់ថា ការនាំចេញសម្លៀកបំពាក់ និងវាយនភ័ណ្ឌរបស់វៀតណាមនៅក្នុងខែកញ្ញាបានធ្លាក់ចុះ ៩ ភាគរយបើធៀបទៅនឹងខែមុនដែលមានទំហំទឹកប្រាក់ត្រឹម ៣ ពាន់លានដុល្លារប៉ុណ្ណោះ ខណៈការនាំចេញសម្រាប់ឆ្នាំនេះ ដែលគិតចាប់ពីដើមឆ្នាំរហូតដល់បច្ចុប្បន្ននេះ មានទំហំទឹកប្រាក់ចំនួន ២៩ ពាន់លានដុល្លារ។ ទន្ទឹមនេះ យោងតាមសមាគមស្បែកជើង និងកាបូបវៀតណាមបានឱ្យដឹងថាការនាំចេញស្បែកជើងរបស់វៀតណាមក្នុងខែកញ្ញាកន្លងទៅនេះ បានធ្លាក់ចុះជាង ៤៤% បើធៀបនឹងរយៈពេលដូចគ្នាកាលពីឆ្នាំមុន ដែលមានទឹកប្រាក់ ៧០០ លានដុល្លារ។ ខណៈការនាំចេញកាបូបក៏បានធ្លាក់ចុះ ៤៨ ភាគរយផងដែរ។
អត្ថបទ៖ ស៊ើង និមល់
